Jacob takäpfwaye lechetsos Efraín lhäy'e Manasés
1Tä tajyäme p'ante ifwalas iyhäj, José ihanej tä lajcha t'inhayaj ilän. Wet yik tä ihoye, ichäj leles Manasés lhäy'e Efraín. 2Tä nichäte, õ'fwenho Jacob tä lhäs José näm tä ihoye. Tä mälhyejtso, lhainityenphä wet nephä wet tatayphä tä i'pe lemäwet. 3Wet tahuyej José wet yok:
–Dios tä lajit letumfwaya lhain'älitte n'oyej tä oiwhäye hupuy tä lhey Luz tä ihi honhat tä Canaán. Wet takäpfway n'oyeje lhämet tä yok, 4“Oyämla wujpey ales, wet lhamel tä lepes lheley häpkhila wichi tä wujpey tä i'pe honhat. Häte ow'enhihola lhamel häp honhatna wet lewuhuyla yämthilek tiyäj'attsiy.”
5Wet Jacob äp tahuyej lhäs José wet yok:
–Häp ales Efraín lhäy'e Manasés tä lhamel nichäthihchä honhatna tä Egipto tä kamaj n'am näm ame kana, olewuk t'at lhamel, mälhyej tä olewuk olham oles Rubén lhäy'e Simeón. 6Aleslak nech'e ichehen chik iw'echehi lhamelna, häpkhilek alewuk. Wet tä Efraín lhäy'e Manasés lech'inhis t'at, m'ak tä n'okäywet tä lewuk lhamel häte lewukla t'at lech'inhis. 7Häp m'ak tä tamenej tä owoyetso, oyen tichunhayaja ako Raquel. Tsi tä otälhehte Padán-aram, tä tatäy lhimphaj chik onchäte lhip tä lhey Efrata, lham y'il tä ihi wet otjäntech'oye tä iwhäye n'äyij. Tä mälhyejtso, ako p'itsek ihi t'at honhat tä Canaán.
(Ifwalasna lhiptso nemhit lhey Efrata, lhey Belén.)
8Wet nech'e Israel, wok oyok, Jacob, iyahin José leles wet yok:
–¿Atsi tä häpe mamsestsi?
9José nichulho lajcha wet yok:
–Oles tä Dios hiw'en n'oho tä oihi honhatna, häpe t'at tähestsi.
Jacob yok:
–Ämet n'oye, otkäpfwayhiyela lhamel.
10Wet Israel wuj tä hich'ut wet nemhit wuj tä isiche tatelhoy. Tä mälhyejtso, José ihänwhäye lajcha häp leles, wet Jacob tatsufwelej lhamel wet hits'uhi lech'alos. 11Wet tahuyej José wet yok:
–Tek oyenek yachajiholak oaiw'en. Mat athana Dios iwahin n'oyej chik oaiw'en, lhäy'e ales.
12José itiyej kanhi leles wet nech'e lham tä t'upeyhchä pajtha letacho taje honhat. 13Tä ileyej tä iwoynejetso, äp yachajo tä tachuma leles. Itumtej takwey tä lefwomkat häp lhäs Efraín, wet itumtej lets'amkat Manasés. Wet lham ihi lechowej leles tä ihi tä lajcha Israel tatache. 14Matkat tä Israel iti'pe takweyey, takwey tä lefwomkat häp tä iti'pe Efraín, wet iti'pe takwey tä lets'amkat häp Manasés tä häpe n'ochunkatsek. 15-16Wet takäpfwaye José wet yok:
“Häp Dios tä oka thänhäy yen Lewuka,
ochäti Abraham laka Dios
wet ojcha Isaac laka Dios,
is chik takäpfwayeje lakäpfwayaj tä is häp mamsesna.
Häp Dios tä t'amaj n'oyej
tälhe ifwala tä nech'e oiche p'ante yäk nämena,
is chik takäpfwayeje lakäpfwayaj tä is.
Häp ángel tä ifwayhat n'oyej
nilhokej m'ak tä ni'isa,
is chik takäpfwayeje lakäpfwayaj tä is.
Is chik olhey, lhäy'e ojcha Isaac lhey,
lhäy'e ochäti Abraham lhey,
nittäyayej lhamelna.
Is chik wujpey leles,
wet häpe wichi tä wusche'pe tä i'pe honhat.”
17Mat José ihuminhit'a tä lajcha iti'pe takwey tä lefwomkat häp Efraín. Wet tachuma lajcha kwey tä i'pe Efraín, wet y'ayhetpe Manasés 18wet yok:
–Ijcha, isit'a. Olhäs elhna häp tä ochunkatsek. Häp tä is chik leti'pe akwey tä afwomkat.
19Mat Jacob iwohiyet'a, wet yok:
–Ohanej t'at, yäs, pajche ohanej. Häte Manasés häpkhila wichi tä wujpey wet äp õ'wunthila. Mat lech'inij inuhla'pe häp lham, wet leles tä lepes lheley häpkhila wichi tä wujpey tä w'enhache lhamej tä i'pe honhat.
20Wet ifwalatso Jacob takäpfwayeje lhamel häp lhämtesna wet yok:
–Wichi tä Israel lhayis iwohipeja eyisa chik takäpfwaye elh chik häpe, wet yohipejakwe, “Is chik Dios iwoyej ame m'ak tä is, mälhyej tä iwoyeje p'ante Efraín lhäy'e Manasés.”
Mälhyejtso m'ak tä Jacob iwoyeje Efraín tä ichunkatlä lechila Manasés. 21Wet nech'e tahuyej José wet yok:
–Lew'en tä olham eyte oy'inhi. Mat Dios ihla amejen wet ayachajiyela achätilis kahonhat. 22Wet am, honhat tä ow'en amho inu'pe achilalis. Ow'en amho honhat tä Sikem, häp honhat tä osoyejte Amorreo lhayis tä ottayhlä wet okalhi.
