Gén 9

₁Dios takäpfwayeje lhämtesna häp Noé lhäy'e leles wet yok:

–Woyay alesa, a'ämay wujpey häpkhilek tapoyej honhat. ₂Nilhokej itshätäy tä ihi honhat nowayhla amehen, lhäy'e afwenchey, lhäy'e w'ahat, lhäy'e m'ayhay tä lhaitonchehen honhat. Nilhokej tähestso ihlachufwi han'ohyaj. ₃Ow'en amhohen yämthilek häpe äk, lhäy'e hal'ä lhay mälhyej tä ow'enhohte atetsel. ₄Mat iche m'ak weihalha tä on'äyej amhohen. Oyok, yej tuj t'isan tä lew'oyis ihi. Tsi n'ow'atshancheyaj häp tä ihi w'oyis. ₅Olham oyenla letesayej elh at chik häpe, hin'o wok itshäwet, chik itsäyhchä lew'oyis elh chik häpe amel. Elh weihalhapej hin'ol oyenla letesayej chik itäyhat elh lew'atshancheyaj. ₆Elh chik ilän elh, häte lham õ'länla, tsi olham oyenlhi hin'o wet otech'ayen lhamej. ₇Amel woyay alesa, a'ämay wujpey häpkhilek tapoyej honhat.

₈Wet Dios tahuyej Noé lhäy'e leles wet yok:

₉–Tetshan. Olham tek otäyhthila olhämetna tä ot'unhatche amejen, lhäy'e ales pajtha nichäte iyhäj tä lepes lheley, ₁₀lhäy'e nilhokej itshätäy tä i'amejen tä lenukwephä tä letälho ahi, lhäy'e afwenchey. ₁₁Oyachajo tä oyok, Tek owohla elha olhämetna tä ot'unhatche amejen. Nemla otäyhtejen pelhay häp wichi lhäy'e itshätäy. Ihichet'ala elh pelhay tä itäyhat honhat. ₁₂Häp täja letetnek olhämet tä ot'unhatche amejen, lhäy'e itshätäy, yämlek tiyäj'attsiy: ₁₃Otihi pule häp lewo tä oyen tetnekayej olhämet tä ot'untejche honhat. ₁₄Chik olham ochenpe honhat pules, wet n'änhiyepeja lewo tä ihi. ₁₅Wet chik oyahnhipeja, oyenhipeja otichunhayaja olhämet tä ot'unhatche amejen, lhäy'e itshätäy, wet nemla iche pelhay tä itäyhthen olhenhay. ₁₆Chik lewo n'älehi pule, olham oyahnhila wet oyenla otichunhayaja olhämet tä ot'unhatche yämlek tiyäj'attsiy, tä owoyeje wichi lhäy'e itshätäy tä ihi honhat. ₁₇Häp täjtso tä oyen tetnekayej olhämet tä ot'unhatche tä owoyeje nilhokej amel.

Mälhyejtso lhämet Dios tä tahuyej Noé.

₁₈Häp Noé leles tä tälho p'ante lehi häpe Sem, Cam tä häpe Canaán lajcha, lhäy'e elh tä lhey Jafet. ₁₉Häp tähestso Noé leles, wet nilhokej wichi tä i'pe honhat tälhe t'at lhamel.

₂₀Noé iwo tesa tä yenlhi yachuyaj, itihchä uvas. ₂₁Fwala elh p'ante iyäyej hat'es wet w'oknajej, wet nichät katsi tä ts'ilakche tä ichufwi lewukwe tä tsänt'äj. ₂₂Wet lhäs tä lhey Cam, wok oyok, Canaán lajcha, hiw'en lajcha Noé tä ts'ilakche, wet yik tä iwo silätaye lepuhfwas. ₂₃Tä mälhyejtso, Sem lhäy'e Jafet lhamel tachuma lew'uy wet iti'pe lhamel lechäyi, wet tatache len'äyij tä yikhen tsi tek t'uhläk iyahin lajcha tä ts'ilakche. Tä nichäte lajcha, wet ithatpe lew'uy.

₂₄Tä Noé n'om tä nojphä tä w'oknaj, wet ihanej m'ak tä lhäs tä nithaläkwa iwoye. Wet yok:

₂₅–¡Lewit'äy ihi Canaán! Häpkhila n'okwenek tä lhäy'e lhip tä p'elitsaj, lepuhfwas yenla lakawoya.

₂₆Wet äp yok:

–Is chik Lhawuk Dios takäpfwaye Sem, wet is chik lakwenek t'at häp Canaán. ₂₇Is chik Dios iwahnej chik lhäy'e lhip Jafet leles, wet äp ihi t'at Sem lew'etes, wet is chik lakwenek t'at Canaán.

₂₈Tälhe täjp'ante pelhay itäyhat wichi, Noé hiw'en trescientos cincuenta (350) nekchämis iyhäj. ₂₉Tä mälhyejtso, nekchämis tä Noé hiw'en p'ante tä nilhokej novecientos cincuenta (950), wet häp p'ante tä y'il.