Heb 11

₁Elh chik t'ekhahyaj ihi, häpe t'at tä tek ikachu tä ikathiyeja m'ak tä inihich'oye. Wet häpet m'ayhay tä nin'äla, yok, “Matche.” ₂Häp lhatetsel, häpe t'at t'ekhahyaj tä tamenej tä Dios akäjejlhi p'ante lhamel.

₃Häpe t'at lhat'ekhahyaj tä n'aisej wet y'ahanej tä Dios yenejlhi p'ante lham lhämet häp pule lhäy'e honhat, lhäy'e nilhokej m'ak tä iche. Wet häp tä mälhyejtso, m'ak tä n'äl tälhe t'at m'ak tä nin'äla p'ante.

₄Abel t'ekhaye p'ante Dios, wet häp tä lhäy'e lhip tä is t'awayhat tä yachaje Dios, tä häpe itshäwet tä ilän. Häp t'awayhattso inu'pe m'ak tä lechila Caín yachaje Dios. Wet häp tä Dios yäme tä häpe hin'o tä is alhoho, wet tachum'atlä t'awayhat. Wet tej tä Abel y'il p'ante, mat hätet iwoye chik kamaj tahuy n'amehen, häp tä n'aisej t'ekhahyajtso.

₅Enoc t'ekhaye p'ante Dios, wet häp tä Dios imälhet iläyej tä ichäj, yämthilek n'ila. Wet wichi nemhit hiw'en p'ante, tsi Dios ichäj t'at. Wet N'olesaynek yäme tä kamaj Dios nichäja, wuj tä akäjejlhi. ₆Wet oyok, hin'o chik newache t'ekhahyaj, ikalhihit'a chik ikänitlhi Dios. Tsi chik ihoye Dios, iwohiyet'ak nimattache tä Dios iche wet häpe Elh tä hiw'enho wichi tä t'ukwe lham häp m'ak tä is.

₇Noé t'ekhaye p'ante Dios, wet häp tä tach'ahuye Dios lhämet tä ihantej tä nämla m'ayhay tä lham kamaj tatelhoy niw'ena. Wet häp tä Noé yenlhi barca, yämthilek ifwayhthen lew'et lheley. Wet häp t'ekhahyajtso hin'älit tä letes iyej wichi tä ip'ante honhatena, mat Dios hi'isyenej alhoho Noé t'ekhahyajtso.

₈Abraham t'ekhaye p'ante Dios, wet häp tä iwoye t'at tä Dios t'äne, wet yik, ihoye honhat tä Dios ifwenho tä yenla lewuka. Tä yikch'oye laka honhat, ihanhiyejt'a ihi lhip tä ihoye, ₉wet tä ihi p'ante honhat tä Dios pajche ifwenho, hätet iwoye hin'o chik kalew'eta, mat isej t'at t'ekhahyaj tä iyej. Yen at lewukweya tsänt'ähes, häp lhäs Isaac lhäy'e lham Isaac lhäs Jacob häte iwoye p'ante, häp lhamel tä häte lewuhuyla m'ak tä pajche Dios ifwel p'ante. ₁₀Tsi Abraham inihich'oye tä ihichela hupuy tä Dios lhenek tä lefwetes t'unhi.

₁₁Wet tä Abraham t'ekhaye t'at Dios, tej tä lham häpe elh tä hich'ut, mat Dios hiw'enho p'ante lakhajyhayaj, lhäy'e lech'efwa Sara tä sufwnaj, yämthilek iwo lhäsa. Abraham t'ekhaye p'ante tä Dios yämla matche m'ak tä ifwel. ₁₂Wet häp tä mälhyejtso, tälhe hin'o weihalhatso tä eyte y'inhi p'ante, iwo tesa tä iche leles tä wujpey, hätet iwoye katetsel tä ipuleye, wok holo tä iwhäye tewok, nehit katsik ihanej yämthilek iwo t'ufwahtesa.

₁₃Tä tajyäme wujpe lewhäyis, Abraham lhäy'e Isaac lhäy'e Jacob y'inhen t'at tä ihi t'ekhahyaj. Wet tej tä nikatayej m'ak tä Dios ifwenho p'ante lhamel, mat hätet iwoyek hiw'ene t'at tä atofwe wet yok, “Häp täj l'eni.” Häte n'äfwelhit'a letapehen, mat yok, “Ow'ethit'a honhatna, pitajit'a chik oihi.” ₁₄Wet häp wichi tä lhämet mälhyejtso, n'äl tä kamaj t'ukwe t'at laka honhat tä matche. ₁₅Chik yenhi tichunhayaja honhat tä pajche p'ante tälhe, ikalhi t'at chik yäple häp honhattso. ₁₆Matkat iwatlä laka honhat tä lhäy'e lhip tä is, wok oyok, lew'et tä ipuleye. Häp tä tamenej tä Dios n'äfwelhit'a letape tä õyen häpeya lhamel laka Dios, wet iwaklhat t'at hupuy tä lhamel lew'et.

_17-18Tä Abraham t'ekhaye p'ante Dios, Dios yelhtshayen p'ante, wet lham Abraham tachuma lhäs Isaac yämthilek ilän wet yachaje Dios. Matche, tej tä Dios pajche ifwenho tä yok, “Tälhiyela Isaac ales tä lepes lheley”, mat wak'alh yämthilek yachaje. ₁₉Tsi kalelhäj letichunhayaj tä Dios lakhajyhayaj ihi wet y'aje n'op'itseyhay tä ihanej iwoyneje yämthilek inuhatchephä. Wet matche, tä lhäs yachajo p'ante tä iyej Abraham, hätet iwoye tä tachumlä tä tälho n'op'itseyhay.

₂₀Isaac t'ekhaye p'ante Dios, wet häp tä ifwenho leles Jacob lhäy'e Esaú häp lakäpfwayajay tä ihiyeja.

₂₁Jacob t'ekhaye p'ante Dios, wet tä tatäy lhimphaj wet y'il, ifwenho lakäpfwayajay häp lhäs José leles, wet itshänhi honhat letsut tä itsok wet n'okwiyej Dios.

₂₂José t'ekhaye p'ante Dios, wet tä eyte y'inhi p'ante, ifwenho Israel lhayis tä chik paj lhamel yikhilach'oye honhat tä Egipto, wet hin'äy lhämet häp m'ak tä ne'tek õ'woyeje lep'itsek.

₂₃Moisés lako lhäy'e lajcha t'ekhaye p'ante Dios, wet tä nech'e iche p'ante Moisés, lhamel iskat yäk tres iwel'as, tsi hiw'en tä wuj tä isilataj häp han'äfwaj. Wet lhamel nowayhiyet'a niyat lhämet tä ne'tek õ'länhen nä'tshas tä hin'ol.

₂₄Moisés t'ekhaye p'ante Dios, wet häp tä thaläkw, ihuminhit'a chik wichi yäme tä häpe Egipto lhele kaniyat lhäse tä lhäs. ₂₅Tek t'uhläk iwo kotsayej m'ayhay tä nit'una tä n'och'isukyajay ikänch'oye. Mat tatshupiye wet lhaitan'istej Dios leles leteläythayajay. ₂₆Tsi hätet iwoye chik yok, “Chik wichi iläkwlhin'o tä ohänlhi Cristo, ohäpe t'at elh tä wuj okäywet tä in'oyej.” Wet lham yenhit'a käjyaja n'okäywet tä ihi Egipto, tsi hiw'ene t'at lakaha tä Dios hiw'enhihola.

₂₇Tä Moisés t'ekhaye p'ante Dios, wet häp tä ileyej Egipto wet yikch'oye. Nowayhiyet'a niyat lewäk, mat lhaikhajyenej m'ak tä iwoye, hätet iwoyek hiw'en t'at Dios tä nin'äla. ₂₈Wet tä t'ekhaye p'ante Dios, häp tä yenlhi p'ante Pascua wet ne'tek wichi y'ilenchehen lepelis häp w'oyis, häpkhilek ángel tä ilänhen Egipto lheley lechunkatshay niläna Israel lhayis leles tä lechunkatshay.

₂₉Israel lhayis t'ekhaye p'ante Dios, wet häp tä lhamel yistho Lewomekchät, hätet iwoyek inukwe honhat tä tamchäy. Wet tä Egipto kanifwotaj fwetaj iten lhamel tä inukwe, mat nilhokej hich'ahen.

₃₀Wet tä Israel lhayis t'ekhaye p'ante Dios, lhamel ilunejlhipej hupuy tä Jericó yäk siete ifwalas, wet nichät katsi n'olafwek tä ilunej.

₃₁Atsinha tä kain'oyaj länek tä lhey Rahab t'ekhaye p'ante Dios, wet häp tä nitn'isayej iyhäj tä kachuhantses tä y'inhen. Tsi lham tachumlä Israel lhayis chenhay tä lhaiskatwethä tä ihoye lhamel.

₃₂Oyenek naya. Tsi chik oyäme iyhäj mälhyej iwoye Gedeón, Barac, Sansón, Jefté, David, Samuel, lhäy'e profetas, wuj lewhäy tä owatlä. ₃₃Tä lhamel t'ekhaye p'ante Dios, wet häp tä ikalhi honhates iyhäj, wet iwoyejepej laka wichi m'ak tä is alhoho, wet ikatej m'ak tä Dios ifwenho, hip'ohiche t'owalhas lak'as, ₃₄y'omathen itäj lhayis tä äytesiche, tafwayej lhamel tä t'uhläk ilänejen lefwajnhates, wet tä nitkhajayahen, nech'e takhajayhen t'at yämthilek iwo laka'tshayaja wet yokweschephä letayhfwas kanifwotas.

₃₅Iche p'ante atsinhay tä lew'et lhele y'inhen mat yachajo tä iläyhen, wet lhamel tachumlä. Wet iyhäj wichi tach'anlhaye t'at tä õ'päjpejwethä, tek lhaifwonej m'ak tä õ'menyenej yäk y'inhen t'at, häpkhilek inukwephä wet isakanej lew'atshancheyaj tä lhäy'e lhip tä is. ₃₆Iyhäj õ'tiyej n'oläkwyhanyajay lhäy'e n'otasnhayajay, wet õyäytej chinhas wet õ'thathomche n'op'onthis. ₃₇Wet iyhäj õ'thatejwethä tuntey wet y'inhen, wok õyistejomche lesulkas serrucho, wok õ'länejen n'ofwajnhates. Lew'etes kalelhäjit'a, yen at w'uyisa tson'atas t'ähes wok kayla t'ähes, lhäy'e lhip tä p'elitses, ihi t'at n'och'atkanyaj wet õyen w'et m'ayhaya. ₃₈Matche tä isen lhamel, wet honhat lhäy'e wichi tä ihi t'uhawethiyejt'a. Lhamel ilunche t'at ts'anis lhäy'e chenhas, yen wukweya chowhay tä ihi honhat lhäy'e chenhas tä tafwochechufwi.

₃₉Oyok, nilhokej lhamel p'antetso matche tä t'ekhaye Dios. Mat lhek tetshan olhämet, tej tä Dios akäjejlhi t'ekhahyajtso, lhamel ikathiyejt'a ayej m'ak tä lham pajche ifwenho, ₄₀tsi lham iwaklhat m'ak elh tä lhäy'e lhip tä is tä y'ajat n'amehen. Wet häp tä mälhyejtso, tä n'amel y'ap'akej lhamel, nech'e wak'alh t'ekhahyaj.