Heb 13

₁Tä ahäpehen wichi tä lhalepuhfwaswekej Cristo, yej leyayej tä lehumnhen aiyhäj. ₂Yej p'ethatayhlä tä lehuminlä elh chik häpe chik näme haw'et. Tsi iche p'ante iyhäj tä iwoynejetso m'ak tä iwoye, tej tä nitäfwelayej hin'ol tä takastej lew'et, mat ihumin'atlä. Tä paj wet nitäfwelej tä häpe ángeles.

₃Enay atichunhayaja lhamel tä õhp'ohiche, tech'aynej chik lhewej t'at tä letan'isej. Enay atichunhayaja lhamel tä wichi n'äyihomche, tsi elat amel hätehla, amälhhiyejat iwoye lhamel.

₄Nilhokej amel, yej lhenay w'et m'ayeka n'owhayyhayaj, mat amajej hach'efwa wet yej känchiyej akain'oyaj. Tsi Dios itihiyeja letes lhamel tä iwo lakain'oyaja, lhäy'e iyhäj tä iwom lech'efwa wet iyej elh.

₅Yej tiyej ahumnhayaj chinaj t'äj, mat m'ak tä i'amej naya t'at, yej t'ayhtejen mat atamsek ihi. Tsi Dios yok, “Olehit'ala amej wet tek oaiwomla.” ₆Tä mälhyejtso, y'äm kalelhäj tä y'ok:

₇En atichunhayaja lhamel tä t'uyehen ahusey, tä pajche iwo siläta amejen Dios lhämet. En atichunhayaja amejen m'ak tä lhamel iwoye yäk nichäte lakapes, wet ti amejen achayaj mälhyej iwoye lhameltso. ₈Jesucristo mälhyet lham fwalas tä pajche, wet athana, wet yämthilek tiyäj'attsiy. ₉Yej tach'anlhaye yämthilek aiton n'ochufwenyaj at chik häpe tä w'enha lhamej. Lhäy'e lhip tä is chik kahänaya lakeyes tä wichi itiyej lhäk, mat ahusey takhajayejwethä Dios lep'altsenyaj. Tsi wichi tä ihän n'okeyes tä oyämetso, m'ak isiyejt'a.

₁₀Mat n'amel w'enha lhamej m'ak tä in'amejen, häpkhit'a itshäwet tä õ'län, wet sacerdotes tä tach'ote Dios lew'et tä pajche õ'wahnhiyejt'a chik tuj. ₁₁Tsi Sacerdote tä Lhamya ihänpejchufwi Dios lew'ettso itshätäy lew'oyis, wet yachaje Dios yämthilek itäyhat n'och'isukyajay. Mat häp itshätäy t'isanis õ'tontehlä wichi lew'et wet õ'wunhomche. ₁₂Wet häp tä mälhyej'attso, Jesús leteläythayaj tä y'il, ip'ante lhipe hupuy, yämthilek yen t'amajchetayej wichi lham lew'oyis tä itsäyhchä. ₁₃Tä mälhyej'attso, n'amel hätet iwoye chik n'anukwephä tä y'ehi hupuy wet n'ahoye lham, wet n'ateläytej n'ot'ulhnhayaj tä lham iteläytej. ₁₄Tsi honhat tä y'ehina ihichet'a lhaka hupuy tä t'un yämthilek tiyäj'attsiy, mat y'alhaikhajyenhen yämthilek y'achäte hupuy tä ihichela. ₁₅Wet häp tä oyok, N'awunitpej Dios häp tä n'aisej Jesucristo, n'achaje t'awayhat tä häpe lhalhämtes tä y'awujyenej. ₁₆Yej p'ethatlä tä letach'otepej aiyhäj, tisipej m'ak tä i'amejen. Tsi häp täja m'ak tä Dios akäjejlhi tä n'amel y'achaje, inu'pe itshätäy tä õ'län.

₁₇Ch'ahuyayepej lhamel tä t'uyehen ahusey wet woye m'ak tä ifwel amhohen. Tsi tek iwo t'elakw'eta tä iyahin atapehen, häp tä ihanej tä Dios itetshanhila lechumet chik näm fwala tä lepes. Chik letach'ahuyaye lhamel, häpkhilek akäjejlhi lechumet. Mat chik lekachuyaye, lelhakli ihihila, wet niwohit m'ak chik aisej.

₁₈Alhyenpej n'oyehen Dios. Tsi kalelhäj tä olhamel otichunhayaj ihichet'a m'ak chik oyen on'äfwlhiya, wet wuj tä ot'uhläk is alhoho nilhokej m'ak tä owoye. ₁₉Lhäy'e lhip tä olhaip'altsen amehen chik let'alhyen n'oye Dios, yämthilek yachajo chik oi'amejen thahya.

_20-21Is chik Dios tä n'otamsek tälhe, iti amejen nilhokej m'ak tä is yämthilek lewoye lham lenech'ethayaj, wet is chik iwoyej n'amhihen m'ak tä ihuminche, häp tä isej Jesucristo. Dios inuhatphä Lhawuk Jesús tä tälho n'op'itseyhay, häp Tson'ataswo tä Lhamya, häp tä isej tä lhayachaje t'ilek, wet lew'oyis tä itsäyhchä yäm kalelhäj Dios lhämet tä hit'unteji m'ak tä inech'aynhi tä iwoye yämthilek tiyäj'attsiy. ¡Is chik najit lepesa tä lewujyaj iyej! Amén.

₂₂Ipuhfwas, olhaip'altsen amehen, teläytej wet chumlä olhämet tä nipitajana tä ot'uhläk okhajyen amejen. ₂₃Ohanhat amejen lhapuhfwa Timoteo tä pajche õhp'ohi, õ'nuhatphä athana. Chik nämla n'oye'thahya, olhäy'ehila chik oho amehen.

₂₄Ochene on'okhayaj nilhokej lhamel tä t'uyehen ahusey, lhäy'e nilhokej Dios leles iyhäj. Italia lheley ichen amehen len'okhayaj.

₂₅Is chik Dios lep'altsenyaj i'amejen nilhokej amel.