Häpet sacerdote Melquisedec
1-3Häp Melquisedec tä oyämetso niyatej p'ante hupuy tä lhey Salem, wet häte häpe Dios tä N'owujtaj laka sacerdote. Häp lhey tä yok, Melquisedec, häpe n'olhämet tä õyok, “Niyat tä Is Alhoho.” Wet tä äp niyatej hupuy tä Salem tä häpe n'olhämet tä õyok, “N'otamsek”, häp tä tamenej tä häpe Niyat tä N'otamsek tälhe. Wet nehit katsik ihanej ihi lajcha lhäy'e lako, lhäy'e letetsel p'ante tälhe, lhäy'e ifwala p'ante nichäthihchä, lhäy'e ifwala tä ileyej honhat. Wet häp täjtso, hätet iwoye Dios Lhäs, tälhettsiy tä häpe sacerdote, wet lepes ihichet'a.
Tä Abraham yäpil p'ante tä ileyej laka'tshayaj tä ikalhi niyatey tä ihi cuatro, Melquisedec yistejp'antehlä wet takäpfwayeje lakäpfwayaj tä is. Wet nilhokej m'ak tä Abraham ikalhi tä lewuk niyateytso, lham hiw'enho Melquisedec häp diezmo tä tälho. 4Tä mälhyejtso, lhek tetshanay Melquisedec p'ante, häpe hin'o tä lhamya tä len'ohyaj ihi, tsi tej tä lhates Abraham p'ante hiw'enho t'at diezmo.
5Häp Ley p'ante tälhe Moisés ne'tek lhamel tä häpehen sacerdotes tä tälhe Leví p'ante, tachumlä wichi laka diezmo, tej tä lepuhfwas wet äp tälhe Abraham, hätet iwoye lhamel. 6Melquisedec p'ante häpkhit'a Leví leles elh, w'enha lhamej, matkat lham tachum'atlä diezmo tä tälhe Abraham, wet äp y'isej tä takäpfwaye, tej tä Abraham häpe elh tä ikatej Dios lhämet tä kalelhäj tä pajche ifwenho. 7Wet nehit katsik ikachu tä elh che takäpfwaye elh, inu'pe elh tä lham takäpfwaye.
8Wet lhek yahinya, häp sacerdotes tä tälhe Leví p'ante wet tachumlä wichi laka diezmo, lepes iche tä iläyhen lhamel. Mat häp Melquisedec, N'olesaynek yäme tä lepes ihichet'a, iläy t'at. 9-10Wet tä Abraham hiw'enho diezmo häp Melquisedec tä yistejlä, hätet iwoye che Leví lhäy'e leles lhamtej hiw'enho. Tsi tej tä kamaj newachehen p'ante, mat hätet iwoye che ihi letes Abraham t'isan.
11Häp sacerdotestso tä tälhe Leví p'ante wet äp tälhe Aarón, häpe t'at p'ante lhamel tä Israel lhayis isej tä tachumlä Ley p'ante tälhe Moisés. Mat n'äl tä lechumet tä iwoye, ikalhihit'a tä hi'isyen wichi, tsi tä paj p'ante, wet iwatläk iche elh sacerdote tä hätet iwoye Melquisedec p'ante, nemhit häte iwoye Aarón lhayis p'ante. 12Wet che õ'wo iyhäja sacerdotes, häte iwohiyet'ak õknilanahi Ley p'ante tälhe Moisés wet õ'wo iyhäja. 13Wet häp Lhawuk tä N'olesaynhay tä N'ot'amajchetes p'ante yäme, lham tälhe t'at Israel lhayis iyhäj tä newache sacerdote che tälhe. 14Mälhyej tä wuj tä y'ahanej, Lhawuk tälhe t'at iyhäj tä Judá lhayis. Wet Ley p'ante tälhe Moisés yenhit'a p'ante lhämeta wichitso tä yen lhämeta häp sacerdotes.
Jesús häpe sacerdote tä hätet iwoye Melquisedec
15Tähestso lhäy'e lhip tä kalelhäj, tsi athana iche sacerdote elh tä hätet iwoye Melquisedec. 16Häp sacerdote tä nech'ayekna tälhiyet'a wichi tä Ley ne'tep'antek õ'tälhtho sacerdotes. Mat õyen häpeya sacerdote, tsi häp tä lew'atshancheyaj nittäya yämlek tiyäj'attsiy. 17Tsi häp täja tä Dios lhämet yämeje tä yok:
“Ahäpe sacerdote yämlek tiyäj'attsiy,
mälhyet iwoye Melquisedec p'ante.”
18Tä mälhyejtso, õ'tiyej kanhi n'olhämet p'ante ichun, tsi takhajayhit'a wet niwohit m'ak che iwoye, 19häp tä niwohit n'o'isyaj che tälhe Ley p'ante tälhe Moisés. Mat nech'e iche lhanihayaj tä lhäy'e lhip tä is, wet lhan'äyij ihi yämlek y'ahoye Dios.
20Wet täjtso Dios hit'untejche lhämet tä kalelhäj. Häp iyhäj sacerdotes, Dios tek hit'untejche lhämet tä yäm kalelhäj. 21Mat Jesús häp tä Dios hit'untejche lhämet tä kalelhäj, tsi ifwenho tä yok:
“Owoye olhämet tä ot'unhatche,
wet tek otäyhthila olhämet tä oyok,
Ahäpe sacerdote yämlek tiyäj'attsiy.”
22Tä mälhyejtso, Jesús häp tä yäm kalelhäj Dios lhämet tä hit'unteji m'ak tä inech'aynhi tä iwoye, inu'pe elh tä ichun.
23Wet häp sacerdotes iyhäj, wujpey lhamel tä iche p'ante, tsi elhpej y'il wet elh icheyäjopej lew'et. 24Mat häp Jesús tatäyhit'a yämlek tiyäj'attsiy. Tä mälhyejtso, lechumet tä häpe sacerdote ihichet'a elh che häpe che tachuma. 25Häp tä tamenej tä lepes ihichet'a tä ihanej iwoyneje che ifwayhthen wichi tä ihoye Dios, häp tä isej lham tä iwo len'äyija. Tsi najit lepesa tä iläy yämlek y'alhyene Dios häp lhamel.
26Wet häp Sacerdote tä Lhamya tä mälhyejna, häp tä y'awatlä. Lham häpe n'ot'amajchet, lech'isukyaj ihihit'a, ihichet'a m'ak at che häpe che ni'isa che iwoye, wet Dios wuj tä itonitphä tä itontehlä n'och'isukyaj kwenkay. 27Tek häte iwoye iyhäj sacerdotes, tä ifwalapej ichunkat lhamel lech'isukyajay tä ilänhenpe itshätäy, wet tä ileyej, nech'e wichi iyhäj lech'isukyajay tä ilänhenpe itshätäy. Mat häp Jesús, lham t'at tä lhaiwompe n'och'isukyajay, wet weihalhache wet tajlhame. 28Häp Ley p'ante tälhe Moisés yen häpeya Sacerdotes tä Lhamenya häp hin'ol tä lak'efwhayaj ihi t'at. Mat tä tajyäme Leytso, Dios iwoye lhämet elh wet y'isej tä hit'unhatche, wet häp tä yen häpeya Sacerdote tä Lhamya häp Lhäs Jesús. Wet Jesús wak'alhej t'at yämlek yenlhi lechumetna, tsi najit lepesa tä le'isyaj ihi.
