Oseas 14

₁Israel lhayis, tapilayej Awuk Dios,

amel tä hach'isukyajay tamen amejen

tä awit'äyhyaj ihi.

₂Tapilayeje Lhawuk häp alhyaj, oyaykwe:

“Täyhat n'oyejen nilhokej m'ak tä ni'isachehen.

Chumlä olhämtes häpkhilek oyachaj ame on'okhayajay.

₃Asiria nifwayhata olhamel,

wet ot'ekhahiyet'a yel'atas tä n'oka'tshayajchal.

Nemla oyen häpeya oka dios lhayis

häp m'ayhay tä olhamel olhenek.

Tsi ats'ilak t'at tä oalewuk

wet lep'altsenhen wichi tä laj lech'otyaja.”

₄Lhawuk yok:

“Ochesthiyeja lefwitseyaj,

otihiyeja ohumnhayaj,

tej tä kalhamelak letichunhayaj,

tsi otiyej kanhihlä owäkw.

₅Olhayenla iyasa'pe Israel,

wet lhamel tehlat iwoye hal'ä w'atshan tä tawoy,

wet lefwettsil t'unhihichela,

tehlat iwoye Líbano katayhi.

₆Lhachal lhaich'enhihila,

lesilatyaj tehlat iwoye olivos

wet lenij tehlat iwoye pänhichetek tä ihi Líbano.

₇Israel yachajihola tä õt'uyehen.

Tehlat iwoye yachuyaj tä lhaichiyhelit,

tawoyhila tehlat iwoye uva lhiley,

wet letoyaj ihihila,

tehlat iwoye hat'es tä tälhe Líbano.

₈Lhamel nemla lhay'aje n'ocheyälis.

Olham t'at tä otetshan oka wichi wet ot'uyehen.

Olham otet iwoye hal'ä tä w'atshan,

wet oka wichi itälhthila n'oye lakäpfwayaj.”

₉Is che wichi tä ihan honhatejen

lhäy'e iyhäj tä lehusey ihi

ihanej osilätyajna:

Lhawuk len'äyij häp tä is alhoho,

wet häp tä wichi tä isen inukwe t'at,

mat wichi tä ni'isahen tanhäphänwethä.