Oseas 2

₂Lhawuk yok:

“Amel tihi letes akoyay,

tihi letes tsi nemhit häpe och'efwa

wet äp nemhit ohäpe lech'efwa.

Is che ileyej tä iwo lakeyayej iyhäj hin'ol.

Is che lhaitontehlä lehumnhay tä yen tichunhayaja.

₃Che niwoynayejetso, wet ots'ilkathichela.

Otech'aynhiyeja täjte nech'e nichäthajchä.

Oyenla ts'anisa, oyäm tamchäy,

äp olänhiyeja neheläp.

₄Op'altsenhit'ala leles,

tsi häp tä lakain'owos.

₅Lako t'at tä iwo lakain'oyaja,

wet lhain'äfwlhatlhi.

Wet yok, Ohohiyela ohumnhay

häpkhilek hiw'enla n'oho olhäk wet inät,

okaw'ole wet ow'uy,

oka aceite lhäy'e oka hat'es.

₆“Häp tä tamenej tä

op'ohiyejila ch'uthanil len'äyij,

wet äp olafwiyejlhila n'olafwek

häpkhilek lajit len'äyija.

₇Fwetajlat ihänwethä lehumnhay,

mat ifwitshit'ala.

T'uhikwela mat nilhokhiyet'ala.

Nech'e yohlak, Oyäpnhiyela Hin'o tä ichun tä i'noyej,

tsi häp tä iste tä oiyej,

nitehiyat iwoye athana.

₈“Nitichunhit'ahlä tä olhamte

tä ow'enho yachuyaj lhay

wet hat'es tä uva t'i wet aceite,

wet äp olhamte tä oy'isejtet

lhip plata lhäy'e oro tä wuj laha,

wet yenejlhihte lecheyälis tä w'et t'ekhayehen.

₉Häp tä tamenej tä osohiyeja

oka yachuyaj lhay wet oka hat'es

che nichäte lewhäy tä n'olanyaj iche.

Wet onachajila lhame okaw'ole

lhäy'e wesaj täjte ow'uyyenhi.

₁₀Ow'enyenhiyeja lehumnhay tä ots'ilkatche.

Täjtso niwohit täjche ifwayhthiyeja otkwey.

₁₁Owohla lepesa lakäjyaj tä itihipej

ifwala tä yenpej käjyaja tä iwel'a tä nech'e,

lhäy'e tä n'ot'elakw'et,

lhäy'e nilhokej lakäjyajw'etes.

₁₂Wet häp lechumtes tä uvaw'etes

lhäy'e higos lhiley tä lham yopej,

Häp täja tä ohumnhay yen okahaya, -

olham Dios owasthihichela, oyenlat hon'ala,

itshätäy tä fwitses t'ekhawethila t'at.

₁₃Oyenla tesa täjmhaj yenpej n'okhayajayej lecheyälis

häp incienso tä iwunhomche,

wet lhaisilatyenejen lhamsilis lhäy'e lefwushis,

wet ihänwethä lehumnhay wet hip'ethet n'ohlä.

Olham tä ohäpe Dios tä wichi Lewuk

olhämet t'at täjtso.

₁₄“Äp oyachajihola tä oti lhamej ohumnek.

Ohänhiyela ts'anis,

ofwenhihola olhämtes tä ischehen.

₁₅Oyachajiyela lechumtes tä uvaw'etes,

wet honhat tä w'awulhchä tä lhey N'owit'äyhyaj

nech'e häpkhila n'oniwhayaj lepe.

Wet lham nichulhla n'oho,

tehlat iwoye täjte kamaj nech'efwaj tä thaläkw,

tehlat iwoye täjte nech'e tälho Egipto.

₁₆Che nichäte ifwalatso,

yenlat n'oye Elh tä iyej t'at,

nemla yen n'oye Ba'al.

Olham tä ohäpe Dios tä Lewuk

olhämet t'at täjtso.

₁₇Osohiyeja lak'aj tä iwopej lheya Ba'al,

häp n'owuk dios tä kamatache,

wet nemla yen lhämeta.

₁₈“Häp lewhäytso okänthiyejlhila Israel lhayis

itshätäy tä fwitses,

lhäy'e afwenchey, lhäy'e amlhätas.

Wet osohiyeja laka honhat häp n'oka'tshayaj

lhäy'e lechal tä häpe n'olutses lhäy'e n'ofwajnhates,

häpkhilek oka wichi iwot letamseka.

₁₉“Israel, oayenhiyela elh tä oiyej,

pajihit'ak ole amej.

Tsi ahäpe elh tä lhamya tä oiyej

tä yiwetche n'olhämet p'ante ichunya,

wet oalehumnek t'at, osohit'a amej op'altsenyaj.

₂₀Oayenhiyela elh tä oiyej,

olhay'amkatla amej,

wet häp tä letäfwenhila n'oyej tä ohäpe Awuk.

₂₁Olham tä Awukn'o oyok,

Che nichäte lewhäytso,

onchulhihola pule t'alhyaj,

wet pule nichulhihola honhat t'alhyaj,

wet ichenhiyela pelhay.

₂₂Wet honhat nichulhihola n'okäs t'alhyajay,

wet iwohla lhaya,

wet n'okäs nichulhihola Israel lhayis t'alhyaj.

₂₃Otihihila oka wichi honhat

wet Olewukla t'at lhamel.

Op'altsenla häp lhamel

tä õyennaj lheya Ka'op'altsenhaya,

wet otahuyhiyeja häp iyhäj

tä õyennaj lheya Ka'okawichiya.

Oyohlak, Amel nech'e ahäpehen oka wichi,

wet lhamel yohlak, Am nech'e ahäpe oka Dios.”