Oseas 8

₁Lhawuk yok, “Afwutche afwol,

atet iwoye elh tä iwo siläta wichi

tä lewit'äyhyaj ihichela.

Tsi lhamel iwohiyet'a olhämtes

wet nitch'ahuyaye ochufwenyaj.

₂Lhamel t'än n'o'pe wet yok,

Ontäfwel amej tä ahäpe Israel lhayis laka Dios.

₃“Tha Israel y'ulhan m'ak tä is alhoho,

häp tä tamenej tä letayhfwas takähännhiyeja.

₄Tä lhamel iwo laka niyateya,

lhamel t'at tä lewoynejek,

olham olhämethiyejt'a.

Wet tachuma plata lhäy'e oro

wet yenejlhi takwey lhenek tä t'ekhaye,

wet äp lhaihämthen t'at.

₅¡Oy'ulhan w'asetaj peyak

tä amel tä Samaria lheley len'okwiyayej!

Onchuwet amehenpe m'ak tä lewoyaye.

¿Chihlatek ahäpe wichi tä nem kok'ayehen?

₆¡Israel lhayis,

häp w'asetaj peyak tä ihi Samaria khit'a Dios!

Tälhet hin'o tä takwey lhenek,

mat wasihila.

₇“Israel lhayis itihchä leyalh lhayis,

wet tä wak'alh häpkhilek m'ak tä äytajche.

Niwohit m'ak che isej lakäs,

tsi y'ohihent'a.

Wet tejlak wak'alh,

tha honhat elh lheley äp lhamenla t'at che tuj.

₈Israel lhayis tet iwoye

n'olhäk tä õtuj, noj t'at.

Wichi iyhäj itech'aynej m'ak tä lajit lahaya.

₉Tsi häp tä lhamel ihoye Asiria,

tet iwoye asno tä nhana honhatej tä ifwi'petso.

Lhamel tiskanpe wichi iyhäj lech'otyaj,

tet iwoye hin'o tä iwo t'ewayhtesa

atsinhay tä lehumnhay.

₁₀Tha tej che iwopej t'ewayhata wichi iyhäj,

ch'ääj äp ohutlawek lhamel häpkhilek otasnhen.

Wet lhamel iteläythiyeja ayej m'ak tä äytajche

tä Asirio lhayis kaniyat tä lewujyaj ihi iwohiyejela.

₁₁“Israel lhayis yäm nitäkw

n'otw'ayhtesw'etes tä yenwethä

häpkhilek Dios itäyhthen lech'isukyajay.

¡Mat yen at lech'isukyajw'etesa!

₁₂Tej tä olesayen wujpe ochufwenyaj,

lhamel yene t'at m'ak tä w'enha lhamej.

₁₃Lhamel ihumin tä yen otw'ayhata

itshäwet tä ilän, wet äp tuj t'at.

Mat olham ohuminhit'a,

tsi tek okäjejlhi lhamel.

Ontichunhichela m'ak tä lhamel iwoye tä ni'isachehen,

wet oyenla tesa lech'isukyajay

tä oyachajiyela Egipto.

₁₄Israel yenchelhi lewukwey tä isis

tä häpe leniyatyajw'etes,

mat hip'ethetlä Elh tä lhenek.

Judá lhayis yenchelhi wujpe honhates

tä yen lelafweka tuntey.

Tha owunhihomchela lhamel lhäy'e Israel kahupuy,

häpkhilek nofwen.”