Oseas 9

₁Yej akäswethä, Israel lhayis.

Yej tiyäjlhaphä che ate iwoye wichi iyhäj,

tsi lewoyay akeya tä lewomay aka Dios.

Häp lewhäy tä lelanayhi achumtes, lekän lhoy,

lehumin tä lekatej laha

tä tälhe akeyis tä lewoye.

₂Häp wichi tä Israel

hiw'enhit'ala yachuyaj lhäy'e hat'es.

Laka hat'es tä nech'ayek nofwila.

₃Lhamel yäpnhiyela Egipto,

wet che ihihila Asiria,

tufwila n'olhäk tä kok'ayehen.

Nemla ihi laka honhat tä Lhawuk hiw'enho.

₄Nemla hiw'enho Lhawuk

häp hat'es tä yen t'ewayhata

wok itshäwet che ilän tä yen n'okhayajayej.

Wet lhäk tä tuj Lhawuk tek akäjejlhi,

elh at che tuj n'olhäktso kok'ahiyela.

Lhamel tufwila t'at n'olhäktso,

ihänhiyet'ala Lhawuk Lew'et.

₅¿Atsihila m'ak che lhamel iwoye

ifwala tä n'okäjyaj iche,

che häpe n'okäjyaj tä tälhe Lhawuk?

₆Oyok, ihanhiyejt'ala iwoyneje che iwo lakäjyaja.

Tsi tä lhamel ilethanlä letäyhyajay,

tha Egipto lheley tachumlahlä

wet tajänhichelahlä tä ihi honhat tä Menfis.

Lakäywetes chayotas tä hip'ohla'pe,

wet lew'etes ch'uthanilla che hip'okwe'pe.

₇¡Näm t'at ifwalas tä lewhäy tä n'otasnhayaj!

¡Näm t'at lewhäy tä ikathiyeja laha tä t'uhawetej!

¡Israel ihanej t'at tä taj lewhäy!

Amel lhoyay, “¡Häp profeta lechowej ihihit'a!

¡Häp hin'o tä n'okäpfwayaj ihi tektshanlhi!”

Tha m'ak tä tamenej tä amel lewoyayetso,

häp tä tapo amejen m'ak tä ni'isa

wet lhäy'e lhip tä len'äyiho Dios kasilätwos.

₈Dios itihi laka profeta häp Israel

häpkhilek lhamel nitekm'ahatawethä,

tha amel letihlä aka niyhäy len'äyhitaj.

Tej che ihi laka Dios Lew'et,

amel let'ulhan t'at.

₉Nemhit w'et iwoye amel awit'äyhyajay,

tet iwoye täjp'ante ihi Gabaa.

Mat Lhawuk yenla tichunhayaja

m'ak tä ni'isa tä lewoyaye,

wet yenla tesa amejen hach'isukyajay.

₁₀Lhawuk yok:

“Täjte onlhoke Israel lhayis, okäjejlhi,

tet iwoye tä hin'o nilhoke uvas

che iche tayhi tä ts'anis.

Amel achätilis ow'enejte

tä tet iwoye higos tä lakonkay.

Mat täjte lhamel ihoye Ba'al-peor,

wet lhayachaje m'ak tä hich'atej tä ni'isa,

lhayen w'et m'ayhaya,

lhaitech'aynej t'at lecheyälis

tä w'et yen lewuka.

₁₁Israel lewujyaj yikhilach'oye,

tehlat iwoye afwenche tä lhayämet.

Nemla iche leles tä nech'ehen,

äp nich'otshanhiyala,

han'äfwaj ilehiyejena t'at.

₁₂Mat tej che ichiyhelthen leles, osohiyeja,

niwohit elh che omälhthihila.

¡Äytajichela m'ak tä iyej lhamel che oyikch'oye!

₁₃Ifwalas tä pajche

ow'en tä tet iwoye hal'ä

tä õ'tihchä tä ihi lhip tä isphä.

Mat itonhiphäla leles

wet yachajiyela n'olänyaj.”

₁₄¡Iwuk, w'enho m'ak tä lew'enhihola!

¡W'enho lakahis tä niwoya lelesa!

¡W'enho t'aatey tä t'os nitälhaho!

₁₅Lhawuk yok:

“Nilhokej m'ak tä ni'isa tä iyej lhamel

tälhe täjte ihi Gilgal,

häp tä owo tesa tä oy'ulhan.

Lechumyajay tä ni'isachehen

häp tä tamenej tä ochenlach'oye oka honhat.

Nemhit ohumnhila lhamel

tsi laka niyatey fwitses.

₁₆Israel lhayis tamchäy t'at,

tet iwoye hal'ä tä lefwettsil hiy'esen

wet häpkhilek niwohiyat lhaya.

Tejlat che iwo lelesa,

mat olänhihena.”

₁₇Wichina tek tach'ahuye oka Dios.

Häp tä tamenej tä oka Dios y'ulhanhila,

lhamel niwethiyetpe honhat elh che häpe.