Isa 1

“Pule lhäy'e honhat,

is chik leläte olhämet, oyok,

Owo olesa wet oyäm thänhäy,

mat lhamel tatay n'ohlä.

₃Weyis nitäfwelej t'at hin'o tä lewuk,

wet asno nitäfwelej t'at lhäkw'et

tä lewuk hin'o tä lewuk.

Mat häp Israel tä häpe oka wichi,

letäfwnhayaj ihihit'a

wet ihanhiyejt'a olhämtes

tä one'tek iwoye.”

₄¡Awit'äyhyaj ihi, amel tä ach'isukwis,

häp wichi tä m'ak tä ni'isa tapoyej,

tä ahäpehen iyhäj tä lakeyis ihi

wet letsayhattshi m'ak tä lewoye!

Amel lhekch'oye Lhawuk

wet lhen w'et m'ayeka

Israel laka Dios tä T'amajchet,

wet lhäplej m'ak tä ni'isa.

₅Amel lelehiyejt'a tä letatayhlä Lhawuk,

wet imälhewek asan tä Lhawuk itiyej letasnhayaj.

Alätsek ihi etek

wet imälhewek akhajyhayaj noj t'at.

₆Tälhe apach'ol pajtha nichäte etek,

imälhewek asan tä ni'isa,

wet alätshay ihi tä õ'aipäjwethä.

Wet nehit katsik ilänej kacha

wok yäytejpe wesaj,

wok ilänej aceite yämthilek nem äytaj.

₇Aka honhat nech'e häpe t'at ts'anis

wet hupuy y'uhomche,

wet lew'en t'at tä atayhfwas

lhamel tufw t'at akäs lhay

tä ihiche alafwey.

Matche, wichi tä w'enha lhamej

yen ts'anisa aka honhat.

₈Tajlhama Jerusalén tä imälhehi,

hätet iwoye n'ohuplawet

tä ihi n'olafwek tä uvas ihi,

wet hätet iwoye n'owukwefwaj

tä ihi nelom lhiley,

wet hätet iwoye hupuy tä ihi lechowej

letayhfwas tä ilunej.

₉Wet chik Lhawuk tä lajit letumfwaya

nimälhtahi iyhäjfwas n'amel,

n'ahätehin'et iwoye honhates p'ante

Sodoma lhäy'e Gomorra, noj t'at.

_10-11Amel tä aniyatey,

¡ahätet iwoye Sodoma kaniyatey p'ante!

Amel tä awichi tä Jerusalén lheley,

¡ahätet iwoye Gomorra lheley p'ante!

Lhek ch'ahuyaye lhaka Dios lhämet

tä ichufwen amejen tä yok:

“¿Chipte tä wujpey itshätäy

tä lelänhen wet lechäj n'oye?

Oy'elej ch'unak lhayis tä lewunhomche

tä lefwetaj lhen otw'ayhata,

lhäy'e itshätäy tä yätajen t'alhä.

Ohuminhit'a w'asetas w'oyis,

lhäy'e tson'atas les w'oyis,

lhäy'e kayla les w'oyis.

₁₂Amel lehoyay n'oye,

¿mat atsi tä ne'tek let'äsi lhip

honhat tä ot'amajchet?

₁₃Leyej tä lechäjay n'oye

m'ak tä lajit lahaya

tä lefwetajay lhen otw'ayhata.

Wuj tä ilänn'o letutsaj tä tälho.

Amel let'änaye wichi

yämthilek iwo lakäjyaja

tä iwel'a nech'ayekpej,

lhäy'e ifwala tä n'ot'elakw'et,

mat wuj tä ilänn'o lakäjyaj

häp wichi tä ni'isahen.

₁₄Ohuminhit'a tä wichi iwo lakäjyajayej

häp iwel'a tä nech'ayekpej,

lhäy'e tä lhaihutpejwek

tä fwetaj n'okwi n'oyej.

¡Matche tä ilhaklitn'o, nemhit oteläytej!

₁₅Tä amel letichephä akweyey

tä lewoyay alhyaja, oyahinchettso.

Tej tä lhäm wujpey alhyajay,

otch'ahuhiyet'a, tsi ates ihi,

hätet iwoyek w'oyis t'at

tä ichehen akweyey.

₁₆¡Lej, alejchehen!

Tiyayej kanhi hach'isukyajay

häpkhilek nemhit ow'en.

Leyayej m'ak tä ni'isachehen tä lewoyaye

₁₇wet achufwenayej tä lewoyaye m'ak tä is.

Akhajyen tä lewoye m'ak tä is alhoho.

Ch'ote aelh tä lelhakli ihi,

woye m'ak tä chipenaj isej,

wet yej täyhat m'ak tä tesa isej.”

₁₈Lhawuk yokwe:

“Lhuyay wet n'ämawethä n'amhohen.

Tej tä hach'isukyajay wuj tä n'äl,

mat olejla, hätehlat iwoye

fwiy'et tä wuj tä ipelaj.

Tej tä hätet iwoye wesaj tä ichät,

olejla wet hätehlat iwoye

tson'ataj w'ole tä ipelaj.

₁₉Chik lehumin wet alhen häpeya

wichi tä iwoye olhämet,

letufwayhla lhay tä wuj tä is tä tälhe honhat.

₂₀Mat chik kawoyaye wet letatay n'ohlä,

let'inhihena chik õ'ailänhen

chik lhehi n'oka'tshayaj.”

Lhawuk lham t'at tä iwoyetso.

₂₁Ahäpehte honhat tä it n'oyej,

mat athana nemhit lhe n'oyej,

ahätet iwoye atsinha tä kain'oyaj länek.

Ifwalas tä pajche aka wichi

iwoye m'ak tä is alhoho,

mat athana ts'ilak t'at aläntses tä i'amej.

₂₂Ahäpehte m'ak tä laha ihi,

mat athana ahätet iwoye m'ak tä hup mok t'at.

Pajche ahätet iwoye hat'es tä wuj tä is,

mat athana ahätet iwoye inät t'at.

₂₃Aka niyatey lhayen Dios tayhfwasa,

etantses kalay'is t'at.

Lhaiwom'atpe chinaj t'äj,

wet iwatläk wichi iwo t'awayhtesa.

Tek tach'ote chipenhas,

wet yenhit'a tichunhayajak hip'altsen tesalis.

₂₄Häp tä tamenej tä

Lhawuk tä lajit letumfwaya,

häp Israel laka Dios tä takhajay, yok:

“¡Naya! M'ak tä otayhfwas iwoyej n'oye,

owohla ohayahlä lhamel.

₂₅Imälhehilawek häp okhajyhayaj

tä onuhiyeja amehen.

Owunhihola nilhok m'ak tä ni'isa tä i'amejen,

wet olejla nilhok akokhayaj.

₂₆Oyachajihola wet äp ihla amejen n'okalelhthayajwos,

hätehlat iwoye täjte pajche,

wet hin'ol tä ichufwenwethä iyhäj

äp hätehlat iwoye täjte nech'e.

Wet chik wak'alh chik oyenlhi,

äp yachajiholak õyen eya

Honhat tä n'o'isyaj lew'et,

wet Honhat tä iyej Lhawuk.

₂₇Wet m'ak tä is alhoho tä owoye,

ofwayhthihena wichi tä ihi Jerusalén,

häp lhamel tä iwo lehusey iyhäja.

₂₈Mat otäyhthila wichi

tä lech'isukyajay ihiche

tä lhayen otayhfwasa,

wet lhamel tä ile n'oyej y'inhihena.

₂₉Lehuminay tä lehoyayepej

hal'ätaj lhayis lhäy'e n'olafwey

tä lhen lew'etesa tä len'okwiyej

dios lhayis tä kamatachehen.

Mat han'äfwlhi ihla amejen

tä lewoyaye täjtso.

₃₀Tsi ahätehlat iwoye

hal'ätaj tä lew'ole tamchäy,

wet ahätehlat iwoye

n'olafwey tä lhele tamchäy.

₃₁Wet häp hin'o tä takhajay

hätehlat iwoye hup tä tamchäy,

wet lechumtes lak'ehen wet y'uhihomchela,

wet nehit katsik y'omatla.”