Isa 10

₁¡Awit'äy i'amejen,

amel tä lhenaywethä leyes tä ni'isa

tä ilhaklitwethä oka wichi!

₂Tek letach'ote wichi tä p'elitses

wet tek lewoyeje m'ak tä is alhoho,

wet lesoyejwethä lakäywet häp tesalis,

wet let'etane m'ak tä lewuk chipenhas.

₃¿Atsihila m'ak chik lewohiyela

häp ifwala tä n'otasnhayaj?

Chik lew'enayhlä tä tatay amehen awit'äyhyaj,

¿atsihila elh chik lehohiyela

yämthilek tach'ot amehen,

wet chihla letihi akäywet?

₄Ihichet'ala m'ak chik aisej,

tajlhamhiyelat chik letachettiyejche anowayhyaj

wet letan'isiyeja iyhäj tä õyen kwenkaya

lhäy'e iyhäj tä õ'länhen tä ihi n'oka'tshayaj.

Mat kamaj nofwit'a Lhawuk lewäk,

tujlhache t'at tä itiyej letasnhayaj häp amel.

₅Lhawuk yok, “Niyat tä ihi Asiria,

häp tä oyen oka hal'äya tä otasin oka wichi.

Häpe t'at hal'ä tä oy'ajej wichi tä owäk ihi.

₆Olham t'at tä one'tek inuye

wichi tä kahap'altsentsesa,

häp wichi tä iwäkwyhayenn'o.

One'tek isoyej nilhokej lakäywet,

wet one'tek t'äsiche lhamel,

tet iwoye iyhät tä iche hup kawayhil.

₇Mat häp niyattso tä lew'et Asiria,

letichunhayajit'a yämthilek iwoye täjtso.

Mat häp m'ak tä lham letichunhayaj,

t'uhläk iwasthiche hupuy

wet ilänhen wujpey wichi tä i'pe honhat.

₈Wet lham yok,

Nilhokej niyatey iwoye m'ak chik olhämet,

iwohiyet'a m'ak chik ka'olhämeta.

₉Häp honhat tä hupuy ihiche tä lhey Kalno,

otech'aynejte m'ak tä owoyeje Karkemis,

wet Hamat otech'aynejte m'ak tä owoyeje Arpad,

wet Samaria otech'aynejte m'ak tä owoyeje Damasco.

₁₀Okalhihte wichi tä wujpey lecheyälis,

inu'pe tä ihi Jerusalén lhäy'e Samaria.

₁₁¡Wet m'ak tä owoyejehte Samaria lhäy'e lecheyälis,

häpkhilek owoyeje Jerusalén lhäy'e lecheyälis!”

_12-13Mat Lhawuk yok:

“Chik oleyej tä owoye nilhokej m'ak tä owoye

tä i'pe chenaj Sión lhäy'e Jerusalén,

otihiyeja otasnhayaj häp Asiria kaniyat

tä lhaichäjejlhi m'ak tä iwoye,

wet otäyhthila len'ohyaj

tä lhaiwujyenej tä yok,

Wuj tä okhajyhayaj ihi,

ohäpe hin'o tä ihan m'akej,

ohanej at owoyneje

m'ak at chik häpek owatläk owoye.

Osoyejwethä wichi häp laka honhates,

wet äp osoyejwethä lakäywetes,

wet tä ohäpe khajnaj,

otäyhthen laka niyatey.

₁₄Wet lakäywetes tä osoyejwethä wichi it n'oyej,

wet ohut lhamej nilhokej honhates wet olewuk t'at,

tet iwoye hin'o chik tachuma

afwenche lhich'ul tä ihi lhup,

nehit katsik tafwayej otkweyey,

wet äp nehit katsik fwetaj tahuy chik yok,

Isit'a m'ak tä lewoye.”

₁₅Matkat Lhawuk yok:

“Hosan ihanhiyejt'ak fwetaj lhainuhatpe

hin'o tä ifwajej hal'ä.

Wok sierra ihanhiyejt'ak fwetaj lhainuhatpe

hin'o tä yistej hal'ä.

Wok häp n'otsut ihanhiyejt'ak lham tä yikhat

häp hin'o tä ichäjilhi takwey.”

₁₆Häp tä tamenej tä Lhawuk Dios tä lajit letumfwaya

ichenhiyela t'inhayaj häp lhamel tä takhajayhen,

wet imälhehilawek t'isan chik chayo.

₁₇Wet Dios tä N'ot'amajchet, Israel laka Isi,

nech'e häpkhila itäj,

wet ifwala weihalha hip'ohla nilhokej nawaj

lhäy'e ch'uthanil tä i'pe honhat.

₁₈Wet itäyhthila tayhi lhayis

lhäy'e n'olafwey tä isis,

tehlat iwoye hin'o tä imä katsi tä eyte y'inhi.

₁₉Wet imälhehihila lhimphaj hal'äy tä ihi tayhi,

tejlat chik han'äfwaj,

mat ihanhiyejak iwo t'ufwahtesa.

₂₀Chik nichäte ifwalatso,

Israel iyhäjfwas tä imälhehi,

häp lhamelhas tä tafwayej lewit'äyhyaj,

nemla lhaip'ajtej wichi

tä eyte ihämthiyej lhamel,

mat yämla matche tä lhaip'ajtej

Lhawuk tä häpe Israel T'amajchet.

₂₁Iyhäjfwas Israel lhayis

tapinhiyela Dios tä Takhajay.

₂₂Wet tej tä wujpey aka wichi, Israel,

tet iwoye holo tä iwhäye tewok,

mat tajlhamhiyelat iyhäjfwas

chik imälhehi chik tapil.

Tsi wak'alh t'at atäyhyaj,

tehlat iwoyek nitsäyphä

n'okalelhthayaj tä imälhewek.

₂₃Häp Lhawuk Dios tä lajit letumfwaya

lhaimälhthiyejawek yämthilek

yäm matche lhämet tä itiyej

nilhokej wichi tä i'pe honhat,

wet nofwila t'at.

₂₄Häp Lhawuk Dios tä lajit letumfwaya yokwe:

“Amel tä ahäpehen oka wichi tä lheyayhi Sión,

yej nowaye häp Asirio lhayis,

tej chik ailhaklitwethä

mälhyej iwoye Egipto lheley p'ante.

₂₅Tsi pitajit'ala ifwalas chik mälhhiyejatso,

wet olehiyeja owäk tä oti amejen.

Wet nech'e otihiyeja owäk häp Asirio lhayis,

pajla'tha noj lhamel.

₂₆Olham tä ohäpe Awuk Dios tä lajit letumfwaya,

otasnhila lhamel, mälhhiyeja iwoye

täjte olänhen Madián lhayis

tä ihi Tsetwo Kachenaj.

Wet ottayhlahlä Asirio lhayis,

wet lhamel hiw'enla tä wuj tä otkhajay,

mälhyej tä Egipto lheleyhte hiw'en tä ottayhlä.

₂₇Wet ifwalatso osohla amejen

m'ak tä äytajche tä lhamel iwoyej amehen,

wet ofwayhthila amejen lhamel lakhajyhayaj.”

Asirio lhayis nekhen wet inukwe Rimón,

₂₈wet nichäte Ajat wet inukwe Migrón.

Wet hin'äyhi m'ayhay tä lhamel tilhäj häp Mikmas,

₂₉wet yistho tewok lhip tä nipitofwa

wet iwo lakasthawetahi Geba.

Wet wichi tä lew'et Ramá lenowayhyaj ihi,

wet lhamel tä ihi Gabaa tä rey Saúl lew'et p'ante,

lhamel inukwe alhoho tä ilethanhen.

₃₀¡Bat-galim lheley, fwitsenayej tä let'änhen!

¡Ch'ahuye, Laisa lheley!

¡Chulhey, Anatot lheley!

₃₁Madmena lheley inukwephä, ilethanhen,

wet häp wichi tä ihi Gebim lhaiskathen.

₃₂Ifwalana nifwotaj takasthi Nob,

wet lhaiwaklhat wet yok:

“¡Mäh n'anuye chenaj Sión tä inu'pe Jerusalén!”

₃₃Mat lhek yahinya,

Lhawuk Dios tä lajit letumfwaya

lakhajyhayaj tä wuj ichätyenla katsi lhamel,

tehlat iwoye hal'ä lhachal tä õ'lanche.

Tej tä lhamel lhaiwujyen,

mat Lhawuk ithatla katsi,

tehlat iwoye hal'äy tä atoschephä.

₃₄Mälhhiyejat iwoye tayhi

tä tach'opway tä õyistejen hosan,

lhäy'e häp hal'äy tä isis

tä ihi chenhas tä Líbano,

tej tä atoschephä mat nichäthichela katsi.