Lewit'äyhyaj tä profeta yämeje Babilonia
1Häp tähesna Dios lhämtes tä tatayhlä Babilonia tä Dios ifwenho p'ante Isaías tä Amoz lhäs. Yokwe:
2“¡Neyhatphä bandera tä i'pe chenaj tä atojphä
tä häpe atetnekej n'oka'tshayaj!
¡Fwenho nifwotaj, is chik inuye letayhfwas!
¡Tiphä akwey häpkhilek lhamel
tiyäjchehen niyatey lepelis!
3Pajche ot'äne oka sip'äl tä häpehen ot'amajchetes,
häp lhamel tä yen at lakäjyaja tä okalhi otayhfwas,
häpkhilek lhamel lhayen lewosayej häp owäk.”
4Pitsaje n'ot'änyaj tä tume chenhas,
häp wichi tä wujpey tä lhaihutwek lepakas.
Wet Lhawuk tä lajit letumfwaya
lham t'at tä ilunche,
wet iwaklhatchä häp laka sip'äl
yämthilek iwo laka'tshayaja.
5Lhamel tälhe t'at honhat
tä lhäy'e lhip tä atofwey.
Wet Lhawuk lhäy'e nilhokej laka'tshayajchal
yämthilek iwasthi imälhewek häp honhat.
6¡Lhak'alwethä tsi tott'a alhoho
ifwala tä lewhäy häp Lhawuk,
häpkhilek lham tä lajit letumfwaya itäyhthen wichi!
7Wet nilhok wichi tä i'pe honhat
nemla takhajayhen häp takweyey,
nemla t'otle t'unhen.
8Wet wuj tä lenowayhyaj iyejen,
lhäy'e lelhaklis tä äyteschehen,
tehlat iwoye atsinha tä takapuhtshan.
Wet chik lhamel hiw'enla m'ak tä lewit'äyhyaj,
wuj tä t'iselthiyejena wet len'äfwlhi ihi.
9¡Lhek yahinya,
nech'e näm Lhawuk laka ifwala,
häp ifwala tä wuj tä ni'isa,
häp Lhawuk lewäk lhäy'e laka'tshayaj
tä hätet iwoye itätaj tä y'uho,
wet yenlat ts'aniya häp honhat,
wet ihämthiyeja wichi
tä lech'isukyajay ihi tä i'pe honhat!
10Wet katetsel lhäy'e iyhäj tä wus
tä ihi pule nemla isiche.
Wet ifwala häpet tä inuphä y'om t'at,
wet iwel'a nemla isi.
11Lhawuk yokwe:
“Owohla wit'äya honhat
wet otasnhila wichi tä letes ihi,
häp m'ak tä ni'isa tä iwoye tä omenyenej.
Ohämthila m'ak tä wichi lhaichäjejwethä,
wet oy'ayhthilahchä lhamel tä lhaiwujyenhen,
12wet wujit'ala'pe hin'ol tä i'pe honhat,
tehlat iwoye oro tä niwuja'pe.
13Chik nichäte ifwala tä wuj tä owo owäkwa,
tehlat iwoye itätaj tä y'uho,
osichäthilhila pule,
wet honhat yikhilach'oye lew'et tä ihi.
14“Wichi tehlat iwoye ch'iwase tä õ'hänlhi,
wok tet iwoye tson'atas tä ifwtsathi,
nehit katsik ihutlawek.
Elhpej yäpnhiholat honhat tä lew'et wet ilethane.
15Tsi elhlat chik õnlhoke, õ'hichäjiyeja tsonhat,
wet elh chik õ'katej, õ'länla.
16“Wet iyahnhila leles chik õ'tasnhiche honhat,
wet õ'tonhiphäla nilhok lakäywet tä ihi lew'et,
wet õhp'ajthichelahchä atsinhay tä lech'efwas.
17Lhek yahinya, olham onityenej Medo lhayis
yämthilek tatayhlä Babilonia.
Häpe wichi tä nitetshana chinaj t'äj,
wet tek tachumlä m'ak at chik häpe
chik õ'fwetaj õ'käntejlhi.
18Mat lech'ähal ilänhen mamses,
wet tek lep'altsenyaj itiyej nä'tshas
lhäy'e iyhäj tä nech'e ichehen.
19Babilonia häpe honhat tä wuj tä isilataj,
inu'pe nilhokej n'oniyatyajay tä i'pe honhat,
wet häp tä laka wichi
lhaichäjejwethä wet yen lewujyaja.
Mat tehlat iwoye Sodoma
lhäy'e Gomorra chik otäyhat.
20Wet nemla yachajok wichi ihi,
ihichet'ala hin'o chik häpe
chik t'uhlahläk yen lew'eta.
Wet Árabe lhayis nemla yen kasthaweta,
häte tson'ataswos iwohit'ala
t'elakw'etahi leläy.
21Tajlhamhiyelat itshätäy tä fwitses
chik yenla lew'eta,
wet wok'o lhayis lhäy'e ch'ustas
yenla lew'etesa häp hupuy,
wet wänlhäs ihihila,
wet ahät lhayis yenla lakoyweta.
22Wet asinhäs takas t'änlawethä
tä ihiche niyatey lewukwey,
lhäy'e m'awotas tä ihiche hupuy tä isis.
Tott'aye lewhäy lewit'äyhyaj häp Babilonia,
wujit'a'pe ifwalas tä tatäy.”
