Isa 14

¿Chipte tä nemya tanuhan

hin'o tä lhaichäjlhintaj?

¿Chipte tä nemhit m'ak iwoye

häp hin'o tä lhayen lhawuka?

₅Lhawuk Dios t'at tä yiset lakhajyhayaj

häp wichi tä ni'isahen,

wet hich'esajen len'ohyaj

häp niyatey tä lhaichäjwethä,

₆häp lhamel tä lefwitseyaj ihi

wet iwopej letasnhayajayej

wichi tä ihiche honhates,

wet iwo laka'tshayajayej

wet ilehiyejt'a tä ipäjwethä lhamel,

wet hip'ajtej katsi lewäk häp wichi,

wet t'ukwehen t'at

wet matche tä iwoyeje m'ak tä ni'isa.

₇Mat chik Lhawuk itäyhthen lhamel,

imälhewek honhat tä letamsek ihi

wet wichi t'änhen tä lakäjyaj ihi.

₈Y'aje hal'äy tä pino

lhäy'e pänhichetek lhayis

tä iche chenhas tä Líbano,

nilhokej yen käjyaja atäyhyaj wet yok,

“Tälhe tä attäy,

nemhit iche hin'o chik yisthen olhamel.”

₉¡N'op'itseyhay iläywethä

wet iho ahilä tä lenämho lew'et!

Lhamel inityen lhamejen wet yok,

“¡Lhek yahinlä Babilonia kaniyat!”

¡Wet niyatey tä n'op'itseyhay nechephä

tä tälhpe leniyatyajw'etes wet n'okwi amej!

₁₀Nilhokej lhamel yohlak,

“¡Häte am nemhit atkhajay,

wet nech'e ahätet iwoye olhamel!

₁₁Pajche õ'wujyen amej música,

mat athana lhehi n'op'itseyhay lew'et.

Athana amäwet lenij najut t'at

wet lhen haw'uya iwos.”

₁₂Ahäpe kates lhokwetaj tä ichunlä ifwala,

mat lechät honhate.

Häp am tä lekalhiche wichi tä ihiche honhates,

mat athana õ'aithat honhate.

₁₃Häp am tä leti amhi atichunhayaj tä lhok,

“Otiyäjla puleye,

otihihila oniyatyaj häp lhip tä atojphä,

oihiyeja katetsel tä lewuk Dios.

Oyenla ow'eta lhip tä tumej tafwojhiye

tä lhäy'e lhip tä atofwey,

oihla'pe chenaj tä dios lhayis lhaihuthiwek.

₁₄Otiyäjla w'echehi pule lhayis

tä lhäy'e lhip tä atoschephä,

ohätehlat iwoye Dios tä N'owujtaj tä Lhamya.”

₁₅Matche, lhek t'at, mat letiyäjit'a kaphä,

¡letiyäj honhatch'oye,

letiyäjo n'ot'ilek niyatyaj

tä lhäy'e lhip tä atojchä!

₁₆Wet häp n'op'itseyhay tä aiw'en

tä mälhyejtso m'ak tä i'amej,

tä lhamel aiyahin wet yohlak,

“¿Hä kahäpeya hin'o

tä nilhokej wichi tä i'pe honhat nowaye,

häp lham tä ilänhen wichi

₁₇wet yen ts'anisa honhat,

häp lham tä iwasthiche honhates

tä nitäkw hupuy tä ihiche,

wet tek inuhatchephä häp hin'ol

tä lham yen kwenkaya?”

₁₈Nilhokej niyatey tä i'pe honhat iwo t'elakw'etesa,

elhpej ihi t'at lep'itsekhi tä isilataj.

₁₉Mat am õ'aithatej kanhi

wet lhehihit'a n'op'itsekhi,

wuj tä a'tofwehlä,

ahätet iwoye basura tä kok'aye,

ahätet iwoye n'op'itsek chik õt'äsche

tä lep'akej wichi tä õ'länhen,

häp wichi tä y'inhen tä ihi n'oka'tshayaj,

n'op'itseyhay tä õ'that honhatch'oye tä tuntey ihi.

₂₀Tek ahätehla iwoye niyatey

tä õtjänlä lep'itseyhay,

tsi lekänchi aka honhat

wet lelänhen aka wichi.

Wichi tä ni'isa m'ak tä iwoye,

häpkhilek leles tatäy.

₂₁¡Awaklhathen yämthilek lelänhen leles,

häp tä lajchalis ilänhen wichi,

häpkhilek nemhit ilhaklit honhat,

häpkhilek nenawethä laka hupuy tä wus!

₂₂Yokwe häp Lhawuk tä lajit letumfwaya:

“Ohohiyela lhamel yämthilek ottayhlä.

Otäyhthila honhat tä Babilonia,

lhäy'e lhey, lhäy'e m'ak chik ihi,

lhäy'e wichi leles lhäy'e lechetsos.

₂₃Oyenla osekekchaya letäyhyaj

wet osekhiyeja kanhi.

Otech'aynhiyeja tewok potsek,

wet ch'ustas tapohiyeja honhat tä yen lew'eta.

Olham tä ohäpe Awuk Dios olhämet täjtso.”

₂₄Lhawuk tä lajit letumfwaya

hit'unhatche lhämet tä yok:

“Matche olhämet,

m'ak at chik häpek owatläk owoye, ihichela.

M'ak at chik häpek wak'alh

tä owohiyela, mathichela.

₂₅Otäyhthila wichi tä Asirio lhayis tä ihi oka honhat,

op'ajthilahchä tä ihi oka chenhas,

wet lhamel nemla yen kwenkaya oka wichi,

wet osohiyeja m'ak tä äytajche

tä Asirio lhayis iwoyeje.

₂₆Häp täjtso m'ak tä ot'uhläk owoyeje honhat.

Pajche otkwey i'pe nilhokej wichi tä ihiche honhates.”

₂₇Täjtso wak'alh t'at tä Lhawuk

tä lajit letumfwaya iwohiyela,

wet nehit katsik n'äyhiyejola.

Pajche ipiyen takwey wet nehit katsik yohlak:

“Is chik leleche m'ak tä let'uhläk lewoye.”

₂₉Filisteo lhayis, yej wo akäjyaja amejen

tä yikhen wichi tä ailhaklit.

Tsi tej tä tajyäme amlhätaj,

mat nämla amlhäj tä fwitsaj,

wet äp ihichela elh chik lhayenla

häpeya m'akitaj tä wey'älhi.

₃₀Wichi tä p'elitses lhäk ihihila olafwey,

wet häp iyhäj tä t'ukwe m'ak chik isej,

letamsekis ihihila.

Mat häp amel aka wichi olänhiyejena nehläs,

wet otäyhthila aiyhäjfwas tä imälhehi.

₃₁¡Is chik letafwchehchä,

amel Filisteo lhayis tä lhehi hupuy!

¡Is chik let'änwethä

wet letachettichehen tä lenowayhen!

Tsi nifwotaj nek t'at,

hätet iwoye tutsaj tä wuj tä tälhche tafwojhiye,

wet lhailhokon alhoho tä nekhen.

₃₂¿Atsihila ilhämet chik y'awoyehlä

Filisteo lhayis kachenhay?

Y'ohlakwe, “Lhawuk ikhajyen t'at häp Sión,

wet laka wichi tä lelhakli ihi yenla leletnhaweta.”