Isa 17

Damasco nemla häpe hupuy,

mat hätehlat iwoye honhat chik õ'hutwek.

₂Nemla wichi ihi pajla'tha tiyäj'attsiy.

Tajlhamhiyelat hup tä itshätäy lhäk chik i'pe honhat,

wet itshätäy iwohlat letamsekahi tä t'ekwethä.

₃Israel nemla iche hupuy tä takhajay

tä lelafwek tä tuntey ilunej.

Wet Damasco nemla leniyatyaj ihi,

wet iyhäjfwas tä imälhehi Aram

tan'isiyeja Israel lhayis.

Lhawuk tä lajit letumfwaya

yäme tä mälhhiyejatso.

₄Wet häp ifwalatso

Israel lewujyaj nemla lakhajyhayaj ihi,

wet nemla hiw'en m'ayek tä pajche ikalhi.

₅Hätehlat iwoye yachuyaj

tä hin'o tachumahen lhay tä ilanhi,

iche iyhäj tä natchä,

mälhyej tä wichi iwoye

tä ihi chenhas kawayhi tä lhey Refaím,

₆tajlhame m'ak tä natchä tä imälhehi lew'et.

Wok hätehlat iwoye olivo lhile

tä õy'ajejo hal'ä, lhainatchä,

tajlhamat dos wok tres lhay

tä imälhehi tä ihi lhachal lepesey,

wok elat iche cuatro wok cinco lhay

tä nilhok tä imälhehi lhile.

Lhawuk tä Israel laka Dios

yäme tä mälhhiyejatso.

₇Wet ifwalatso wichi nech'e lehusekhilach'oye

Hin'o tä lhenek tä häpe Dios tä Israel T'amajchet.

₈Lhamel ilehiyeja tä itetshan altares,

wok m'ayhay tä takwey lhenhay,

wet nemla itetshan hal'äy

tä dios tsinha tä lhey Asera lepeykas,

wet nemla ihoye altares

tä õ'ti'pe incienso tä õ'wunho

tä õyen n'okhayajayej dios lhayis tä kamatachehen.

₉Ifwalatso wichi yikhilach'oye honhates

tä lep'ot n'olafwek tä takhajay,

mälhhiyeja iwoye Hiv lhayis

lhäy'e Amorreo lhayis

tä yikch'oye p'ante laka honhates

tä lhamel nowaye Israel lhayis,

wet nech'e ts'anis t'at.

₁₀Amälhhiyejatso,

häp tä lep'ethatlä Dios tä aifwayhat

wet lhenhit'a atichunhayaja

tä lham häpe aletnhawet tä takhajay.

Tä mälhyejtso, letutchey wet is,

wet lewujyenej dios tä kamatache,

₁₁wet tälhe ifwala tä letutchey,

let'uye t'at pajtha inuphä letälhes tä ifwala elh.

Matkat chik näm m'ak tä ilän tä newache kacha,

tatäy t'at yachuyaj.

₁₂¡Lhek ch'ahuyaye lepak häp wichil tä wujpey,

hätet iwoye lewomekitaj pak tä äytajche!

Häpe t'at wichi tä tälhomche

honhates tä iwo laka'tshayaja,

hätet iwoye inät tä fwitsaj lepak.

₁₃Matkat chik Dios ifwone lhamel,

inuhikwela alhoho wet yikhen,

hätehlat iwoye hup chik yafwthitaj ichäj,

wok hal'ä lhawo chik wey'ä.

₁₄Wet tä honaj n'äl tä matche tä fwitses,

matkat tä nech'e fwala nemhit ichehen.

Häp täjtso lakapes wichi

tä iso n'amejen lhakäywet.

Nofwej t'at lhamel tä n'aiwit'äyen.