Isa 2

₂Häp ifwalas tä ilepese,

häp chenaj tä Lhawuk Lew'et i'pe

häpkhila chenaj tä inu'pe

nilhokej chenhas tä atoschephä,

wet õyenla häpeya chenhas laka niyat.

Wet nilhokhiyeja wichi tä i'pe honhat nämhiyela.

₃Wujla'pe wichi tä yohlak,

“Mäh n'ekhen,

n'ahoye Lhawuk laka chenaj,

häp Jacob laka Dios Lew'et,

häpkhilek lham tä ichufwenla n'amejen lhämtes

yämthilek y'awoye t'at.”

Tsi Lhawuk lechufwenyaj tälhiyela Sión,

wet lhämtes tälhihola Jerusalén.

₄Lhawuk itetshanhila m'ak tä iyej

wichi tä i'pe honhat,

wet isyenla alhoho.

Wet lhamel lefwajnhates yenla häpeya

lechumetcha tä isajeji lakäsw'et,

wet lehunis yenla häpeya

lechumetcha tä yistejen hup.

Nemla iche wichi chik

tachumhiyela laka'tshayajchal

yämthilek ilänejen iyhäj,

wet nemla lhaichufwenejen n'oka'tshayaj lakey.

₅¡Israel lhayis, mäh n'ekhen

tä y'ehi Lhawuk laka isi!

₆Iwuk, leleyej aka wichi Israel tä Jacob leles,

häp tä lhamel ihumin wet iten t'at

wichi tä tälhche tä ifwala tälhche

lakeyis tä lhamel iwoye,

wet lhayen han'ältshantsesa,

mälhyej iwoye Filisteo lhayis,

wet lhamel lhaip'ajtej t'at

wichi tä w'enha lhamej.

₇Häp oro lhäy'e plata tapoyejej honhat

wet lepes ihichet'a lakäywet.

Wujpe yel'atas lhäy'e kaletas

tä n'oka'tshayajchal tä ihi honhat.

₈Häte n'ocheyälis tapoyejej honhat,

wichi n'okwiyej dios lhayis tä takwey lhenhay.

₉Wet mälhyejtso tä lhamel t'ayhchä

wet nemhit laha ihi.

¡Yej täyhtej letes!

₁₀Chik wichi hiw'enlä Lhawuk chik nämla,

y'uyhihomchela chenhas tä lhamel nowayhen,

wet y'uyhihola honhat tä lhaiskatlä

Lhawuk lewujyaj tä isi.

₁₁Wichi tä lhaiwujyen

lhäy'e iyhäj tä fwetaj lajit letumfwaya,

n'äfwelhihena.

Ts'ilakhila Lhawuk chik wichi iwujyen häp ifwalatso,

₁₂häp ifwalahilak Lhawuk tä lajit letumfwaya

tatayhlä wichi tä lhaichäjwethä,

wet y'ayhthilahchä hin'o tä lhaiwujyen.

₁₃Matche, Lhawuk tatayhlahlä

wichi tä fwetaj laha ihi,

tet iwoye pänhichetek tä tälhe Líbano,

häp hal'äy tä atoschephä,

wok hal'ätaj tä is tä tälhe Basán.

₁₄Wet tatayhlahlä wichi tä fwetaj

tet iwoye chenhas tä atoschephä,

₁₅lhäy'e lhamel tä fwetaj

tet iwoye hupuy tä atoschephä,

wok n'olafwey tä tach'opwayhen,

₁₆lhäy'e wichi tä fwetaj

tet iwoye barcos tä wus lhäy'e tä isis.

₁₇Wet häp lhamel tä lhaiwujyen,

lhäy'e häp wichi tä fwetaj lajit letumfwaya,

Lhawuk y'ayhthichelahchä.

Tajlhamhiyelat Lhawuk chik õ'wujyen häp ifwalatso,

₁₈wet ihämthiyeja nilhokej dios

tä n'otkwey lhenhay wet nemla ichehen.

₁₉Chik wichi hiw'enlä Lhawuk chik nämla

wet yäm tapoyejej honhat häp n'onowayhyaj,

lhamel y'uyhichehena chowhay tä ihiche chenhas

tä lhamel nowayhen,

wet y'uyhichehena chowhay tä ihi honhat

tä lhaiskatlä Lhawuk lewujyaj tä isi.

₂₀Häp ifwalatso hin'ol tafwomhiyeja

dios lhayis tä oro lhäy'e plata

tä yenlhi lhamhohen yämthilek n'okwiyej,

wet ithathiyela ama lhayis lhäy'e asus lhayis.

₂₁Chik lhamel hiw'enlä Lhawuk chik nämla

wet yäm tapoyejej honhat häp n'onowayhyaj,

lhamel y'uyhichehena chowhay tä ihiche chenhas

tä lhamel nowayhen,

wet y'uyhichehena chowhay tä ihi honhat

tä lhaiskatlä Lhawuk lewujyaj tä isi.

₂₂Tä mälhyejtso,

leyej tä lefwetajay aisej hin'ol,

tsi iwet t'at tä iläyhi.

Niwohit m'ak chik tamenej

chik lefwetaj lewujyen.