Isa 25

₁Iwuk, ahäpe oka Dios.

On'okwi amej wet oaiwujyen,

tsi wuj tä isen m'ayhay tä lhenwethä,

pajche tä lewaklhat wet tatäyhit'a.

₂Leskon katsi häp honhates tä wus,

hätet iwoye tuntey tä õ'iskon,

wet hupuy tä takhajayhen nemhit is.

Lewasthiche lewukwey häp otayhfwas kaniyatey,

wet nehit katsik inech'aynhihila.

₃Wet täjtso häp tä tamenej

tä wichi tä takhajayhen aiwujyen,

wet wichi tä fwitses tä ihiche honhates yohlak:

“Oyenek matche tä häpe Dios.”

₄Tsi ahäpe Dios tä hin'o tä p'elitsaj

isej tä iho ame,

wet äp let'uye t'at

elh tä lelhakli ihi tä iho ame.

Iche pelhay tä fwitsaj,

mat ahäpe hup tä n'oletnhawet,

wet wuj tä chayokwe,

mat ahäpe hupel tä hin'o isej.

Tsi m'ak tä iwoye hin'ol tä fwitses

hätet iwoye tapinhitaj tä taj hup,

₅wok hätet iwoye nahayoj

tä taji honhat tä tamchäy.

Mat am lefwone wichi tä otayhfwas tä t'änwethä,

hätet iwoye tä lechen pule,

tä näm noj t'at tä chayokwe.

Matche, lene'tek yok tam

häp hin'ol tä fwitses.

₆Lhawuk tä lajit letumfwaya

iwaklhatho wichi tä ihiche nilhokej honhates

häp n'okäjyaj tä i'pe chenaj Sión.

Ihichela n'olhäk tä wuj wet äp akäj,

lhäy'e hat'es tä lhäy'e lhip tä is.

₇Wet ihla'pe chenajna Lhawuk iwasthihila

lep'ot tä hip'o'pe nilhokej wichi.

₈Lhawuk itäyhthila n'ot'ilek wet nemla iche.

Nilhokej wichi Lhawuk ilejla tatet'ilis,

wet itäyhthiyeja n'oläkwyhanyaj

tä õ'tiyej nilhokej laka wichi tä i'pe honhat.

Lhawuk lham t'at tä iwoyetso.

₉Wet ifwalatso wichi yohlak:

“Häp täja n'amel lhaka Dios,

y'at'ekhaye wet n'aifwayhthen.

Häp täja Lhawuk tä y'at'ekhaye.

N'awo lhakäjyajayej,

tsi lham t'at tä n'aifwayhthen.”

₁₀Lhawuk t'uhiyela chenaj Sión.

Mat õt'äsihila Moab lheley,

hätehlat iwoye hup mok tä õt'äsche tä õ'wom.

₁₁Lhamel tach'awla'petso,

hätehlat iwoye hin'o tä t'ilin,

wet tä nich'olewethä t'aylhatchä.

₁₂Lhawuk ithatla katsi lelafwey tä tuntey

tä atoschephä wet äp tach'opwayhen.

Iwasthihichela wet iskonla honhate.