Isa 28

₁¡Lewit'äy ihi Samaria,

honhat tä wuj tä Israel wujyaj!

Laka wichi lhaiwujyen wet w'oknhas t'at.

Itiche'pe lhethey häp hal'ä lhawol tä isis

tä lhaichihelthen tä ihi laka honhat tä isilataj.

¡Mat tamchäyhla t'at,

hat'es tä ilänhen wet lewujyaj noj!

₂Lhek yahinya,

Lhawuk iwaklhat hin'o tä takhajay,

tet iwoye pelhay kalatu,

wok tapinhitaj tä iwasthiche m'ayhay,

tet iwoye pelhay tä wuj,

wok inät tä hip'o'pe honhat, wuj tä ni'isa.

Wet ithatlahchä honhate lhamel tä lhaiwujyen,

₃wet t'äsichela lhamel tä hat'es länhay.

₄Lhamel itiche'pe lhethey

häp hal'ä lhawol tä isis

tä lhaichihelthen tä ihi laka honhat tä isilataj.

Wet tehlat iwoye higos

tä nichäte lewhäy tä y'o,

wichi hiw'en wet tachuma wet tufw, nofw t'at.

₅Wet ifwalatso Lhawuk tä lajit letumfwaya

häpkhila Niyat tä lewujyaj ihi.

Tehlat iwoye hal'ä lhawo tä wuj tä isilataj

tä iyej laka wichi tä imälhehi.

₆Wet hiw'enhihola lehusey tä is

häp n'okalelhthayajwos chik iwo lakalelhthayaja,

wet hiw'enhihola lakhajyhayaj

häp nifwotaj tä tatayhlä letayhfwas.

₇Iche iyhäj tä hat'es iwetahathen

wet matche tä lhaich'isukyenejen.

Häpe t'at sacerdotes lhäy'e profetas tä wetahen.

Lhamel matche tä lhaich'isukyenejen

hat'es wet lhailänejen.

Wet profetas tan'aj'atwethä

wet nemhit kalelhäj lew'enay,

wet sacerdotes w'oknhas t'at

tä fwetaj iwo lakalelhthayaja.

₈Wet lech'uyhtes tä kok'aye ichetpe laka mesas,

imälhewek lew'et tä kok'aye.

₉Wet lhamel yäm n'oye wet yok:

“¡Lenäm tä lefwetaj lechufwenej olhamel

m'ak tä Dios ipäyen ame!

¡Mälhyej chik ohäpehen nä'tshas tä lelemsas

₁₀chik nech'efwaj chik lhaichufwenej

tä yahyen n'olesaynhay:

wa, we, wi, wo, wu!”

₁₁Tä mälhyejtso,

chik wichina nitch'ahuyay n'oye,

Dios iwohiyejela lhamel

häp n'olhämet tä atha,

n'olhämet tä w'enha lhamej.

₁₂Pajche p'ante ifwenhomche lhamel letamsek wet yok:

“Is chik elh tä y'el iwo t'elakw'eta.”

Mat lhamel tach'ahuhiyet'a.

₁₃Häp tä tamenej tä Lhawuk itech'aynhiyeja

nä'tshas tä lelemsas chik tahuyej,

tet iwoyek nech'efwaj tä lhaichufwenej

tä yahyen häp n'olesaynek.

Wet chik fwetaj yik,

lechäyi tan'aji honhat,

lewit'äy ihihila,

wet nichäthihola n'otkanyaj,

wet õ'tsoklawethä.

₁₄Tä mälhyejtso, ch'ahuyaye Lhawuk lhämet,

amel, hin'ol tä aläkwyhantses,

häp amel tä alhenay niyatayej

wichi tä ihi Jerusalén.

₁₅Amel lhoyaykwe:

“Pajche owoyeje olhämet

tä ot'unhatche häp n'ot'ilek,

tä olhamel owohiyela m'ak chik ne'tek owoye

häp n'ot'ilek niyatyaj,

häpkhilek näm n'owit'äyhyaj

tä lhäy'e lhip tä ni'isa,

mat ilänhit'a n'ohen,

tsi oisej t'at olhämtes tä kamatache

lhäy'e otkanyaj tä owoye.”

₁₆Wet häp tä tamenej tä Lhawuk Dios yokwe:

“Lhek yahinya, otihi Sión tunte

tä häpe tunte tä lhamya,

häp tunte tä ottshupiye lhäy'e tä wuj laha,

wet oyenla lefwetesa m'ak tä owoye.

Wet elh chik t'ekhaye häp tä letamsek ihi.

₁₇Wet olhenekna otshupyenhiyejahchä

häp m'ak tä is alhoho.”

Lefwetaj aisej ämtes tä kamatachehen,

mat nämla m'ak tä äyteschehen wet aiwasthihila.

Lefwetaj aisej akanyaj tä lewoye,

mat nämla awit'äyhyaj tä wuj wet attäy.

₁₈Õ'täyhthila ämet tä let'untejche n'ot'ilek,

wet tä lefwetaj letach'ote n'ot'ilek niyatyaj,

laha ihihit'ala.

Chik nämla n'owit'äyhyaj

tä lhäy'e lhip tä ni'isa,

t'äsila amchehen.

₁₉Wet häp tä mälhhiyejattso,

chik nämpej ichäj t'at amel.

Nilhokej ifwalas lhäy'e nilhokej honatsis tä nämhipeja,

wet tejlak tajlhamat tä lehanch'oye,

mat lechettiche t'at.

₂₀Tehlat iwoye hin'o tä imä'pe n'omäwet tä nipitaja

wet fwetaj lhaikäfwnhi lew'uy tä nitsajaho.

₂₁Lhawuk iwohla lewäka,

mälhhiyeja iwoye täjp'ante

i'pe chenaj tä lhey Perasim,

wet lhaikhajyenla,

mälhhiyeja iwoye tä ihi p'ante Gabaón.

Lham iwohiyela m'ak chik iwoye,

wet yenhilhila lechumet tä wuj tä w'enha lhamej.

₂₂Tä mälhyejtso, yej tiyej aläkwyhanyaj,

häpkhilek niwujak äytaj

m'ak chik iwoyej amehen.

Tsi oläte t'at Lhawuk Dios tä lajit letumfwaya

tä wak'alh t'at lhämet

tä itäyhthila mälhewek honhat.

₂₃Wo atamsekisa, tetshan m'ak tä oyäme,

äm matche tä letach'ahuye olhämtes.

₂₄Oyok, chik n'utchenaj tutchey,

chunkat isaji honhat,

iwasthiche honhat tä imälhechewek,

iwom hal'ä fwettsil tä i'pe honhat.

₂₅Wet tä wak'alh, itsäype

m'ak tä lhey eneldo lhoy wok comino,

wet äp itihchä trigo tä ifwilhkatchä,

wet itichehen lakawayhil cebada lhäy'e centeno.

¿Hä matche?

₂₆Dios t'at tä ichufwenej

m'ak tä is chik iwoye.

₂₇Wet eneldo lakeyhit'ak õt'äsi,

wet tek õy'äsayenche kaletaj häp comino,

mat eneldo õ'sichäteji hal'ä,

wet comino õ'tasneji hal'ä pes.

₂₈Mat häp trigo häp tä õt'äsi tä õ'lanhi t'ähes,

wok õy'äsayenche kaletaj,

mat tek õ'wasthiche lhoy.

₂₉Nilhokej n'ohanyajayna tälhe t'at

Lhawuk tä lajit letumfwaya.

Yenpej tichunhayaja m'ak tä iwoye,

wet ihanej iwoyneje yämthilek yäm wak'alh.