Isa 3

₁Lhek yahinya,

häp Lhawuk Dios tä lajit letumfwaya

isohiyeja wichi tä ihi Jerusalén lhäy'e Judá

nilhokej häp m'ak tä isej.

Isohiyeja lhäk lhäy'e inät,

₂wet nemla ichehen hin'ol tä takhajayhen,

lhäy'e iyhäj tä sip'äl,

lhäy'e n'okalelhthayajwos,

lhäy'e profetas,

lhäy'e han'ältshantses,

lhäy'e hin'ol tä thänhäy.

₃Nemla ichehen sip'äl kaniyatey,

lhäy'e hin'ol tä len'ohyajay ihiche,

lhäy'e hin'ol tä ichufwenwethä iyhäj,

lhäy'e hin'ol tä mago lhayis,

lhäy'e hin'ol tä hiyawul.

₄Wet Lhawuk yenla niyateya hin'ol mamses,

wet tektshanwethä lhayis

lhayenla niyateyayej wichi.

₅Wet wichi tatayhlawek wet lhailhaklithen.

Hin'ol mamses yenla ch'isukwisa hin'ol tä thänhäy,

wet iyhäj tä w'et m'ayhay yenla ch'isukwisa

hin'ol tä len'ohyajay ihiche.

₆Ihichela iyhäj chik tahuyej lepuhfwa wet yohlak:

“Ach'athiyejt'a, haw'uy ihi t'at,

is chik alhen olhamel oka niyata.

¡Tetshan lhaw'etes tä wasichena

wet p'altsen n'ohen!”

₇Wet elh nichulhihola wet yohlak:

“Olham okalhihit'a

chik o'isyenla m'ayhay tä ni'isa,

tsi ohäpkhit'a hin'o tä hiw'en m'ayek.

N'am w'enhit olhäk

wet n'am w'enhit wesas.

¡Yej lhenay aka niyatan'o!”

₈Matche, Jerusalén tatäy t'at

wet Judá lewit'äyhyaj ihi,

tsi wichi lhämtes lhäy'e lakeyis

tatayhlä Lhawuk wet ikachuye lewujyaj.

₉Tä lhaichäjwethä, n'äl tä letes ihi,

n'äl t'at lech'isukyajay tä iwoye,

hätet iwoye Sodoma.

Nilhokej wichi tä i'pe honhat

hiw'en t'at m'ak tä lhamel iwoye.

Tamen lhamejen tä lewit'äyhyaj ihi.

₁₀Dios lakäpfwayaj tä is iyej t'at hin'o tä is,

wet isila nilhokej m'ak tä iwoye,

wet ikalhihila m'ayhay tä isen

tä tälho lechumtes tä iwoye.

₁₁Lewit'äyhyaj ihi hin'o tä ni'isa,

isit'ala alhoho, tsi Dios iwohla lahayayej

m'ak tä ni'isa tä iwoye.

₁₂Wichi tä ilhaklit oka wichi, mamses t'at,

wet atsinhay tä lhayen niyatayej häp lhamel.

Amel tä ahäpehen oka wichi,

aka niyatey ikan amejen wet aiwetahathen.

₁₃Lhawuk iwaklhat t'at

tä yenla tesayej laka wichi

häp m'ak tä lhamel iwoye.

₁₄Lhawuk itetshanhila

häp hin'ol tä thänhäy

lhäy'e wichi kaniyatey,

wet ifwenhihola lhamel wet yohlak:

“Amel lewasthi olafwek,

wet let'etane m'ak tä lewuk iyhäj tä p'elitses

wet letichechufwi awukwey.

₁₅¿Chipte tä lelhaklit oka wichi

wet tek lep'altsen iyhäj tä p'elitses?”

Yokwe häp Lhawuk Dios tä lajit letumfwaya.

₁₆Lhawuk äp yokwe:

“Häp atsinhay tä ihi Jerusalén

lhain'älit tä lhaichäjwethä.

Tä ilunhen, n'äl t'at

tä lakain'oyaj ihiche tatey.

Tä yik, takatintshi t'at,

ihumin t'at tä m'ayhay

tä yäytejen takäläy y'iphen.

₁₇Häp tä tamenej tä olänhiyejena chesoy

pajla'tha lhethey isatwethä,

wet on'äfwlhatlawethä.”

₁₈Chik nichäthiyela ifwalatso,

Lhawuk itäyhthila nilhokej m'ayhaytso

tä yäytejen takäläy,

lhäy'e m'ayhay tä wuj laha

tä lhaisilatyenejen tä yen lhamsilisa,

₁₉lhäy'e lech'ote lheley,

lhäy'e takwe t'akay,

lhäy'e wesas tä hip'oyejche'pe lak'as,

₂₀lhäy'e lhetekp'otes,

lhäy'e takäläy t'akay tä cadenas lesas,

hätet iwoye yel'ataj tä õyäyit takweyey,

lhäy'e lakawakay tä isis,

lhäy'e m'ak tä lenij akäjche,

lhäy'e m'ayhay tä yen suertechaya,

₂₁lhäy'e lefwushis,

lhäy'e lenhus lheley,

₂₂lhäy'e lew'uyis,

lhäy'e lew'uyis tä lakäjyajchal,

lhäy'e pañuelos,

lhäy'e lakhäyhis,

₂₃lhäy'e leyanthis,

lhäy'e wesas tä isis,

lhäy'e lhetek t'akay.

₂₄Wet m'ak tä lenij akäjche tä y'ilen lhamejen,

nech'e häpkhila m'ak tä lenij najutche,

wet nemla iwo lakawaka,

nech'e õyäythiyeja niyäk.

Wet nemla isilatyen lew'ole,

tsi nech'e isathilhila lhetek,

wet nemla yen lew'uya lew'uyis tä isis,

nech'e yenla lew'uya lew'uyis tä yelaj.

Wet wuj tä len'äfwlhi ihiyeja lhamel,

nemla isis.

₂₅Wet aka hin'ol lep'itseyhay

ihihila n'oka'tshayaj,

tej tä hin'ol tä wuj tä takhajayhen,

mat õ'länhihena.

₂₆Wet Jerusalén hätehlat iwoye

atsinha tä lew'et lheley nofwej,

tafwlhi t'at wet tatayhiphät honhat.