Ezequías t'inhayaj ihi mat Dios ichesat
1Häp ifwalastso t'inhayaj ihi rey Ezequías, imä katsi wet eyte y'inhi. Wet profeta Isaías tä Amoz lhäs ihoye wet tahuyej tä yok:
–Häp Lhawuk lhämet yok, “Kanchä haw'et lhäy'e m'ayhay tä ihi. Tsi let'inla, lechesit'ala.”
2Wet Ezequías itilhkathi tate'pe, itayhte hup lhip tä iwo t'alhyaja wet yok:
3–Iwuk, olhaip'altsen ame chik ahuseklä m'ak tä owoyepej. Ts'ilak am tä on'okwi amej wet owoyepej m'ak tä am lehuminche.
Wet Ezequías wuj tä tafwlhi.
4-5Wet Lhawuk ne'tek Isaías ihoye Ezequías yämthilek ifwenho tä yok:
–Lhawuk tä achäti David laka Dios yok, Oläte alhyaj wet ow'en tä letafwlhi. Ow'enla amho quince nekchämis iyhäj häp haw'atshancheyaj. 6Wet am lhäy'e hupuyna tä Jerusalén ofwayhthiyeja Asiria laka rey, wet ot'uhiyela häp hupuyna.
21Wet Isaías tahuyej niyat lakawos wet yok:
–Chofwaji higos wet pen. Hän alhoho, ti'pe rey t'isan lhip tä t'inhayaj ihi, häpkhilek iches.
22Wet Ezequías tay'ätshane Isaías wet yok:
–¿Atsi letetnek tä Lhawuk ihanthila n'oyej tä kalelhäj tä yachajo tä ohohiyela Lew'et?
7Isaías nichulho wet yok:
–Häp täja Lhawuk letetnek tä ipäynhila ame yämthilek lehanej tä yämla matche lhämetne ofwel amho. 8N'ot'äsawet p'ante rey Acaz lhenek, lehupel lhayachajihena.
Wet matche t'at, lehupel lhayachajen.
Ezequías letenek
9Tä Judá laka rey Ezequías iches, yenlhi letenekna, yok:
10Olham pajche otichunhayaj tä oyok,
Oy'inhila tä kamaj n'am ch'ut.
Ofwitla okapes wet otiyäjiyela n'ot'ilek niyatyaj.
11Otichunhayaj yok,
Nemla ow'en Lhawuk honhatena,
wet äp nemhit ow'enla elh chik häpe
häp wichi tä ichena.
12Ohusek lew'et tä häpe ot'isan noj, wasi,
hätet iwoye tson'ataswo huplawet.
Ow'atshancheyaj hätet iwoye
niyäkfwaj tä hiy'es tä õyenlhi.
Tä ifwala, tä honatsi,
wuj oteläythayaj tä lew'en n'oho.
13Tä honatsi ot'änlhi t'at tä olhailät,
hätet iwoyek t'owalhaj chik inäksen olhiley.
Tä ifwala, tä honatsi,
wuj oteläythayaj tä lew'en n'oho.
14Ohätet iwoye afwenche tä y'iplhi t'at,
Olhaknhayaj tum at n'oye,
ohätet iwoye hokwinaj tä y'iplhi.
Ottelhoy y'ilejiche tä pitaj tä oyahin puleye.
¡Iwuk, olhakli ihi, ch'ot n'oye!
15Mat laha ihihit'a olhämet tä owoyeje,
tsi lham t'at tä iwoyej n'oye täjtso.
Nemhit nahati ilänn'o
tä wuj tä ohusek nilhak'alhi.
16Iwuk, nilhokej tähestso
iwot lew'atshancheyaja wichi.
Wet äp häp tä ohusek takhajayej t'at,
tsi am lenachaj n'oye ow'atshancheyaj
wet leläyit'atn'o.
17Wet athana otamsek ihi,
nemhit häpe ofwitajayaj.
Tä lehuminn'o, let'amaj n'oyej
wet onchäthiyet'a chowej tä n'otäyhyaj,
tsi letäyhat n'oyej nilhokej och'isukyajay.
18N'op'itseyhay ihanhiyejt'a
iwoyneje chik akäjlhi amej.
Wichi tä pajche ileyejen honhat
ihanhiyejt'a iwoyneje chik aiwujyen.
Lhamel tä tiyäjche chowej tä ihonhatch'oye,
leniwhayaj ihihit'ahlä ahumnhayaj.
19Tajlhama wichi tä iläyhen häp tä aiwujyen,
mälhyej tä olham owoye ifwalana.
Hin'ol ifwenhomche leles
tä am ahäpe Dios tä lehumnhayaj ihi.
20Lhawuk ikana yämthilek ifwayhatn'o.
N'atchuma lhaka arpas wet n'achoywethä
nilhokej ifwalas tä y'aläyhen
tä y'echufwi Lhawuk Lew'et.
