Tatäy Babilonia laka dios lhayis
1“Dios Bel takhos katsi,
wet dios Nebo nichät honhate.
Wichi ilhuhyenejen itshätäy
häp laka dios lhayis tä takwey lhenhay
wet y'enhen tsi wuj tä choyhthen.
2Dios lhayis takhosche katsi
wet nichät honhate.
Ihanhiyejt'ak lhaifwayhthen
wet lhamel t'at tä ihoye honhat tä kalew'eta.
3“Jacob leles tä lepes lheley, ch'ahuyay n'oye,
nilhokej amel tä Israel lhayis tä lemälhehi.
Olham tä otilhäj amel,
tälhe tä kamaj ka'ewachehen,
wet lheyayhi t'at otkweyey tä oaichäj,
4wet olehichet'ala tä owoye täjtso.
Chik lech'uthen wet haw'oley ipelaj,
kamaj olehit'ala amejen tä oaitsok t'at.
Olham tä olhenek amel,
wet otilhäjila t'at amel,
wet otujlhahichela t'at tä oaitsok
wet oaifwayhthila.
5¿Atsi elh tä lefwetaj hätet iwoye olham?
¿Wet atsi elh tä lefwetaj olham ohätet iwoye?
¿Wet atsi elh tä lefwetaj w'awulh n'ohi?
6Iche wichi tä wuj oro
tä itonphä tä ihiche lakhäyhis,
wet iwo pesaya plata,
wet nech'e hiw'enho lechumet
hin'o tä yenlhi laka dios
yämthilek t'upeyejchä wet n'okwiyej.
7Wet äp tilhäj wet yikchufwi,
wet iti'pe lew'et wet ihi t'at wet tajlhame.
Tejlak õt'änpe tä õt'alheje lech'otyaj,
mat nichulhit'a wet ihanhiyejt'a iwoyneje
yämthilek ifwayhtej wichi häp lelhakli.
Lewhäy tä tajyäme wet lewhäy tä tatay alhoho Lewuk t'at Dios
8“Tichunche täjtso, häp amel tä hach'isukyajay ihi.
Is chik lehanej wet tihi ahusey.
9Tichunche lewhäy tä tajyäme tälhe tä nech'enyaya.
Ohäpe Dios, tek iche elh.
Ohäpe Dios, ihichet'a elh chik w'awulh n'ohi.
10Tälhe tä nech'enyaya tä oyen lhämeta
m'ak tä ihichela häp lewhäy tä lepes.
Lhäy'e lhip tä pajche tä oyen silätyaja
m'ak tä ihichela häp lewhäy tä tatay alhoho.
Oyok, Ihichela m'ayhay tä ot'uhläk owoye.
Oyenhilhila nilhokej m'ayhay
tä owaklhat tä owohiyela.
11Ot'äne hin'o tä tälhe tä ifwala tälhche,
nek t'at tä tälhe honhat tä atofwe,
hätehlat iwoye afwenche tä iyhäjkottaj,
wet lhamlak iwoye m'ak tä owaklhat tä owohiyela.
Olhämet t'at täjtso wet omatthichela.
M'ak tä pajche owaklhat
tä owohiyela, oyenhilhila.
12Amel tä ahusey t'unhen
tä lefwetajay atofwey afwayhyaj,
ch'ahuyay n'oye.
13Olham tä otott'ayen alhoho afwayhyaj,
tek pajlahlä, atofwiyet'a.
Ow'enhihola lefwayhyaj häp Jerusalén,
wet ow'enhihola owujyaj häp Israel.”
