Tatäy honhat tä Babilonia
1Lhawuk yokwe, “Babilonia,
lhek nuhchä tä lhehi han'ohyaj,
wet tayhiphä holo.
Atenaj iwoye lhutsha tä kamaj laj lech'efwaya,
mat nemla õyen eya tä õyok, Isilataj.
¡Nuhchä wet tayhiphä honhat,
tsi nech'e ahäpe n'okwenek!
2¡Chuma tunte tä fwelhek
wet chofwaji harina!
¡Tiyej kanhi wesaj tä lep'oyejpe etek,
wet fwoyenphä haw'uy,
n'älitchehen echey
wet istho tewok lhayis!
3Is chik wichi hiw'en akakwhi tä n'älpe,
häpkhilek han'äfwlhi ihi.
Owohla ohayahlä wichi,
wet ihit'ala katsik lhaip'altsen n'oye
chik yohlak, Leyej aka'tshayaj.”
4N'amel Lhafwayhthi, Dios tä Israel T'amajchet,
häp lham tä lhey Lhawuk tä lajit letumfwaya, yok:
5“Babilonia, uyho honatsi,
tayphä wet ok tam.
Nemla õyen eya Honhates Kaniyat Tsinha.
6Tä otiyejte owäk oka wichi,
olham t'at tä oyachaj ame
yämthilek lhen w'et m'ayeka,
wet owahin amej yämthilek lekalhi lhamel.
Mat lep'altsenhit'a lhamel,
wet tej tä wichi tä thänhäy,
mat lech'atej m'ak tä lewoyeje lhamel.
7Wet lhok, Lepes ihichet'ala tä oniyat t'at.
Wet lhenhit'a atichunhayaja m'ayhayna,
wet tek lhok, ¿Atsihila m'ak chik n'äl chik ilepese?
8“Wet häp tä tamenej tä oyok,
Athana ch'ahuye täja,
tä atet iwoye atsinha
tä ihumin m'ayhay tä isis
wet atamsek ihi tä lhehi aniyatyaj,
wet leti amhi atichunhayaj tä lhok,
Olham, tajlhamat olham,
ihichet'a elh chik te iwoye olham,
wet ohäpkhit'ala tesa,
wet otehit'ala iwoye atsinha tä laj lelesa.
9“Mat leselthiyeja ifwalatso,
nämla ame nitäkw awit'äyhyajay,
ahäpkhila tesa wet nemla ales ihichela,
tej tä wuj tä lewo hiyawu chumyaja.
10Lefwetaj tej tä lewoye m'ak tä ni'isa,
mat awit'äyhyaj ihichet'ala,
wet atichunhayaj lhok, Nehit katsik hiw'enn'o.
Ahanyaj lhäy'e atäfwnhayaj ikan amej,
wet häp tä lewo atichunhayaja wet lhok,
Olham, tajlhamat olham.
11Mat nichätla atape häp m'ak tä ni'isa,
wet tek aisiyeja tä alhen hiyawuya.
Häpkhila awit'äyhyaj tä aiselkat,
wet tek letafwayhiyeja.
12“¡Tujlhache t'at tä alhen hiyawuya,
tä alechufwenej tälhe tä aknithaläkwa!
¡Elat aisej p'iya
wet elat wichi nowayhla ame p'iya!
13Wujpey hin'ol tä aichufwenlhi
pajtha w'et let'el.
Is chik iho kana häp hin'ol tä let'ekhaye,
häp lhamel tä itetshan katetsel,
wet is chik aifwayhat,
häp lhamel tä iwel'apej wet ifwel amho
m'ayhay tä ihichela iwel'atso.
14Mat lhek yahin,
lhamel tet iwoye hup tä tamchäy.
Itäj itäyhat, ihanhiyejt'ak
lhaitiyej kanhihlä itäj tä y'uho.
Tsi häpkhit'a itäj tä fwiyhol ihi
yämthilek õttayphäwhäye wet õlhaihutunlhi.
15Wet mälhhiyejatso
häp lhamel tä lefwetaj aisej,
häp wichi tä lechäj m'ak tä tälhe,
tälhe tä aknithaläkwa.
Elhpej tujlhache t'at lewetahayaj,
wet newache elh chik ihanej chik aifwayhat.”
