Isa 49

₁Nilhokej wichi tä lheyaype honhat,

is chik lelätay n'oye.

Amel tä haw'etes atosehen, ch'ahuyay n'oye.

Lhawuk t'än n'oye tälhe tä kamaj n'am newche,

iwo olheya tä kamaj oihi oko kachowej.

₂Wet itech'aynej n'ofwajnhat tä y'uy häp olhämtes,

wet iskatn'o tä oihi takwey.

Itech'ayen at n'oyej n'och'äha tä itselhäj

wet iti n'ohi lham lenech'ethayaj.

₃Wet tahuy n'oyej wet yok:

“Israel, ahäpe okawo, on'älthila amhi owujyaj.”

₄Mat olham oyok:

“Laha ihihit'a m'ayhay tä owoye,

w'et olhaikhajyen t'at,

niwohit m'ak chik n'äl tä okalhi.”

Matlhat m'ak tä is alhoho tä y'aj n'oye

ihi t'at Lhawuk takwey,

wet lham hiw'enla n'oho okaha tä otw'ayhat.

₅Wet okatej on'ohyaj tä oihi tä Owuk Dios tatache,

tsi lham häpe t'at okhajyhayaj.

Lhawuk lham tä iwaklhatn'o

tä kamaj oihi oko kachowej,

yämthilek ohäpe lakawo wet onachaje lham

häp Israel, Jacob kawichi.

₆Wet Lhawuk yok:

“Nayahit'a tä ahäpe okawo yämthilek

leneyhatphä Jacob kawichi wet lenachaj alhoho

iyhäj Israel lhayis tä imälhehi.

Mat oayenla häpeya nilhokej wichi laka isi,

yämthilek wichi tä ihiche nilhokej honhatil tafwayhen.”

₇Lhawuk tä N'ofwayhthi

wet äp Dios tä Israel T'amajchet,

tahuyej häp elh tä wuj tä õyen w'et m'ayeka,

häp lham tä wichi tä ihiche honhatil n'äyiho

wet niyatey yen kweneka.

Wet Lhawuk yok:

“Reyes chik aiw'en neyhichephäla wet aiwujyenla,

wet niyatey t'upeyhichelahchä tä n'okwi amej.

Tsi olham tä ohäpe Awuk Dios, Israel T'amajchet,

ottshupi ame wet omatitche olhämtes

tä pajche ofwel amho.”

₈Lhawuk lhämet yok:

“Häp lewhäy tä op'altsenyaj iche, otch'ahu ame,

wet ifwala tä n'ofwayhyaj iche, otch'ot ame.

Ot'u ame yämthilek oayen lewoya

häp olhämet tä ot'untejche wichi,

yämthilek onech'aynhi honhat tä Israel,

wet lhamel yenla lew'etesa

häp lhipey tä pajche õ'wasthiche.

₉Wet lefwenhihola wichi tä õhp'ohiche

wet lhohlakwe, ¡Nukwephä!

Wet lefwenhihola lhamel tä ihi honatsi

wet lhohlakwe, ¡Mäyaych'oye honatsi!

Wet lhamel hiw'enla hup tä w'atshan

tä iwhäye n'äyij lhäy'e tä iche'pe chenhas tä ts'anis,

yämthilek leläy itshätäy lhäk.

₁₀Tek nichuyuhihena wet tek ichimhihena,

wet ifwala hip'ohihent'ala,

wet nahayoj ilänhihent'ala.

Tsi olham op'altsenhen wet ochunlä lhamel,

wet ohänhiyela inät tä ts'ifwik lhayis.

₁₁Oyenhilhila n'äyij tä inuhikwela chenhas lechowej,

wet one'tehlak õ'pothomche lhipey tä pitosomche.

₁₂¡Lhek yahinlä, nek wichi

tä tälhe honhat tä atofwe,

iyhäj tälhe tä tafwojhiye,

wet iyhäj tälhe tä ifwala tälhche,

wet iyhäj tälhe honhat tä Aswan!

₁₃¡Pule, fwitsenej achos tä akäjyaj ihi!

¡Wet am, honhat, is chik akäjyaj tapo amej!

¡Wet amel, chenhas, änhen wet choywethä!

Tsi Lhawuk ikhajyen laka wichi,

wet hip'altsen lhamel tä lelhakli ihi.

₁₄“Jerusalén yohtekwe,

Lhawuk iwomn'o, hip'ethat n'ohlä.

₁₅Mat olham oyok,

¿Hä atsinha ihanej tä hip'ethatlä häp lhäs,

wok ileyej tä ihumin?

Matche, elat iche elh tä hip'ethatlä häp lhäs,

wok nemhit ihumin.

Mat häp olham tek op'ethathila ahilä.

₁₆Lhehi t'at otkweyey

wet oayen at tichunhayaja.

₁₇Aka wichi ikelit tä tapil,

wet atayhfwas tä aiwasthihte

wet ayen ts'aniya, lhamel yikhen.

₁₈Lhek yahinphä wet yahin lhipey,

wet tetshan tä nilhokej aka wichi

lhaihutwekhen wet tapil ame.

“Olham tä ohäpe Awuk Dios tä n'ilataj,

oyäm kalelhäj olhämet, oyok,

Am a'käjiyejlhila lhamel tä tapil,

hätehlat iwoye atsinha tä tawhayey

akäjejlhi lhamsilis tä isilatyen lhamej.

₁₉Aka honhat häpehte honhat tä nemhit is,

wasi t'at wet tatäy,

mat athana wichi w'awulhihot'ala,

hätehlat iwoyek lhämsaj.

Wet lhamel tä aiwasthi wujlak atofwe ahilä.

₂₀Wet ales tä lefwetaj tatäy,

leläthiyela lhamel chik yok,

Honhatna lhämsaj, olhamel tek ow'awulho.

Enlhi n'ohohen ow'et yämthilek olhamel oihi.

₂₁Wet letihla amhi atichunhayaj tä lhok,

¿Atsi tä iwo olesa?

Tsi tek oles ichehte,

wet ohanhiyejt'ak oti lhamej,

tsi oka wichi ihihte honhat

tä atofwey tä kalew'eta.

¿Atsi tä ichihelit lhamel?

Tsi wichi iwomtetn'o wet ots'ilak t'at,

¿wet chi tälhi lhamelna?”

₂₂Lhawuk Dios yok:

“Otkwey y'ajiyela wichi tä ihiche honhatil,

wet ow'enhihola otetnek lhamel wet hiw'enhiyela,

häpkhilek lhamel tach'awej ales wet inachaj,

wet talhunej ales tsinhay wet ihän alhoho.

₂₃Wet häp reyes hätehlat iwoye ajchalis,

wet lech'efwas hätehlat iwoye akolis.

Wet takhosichela katsi tä ihi tä letatache,

pajla'tha letachol taji honhat,

wet inap'uhila honhat tä iyej apach'ol.

Wet lehanhiyeja tä ohäpe Awuk Dios,

wet wichi tä t'ekha n'oye tek ofwech'enlawethä.”

₂₄¿Hä õ'soyej hin'o tä takhajay tä ihi n'oka'tshayaj

häp m'ak tä ikatej tä ihi takwey?

Wet häp niyat tä ni'isa tä yen kweneka elh,

¿hä õ'hanej tä õ'soyej?

₂₅Lhawuk yok:

“Matche. Hin'o tä takhajay

õ'sohiyeja wichi tä yen kwenkaya,

wet niyat tä ni'isa

õ'sohiyeja m'ak tä ikalhi.

Olhamlak ottayhlä wichi tä tatay ahilä,

wet olhamlak ofwayhat ales.

₂₆Wichi tä ailhaklit

olhamlak ochunnhejen lhamel t'isanis,

yämthilek w'oknhasej lhamel lew'oyis

tehlat häp chik hat'es.

Häpkhilek nilhokej wichi ihanhiyeja

tä olham ohäpe Awuk Dios wet ohäpe Afwayhthi,

wet ohäpe t'at Israel laka Dios tä takhajay.”