Isa 51

₁Lhawuk yok:

“Ch'ahuyay n'oye, amel tä let'u n'okwe

wet let'uhläk is alhoho m'ak tä lewoye.

Tichunache tä amel ahätet iwoye hal'ä

tä tälhe lefwetes tä t'un.

₂Tetshan Abraham, amel ajcha,

lhäy'e ako Sara tä amel letälho.

Tä olham ot'änehte Abraham, weihalha t'at,

mat otkäpfwaye wet ow'enho wujpey leles.

₃Wet häp tä otkäpfwayhiyejela

m'ak tä is häp Jerusalén,

häp hupuy tä imälhewek tä nemhit is.

Honhates tä tamchäy tä ihi ts'anis,

oyenla häpeya yachuyajw'et,

hätehlat iwoye yachuyajw'ette otihi Edén.

Wet wichi letamsekis ihihla, wet iwohla lakäjyaja,

wet iwunthila n'oyej letenkay lhäy'e laka gracias.

₄“Ch'ahuyay n'oye, amel tä ahäpe oka wichi,

wet tetshan m'ak tä oyäme.

Ochufwenla wichi tä i'pe honhat,

wet olhämtes häpkhila lhamel laka isi.

₅Tott'a alhoho ifwala tä okalhihila otayhfwas.

Wichi lefwayhyaj tä owoye nek t'at,

wet olhayenla Niyatayej wichi

häp tä isej okhajyhayaj.

Wet wichi tä nilhokpe honhat

inihihla n'ohlä yämthilek ofwayhthen.

₆Lhek yahinay puleye wet yahinpe honhat.

Nofwila pule hätehlat iwoye tutsaj,

wet honhat hich'utla hätehlat iwoye wesaj tä n'ow'uy,

wet wichi tä ihi y'inhihena,

hätehlat iwoye k'atas tä y'inhen.

Mat häp wichi lefwayhyaj tä ow'enho

häpe t'at m'ak tä t'un,

wet lepes ihichet'a tä okalhipej otayhfwas.

₇“Ch'ahuyay n'oye,

amel tä lehanej m'ak tä is alhoho,

häp amel tä alet'amkatej ochufwenyaj.

Yej nowaye wichi läkwyhanyaj,

wet yej nuhat amhohen tä ailäkwethä.

₈Tsi nofwila lhamel,

hätehlat iwoye wesaj tä lewos tufw,

wok tson'ataj w'ole tä lewos tufw.

Mat lepes ihichet'a tä okalhipej otayhfwas,

wet wichi lefwayhyaj nofwit'ala.”

₉¡Iwuk, akhajyen, yej k'efwyenho akwey!

Aneyhatphä, mälhyej tä lewoye p'ante

lewhäy tä tajyämetso,

häp ifwalas tä pajchehen.

Am t'at tä lekalhi p'ante Egipto,

hätet iwoyek lewo p'ante lhipeya

häp Rahab, inät lheletaj.

₁₀Wet am t'at tä lhäm y'im lewomekitaj,

häp inät tä wuj tä pitoj,

wet lhen n'äyija lewomekitajch'o

yämthilek wichi tä lefwayhat inukwe.

₁₁Mälhhiyejattso wichi tä lefwayhthen

tapinhiyela Jerusalén,

wet ichoyhlawethä tä lakäjyaj ihi.

Wet lajit lepesa lakäjyaj,

wet nemla iche lhafwyhayaj lhäy'e lelhaklis.

₁₂Lhawuk yok:

“Olham t'at tä oaikhajyenhen.

¿Wet atsi tä lenowaye?

¿Hä lenowaye wichi?

Lhek yahinya, hin'ol t'unhihent'a,

hätet iwoye hal'ä tälhes.

₁₃¿Hä lep'ethathilahlä Awuk Dios tä alhenek,

häp lham tä hich'enhi pule

wet yäm t'unhi honhat?

¿Hä lepes ihihit'a tä lenowaye

wichi tä n'äyi amhohen

wet wak'alh t'at yämthilek aitäyhthen?

¿Mat chip ihitso wichi tä fwitses?

₁₄Aiyhäj tä õhp'ohiche

pajiyejt'ala wet inuhikwephäla.

Tek lep'itseyhay imälhehihila n'op'onthi,

wet nehlä ilänhihent'ala.

₁₅“Tsi olham ohäpe Awuk Dios,

olhey Dios tä lajit letumfwaya.

Ow'ahhathi lewomekitaj wet iwo lhetheya,

₁₆wet och'enhi pule wet oyäm t'unhi honhat.

Otihi hak'aj olhämtes,

wet lhehi t'at okhajyhayaj wet ot'u ame,

wet ofwenho Jerusalén lheley tä oyok,

Ahäpe oka wichi.”

₁₇¡Jerusalén, nephä, akhajyen, yej lemä!

Ifwalas tä tajyäme wuj tä ailän Lhawuk lewäk,

ahätet iwoye hin'o tä iyäyej hat'es

pajtha y'im tä ihi lhäthi wet w'oknaj.

₁₈Nilhokej ales tä i'amej,

niwohit elh chik ichun ahilä.

Nilhokej ales tä lechihelit,

niwohit elh chik itsok akwey wet yik achafwi.

₁₉Täkwfwas awit'äyhyaj tä pajche näm ame.

Õ'wasthi aka honhat, wet nehläs

lhäy'e n'oka'tshayaj ilänhen aka wichi.

Ihichet'a elh chik aip'altsen,

wet ihichet'a elh chik tach'ot ame.

₂₀Aka wichi hätet iwoye ch'iwasek õ'tsoklhi,

lakhajyhayaj ihihit'a,

lhamel imäkwet katsi tä ihi hup kawayhil.

Lhawuk Dios ilänej lhamel häp lewäk tä äytaj

tä lham ifwoneje m'ak tä lhamel iwoye.

₂₁Häp tä tamenej tä oyok:

Hupuy tä ap'elitsaj, am tä aw'oknaj

mat häpkhit'a hat'es chik aw'oknajej,

ch'ahuye täja:

₂₂Awuk wet aka Dios, häp lham tä

iwo ka'tshayaja'pe laka wichi, yok,

“Osohla amej n'olhäthi

tä alhen w'oknajayej tä leyähi,

wet nemla leyäyej m'ak tä häpe owäk.

₂₃Mat oyäynhihila wichi

tä iti amejen ateläythayaj

wet ne'tek letakhosche katsi

wet ayen t'äsaweta, ahätet iwoye holo.”