Dios lehumnhayaj tä lajit lepesa
1Jerusalén tä ahätet iwoye atsinhä tä sufwnaj,
¡än tä akäjyaj ihi!
Tä ahätet iwoye atsinha tä laj lelesa,
¡fwitsenej atenek tä lechoylhi!
Tsi Lhawuk yok:
“Tä ahätet iwoye atsinha tä n'owomek,
wujla'pe ales, inuhla'pe elh tä lech'efwa ihi.”
2Äm tsajo carpa tä awukwe,
yej nowayek lajla lheleya.
Wet äm pites t'akay,
äm t'unhiche lew'etes tä lekäjchehchä.
3Tsi wujla'pe ales wet lhehihilat lechowej,
lhamel lhayenla lewuhuya wujpe honhates
wet yenla lew'etesa hupuy
tä nem wichi ihiche athana.
4Yej nowayek han'äfwlhi ihla amej.
Tek wichi ailäkwilhila,
wet ihichet'ala m'ak chik lhen han'äfwlhiya amej.
Lhenhit'ala atichunhayaja m'ak tä ni'isa
tä lewoye p'ante tä alhutsha,
wet nemla lhen atichunhayaja
tä wichi ay'ulhan tä ahäpe tesa.
5Tsi Hin'o tä alhenek tachumla ame,
Hin'otso lhey Lhawuk tä lajit letumfwaya.
Afwayhthi häpe t'at Dios tä Israel T'amajchet,
Dios tä imälhewek honhat Lewuk t'at.
6Amälhyejtet iwoye lhutsha
tä lech'efwa iwom, wuj lelhakli.
Mat Awuk Dios yachajo tä t'än ame wet yok:
7“Pitajit'a lewhäy tä olehte amej,
mat aisej op'altsenyaj tä wuj,
wet häp tä oyachajiholak
otchum ame wet lhehla n'oyej.
8Lhimphaj owäk,
wet nipitaja lewhäy tä oweskat ahilä.
Mat aisej ohumnhayaj tä nittäya,
wet häp tä oaip'altsen.”
Iwoyetso Lhawuk Afwayhthi.
9“Ot'untejchehte olhämet häp Noé tä oyok,
Tek oyachajiholak op'oyejpe honhat häp inät.
Wet häp tä mälhyejtso athana,
ot'unhatche olhämet tä oyok,
Tek oyachajiholak oti amej owäk
wet tek oaitasnhila.
10Tejlak chenhas nem ihiche lew'etes wet waschehchä,
mat häp ohumnhayaj tä oti amej nofwit'ala,
lhäy'e olhämet tä ot'unhatche amej
tä ofwel amho tä atamsek ihihla.”
Häp täjtso lhämet häp Lhawuk
tä iti amej lep'altsenyaj.
Jerusalén nech'ayek
11“Wuj tä p'elitsaj hupuy tä Jerusalén.
Hätet iwoye tä yafwthitaj tä ailän
wet newache hach'otyaj.
Mat oyenla afwetesa tuntey tä isis,
12wet rubí lhayis häpkhilek
oyene hupuy tä atoschephä.
Wet lepelis häpkhila tuntey tä ichätasen,
hätet iwoye itäj lhal,
wet alafwek tä hup lep'ot
imälhewek tä häpkhila tuntey tä isis.
13Ochufwenla nilhokej aka wichi,
wet lhäy'ehila lhip letamsek.
14Wet m'ak tä is alhoho aikhajyenla,
wet ihit'ala katsik ailhaklit,
wet anowayhyaj ihit'ala amej,
wet m'ak tä tanhoch'ay nemla nichät ame.
15Chik iche elh tä inu ame,
olhamhit'alak olhämetej,
wet elh tä inu ametso amlak lekalhi.
16“Lhek yahin, olham tä oyenlhi chinajwo,
wet ilhänhi itäj wet ichumyenwethä
lechumetchal wet yenlhi lechumet.
Häte oyenlhi hin'o tä iwasthiche m'ayhay wet ikänchi.
17Mat nehit katsik ihanej iwoyneje
yämthilek yenlhi takwelhele wet aiwasthi.
Lep'ohihila lak'aj elh chik häpe tä iti amej ates.
Wet m'ak tä ow'enho lhamel tä okawos
häpe t'at le'isyaj.”
Häp täjtso Lhawuk lhämet.
