M'ak tä Dios ifwellhi
1“Nilhokej amel tä lechimhen,
lhuyay wet yäyej inät.
Wet amel tä kaw'ena chinaj t'äj,
hoyay n'oye wet chumaye pan wet tufw.
Chumaye hat'es lhäy'e t'os
tä n'am t'alhch'oye laha.
2¿Chipte tä lewompe chinaj t'äj
m'ak tä kahäpeya pan?
¿Wet chipte tä lewompe akaha
m'ak tä kaläyayej?
Lhek ch'ahuyay n'oye wet letufwayhla
äk tä isen lhäy'e tä akäj.
3Hoyay n'oye wet tetshan olhämet,
wet ch'ahu n'oye häpkhilek haw'atshancheyaj ihi.
Owohiyela olhämet tä ot'unhatche amejen tä nittäya.
Owohiyela täjtso tä oyäm matchehen
olhämtes tä owoyejehte David,
häp tä isej ohumnhayaj.
4Olham oyente niyatayej wichi tä i'pe honhat,
yämthilek hin'ältej lhamel okhajyhayaj.
5Amel let'änhiyela wichi tä katäfwelayej,
wet wichi tä nitäfwela amejen
inuhikwela alhoho tä iho amehen,
tsi olham Awuk Dios wet Israel T'amajchet, oaiwujyenla.”
6Uyaykwe Lhawuk tä kamaj ni'thaya chik lelhoke,
wet änch'oye tä lham ni'tofwaye.
7Is chik hin'o tä ni'isa
ileyej m'ak tä ni'isa,
wet hin'o tä kachuhantsaj
ileyej letichunhayaj tä ni'isa.
Wet is chik letapilaye Lhawuk,
häpkhilek iti amejen lep'altsenyaj.
Woyay ahusey iyhäja,
tsi lhaka Dios le'isyaj ihi
wet itäyhthila amejen ates.
8Lham yok:
“Otichunhayajay tek häte iwoye amel atichunhayajay,
wet tä owoye m'ak tä owoye,
tek ohäte iwoye amel.
9Häte iwoye tä pule matche tä atojphä,
lhäy'e lhip tä inu'pe honhat,
wet mälhyej'attso otichunhayajay,
lhäy'e lhip tä inu'pe amel atichunhayajay,
wet m'ak tä owoye
lhäy'e lhip tä inu'pe m'ak tä amel lewoye.
10“Pelhay lhäy'e fwiy'et tälh puleye,
häpkhit'ak w'et näm at honhate,
mat yäm takhalhi honhat,
wet wak'alh t'at yämthilek
tälh m'ayhay tä tälho,
wet hin'o tä tutchey hiw'en yachuyaj lhay,
wet wichi lhäk ihi.
11Häp tä mälhyej'attso olhämtes tä owoye,
häpkhit'ala olhämtes tä m'ak nitälhaye,
mat yenhilhila m'ak tä olham ohuminche,
wet yämla wak'alh lechumet tä ochene.
12“Chik lhekhilach'oye tä lheyayhi,
akäjyaj ihla amejen wet onuhthila amchehen atamsek.
Wet chenhas chik aiw'enlä,
hätehlat iwoyek tech'elh
tä t'änhen tä lakäjyaj ihi,
wet nilhokej hal'äy y'ajihomchela takwech'ol.
13Wet nemla iche ch'uthanil lhäy'e nawaj,
mat nech'e ihichela hal'äy tä isis.
Wet Lhawuk lewujyaj ihiyejila täjtso,
häpkhila n'otetnek tä nittäya yämlek tiyäj'attsiy.”
