Isa 57

₁Hin'ol tä ische alhoho y'inhen t'at,

nehit katsik yen tichunhayaja.

Hin'ol tä lehusey ihi ileyej honhat,

wet nehit katsik ihanej tä

õ'fwayhtej lhamel m'ayhay tä ni'isa,

₂wet tiyäjo letamsek.

Lhamel iwoye m'ak tä is,

wet athana lhay'upthen tä ihi lep'itseyhay lehis.

₃Lhawuk lhämet yok, “¡A'ämetay n'oye,

amel tä atet iwoye hiyawu leles,

amel tä atet iwoye n'oles tä tälho n'okain'oyajay!

₄¿Atsi tä amel leläkwlhi,

wet atsi tä amel letatayhlä

wet wujpe ämtes tä lewoyeje?

Amel ahäpehen n'och'isukyaj leles t'at,

wichi tä lhämtes kamatachehen.

₅Lewoyej amehen m'ak tä nit'uhawetayej

tä lheyachechufwi hal'ätaj lhayis

lhäy'e iyhäj hal'äy lehupelis.

Wet lelänhen n'atfwas

tä lheyaywhäye tewok n'äyhäy,

lhäy'e tä lhehiche chowhay tä ihiche chenhas,

wet lhen t'awayhata aka dios tä kamatache.

₆“Israel lhayis, lehumin tä len'okwiyej

tuntey tä isis tä ihi tewok n'äyij,

tsi häp tä aletshupyeneje.

Wet letsäche'pe hat'es tä lhen t'awayhata,

lhäy'e yachuyaj lhay.

¿Hä lefwetaj okäjejlhi tähestso?

₇Leho'pe chenhas tä atoschephä wet lewo akain'oyaja,

wet häte lelänhen itshätäy

tä lhen han'okhayajayej aka dios tä kamatache.

₈Wet leti w'echehi awukwe lepe

häp n'opeyak tä letihi atichunhayaj,

wet lep'ethat n'ohlä.

Lelanche haw'uyis wet lemä'pe amäwetes tä tsesomche,

wet lewoye t'at lenech'ethayaj

elhpej tä let'uhläk lemäyej,

wet leyahin t'at tä lhaits'ilkatche.

₉Lenukwe alhoho tä lehoye rey

tä niyatej honhat elh,

häp hin'o tä let'uhläk lhaip'ajtit amejen,

wet lechäje aceite lhäy'e wuj m'ayhay tä lenij akäjche.

Wet lechene akachenhay honhates tä atosehen,

wet häp tä lechene t'at n'ot'ilek niyatyaj.

₁₀Wujpe tä lewopej haw'ekyaja

wet let'enhen, mat letäfwenhiyejt'a

tä nilhokej m'ak tä lewoye lajit lahaya.

Lekalhipej m'ak tä aisej,

häp tä tamenej tä tek let'elej täjtso.

₁₁¿Atsi tä lenowaye wet tamenej

tä lele n'oyej wet lep'ethat n'ohlä,

wet nem lhenn'o atichunhayaja?

M'ak tä tamenej tä kanowaya n'oye,

häp tä otch'anlhat amehen

tet iwoyek tek oaiw'en.

₁₂Mat oayenla tesayej

m'ak tä lewoye tä lefwetaj is,

wet ihichet'ala m'ak chik aisej.

₁₃Wet chik lefwetajla let'änch'oye

aka dios lhayis yämthilek tach'ot amehen,

tek tach'otla amehen wet tek aifwayhthihena,

mat yafwthitaj ichäjla lhamel wet noj.

Mat häp elh chik t'ekha n'oye,

lham ihihila honhat tä lewuk,

wet n'okwihla n'oyej tä oihi Owukwe tä Ot'amajchet.”

₁₄Wet ihichela n'olhämet

tä wichi iläthiyela tä yok:

“Waklhatche n'äyij, äm w'awulhchä,

tiyej kanhi m'ayhay tä hap'alakhiche,

yämthilek oka wichi inukwe wet tapil n'oye.”

₁₅Tsi N'owujtaj tä n'ilataj

tä lhey N'ot'amajchet, yok:

“Oihi ow'et tä atojphä wet äp n'ot'amajchet,

mat häte oiyej t'at elh

tä w'et m'ayekfwaj t'at tä lelhakli ihi,

wet okhajyen wet onech'aynhi lew'atshancheyaj.

₁₆Wet nemla otujlhache tä oyok,

Letes ihi oka wichi,

wet äp nemla otwäkwäye nilhok lewhäy.

Tsi chik owoye täjtso,

olhenhay nofwila tä ihi tä ottache.

₁₇Israel ch'isukyaj tamen n'oyej tä owäk ihihte,

wet otasin wet oleyej lhamel.

Mat tujlhache t'at tä lhamel tatay n'ohlä,

wet iwoye m'ak tä lhamel ihuminche.

₁₈Ow'en t'at m'ak tä iwoye, mat ochesthila,

wet ow'enhihola t'elakw'et

lhäy'e letamsek tä imälhewek.

Okhajyenla tä lefwitajayaj ilän,

₁₉wet ofwenhihola nilhokej lhamel wet oyohlak,

Letamsek ihi wichi tä atosehen,

wet äp letamsek ihi lhamel tä ni'tosayehen,

wet ochesthila lhamel.

₂₀Mat häp wichi tä ni'isahen

tet iwoye lewomekitaj tä w'ahuye.

Letamsek ihihit'a, wet ithatphä

nilhok m'ak tä kok'aye tä ihi.

₂₁Wichi tä ni'isahen letamsek ihihit'a.”

Häp täjtso Dios lhämet.