Wichi lhaichuyhathen mat Lhawuk tek akäjejlhi
1Lhawuk tahuy n'oyej wet yok:
“Fwitsenej tä let'än, yej leyej.
Atech'aynej n'ofwol tä lepak äytaj
wet ahuyej oka wichi Israel.
Fwenho tä lhamel lech'isukyaj ihi
wet en tesayej lhamel.
2Ifwalapej lhamel t'u n'okwe
wet iwatläk matche tä ihanej onech'ethayajay,
mälhyej chik häpe wichi
chik iwoye m'ak tä is alhoho,
mälhyej chik nileyayej p'iya olhämtes.
Wet t'alhej n'oye olhämtes tä isen,
wet ihumin tä iho n'oye.
3Mat lhamel yok, Olhaichuyhathen,
mat lewohiyet'a ot'alhyaj.
Wet matche tä olhay'ayhatchehchä,
mat hätet iwoyek kahanayej m'ak tä olhamel owoyena.
“Olham oyok, Ifwala tä alechuyhathen,
lewomay akäywet yämthilek lekalhi chinaj t'äj,
wet lelänejen t'elkas aka chumhas
yämthilek wuj m'ak tä lekalhi.
4Ifwala tä alechuyhathen, leyet amehen
wet letachum, alenhäpäjwethä.
Tä lewoyaye tähestso häp ifwala tä alechuyhathen,
otch'ahuhiyet'a alhyajay.
5¿Hä lefwetaj okäjejlhi akey
tä alechuyhathen wet lewo alhakliya,
wet wuj tä lewo afwitajayaja,
wet lemä'pe wesas tä yelaj lhäy'e mok'otaj?
¿Hä tä lewoye tähestso, häp tä lhoyaykwe,
Olhaichuyhat wet häpe ifwala tä Lhawuk akäjejlhi?
Mat m'ak tä Lhawuk akäjejlhi häp täja:
6“¡Tek okäjejlhi tahestso tä lewoye!
M'ak tä okäjejlhi chik lewoye
chik alechuyhat häp tähesna:
Tiyej kanhi m'ak tä ni'isa tä lep'ajtejchä wichi,
wet yej lhen akwenkaya iyhäj tä p'elitses,
wet leyej akey tä ni'isa tä alhen iyhäj lewuka.
7W'enho lhip äk häp elh tä niw'ena lhäk,
wet lewo w'eta elh tä laj lewukweya
yämthilek ihi ayej haw'et,
wet lew'enho lew'uy elh tä niw'ena lew'uy,
wet letach'ote t'at aiyhäj.
8Wet häpkhilek ahätet iwoye isi tä nech'e fwala,
wet nofwila anhayaj thahya.
Lenuhikwela n'äyij tä is alhoho,
wet owujyaj yikhit'ala hach'oye.
9Chik let'än n'oye, onchulhla amho,
wet chik let'än och'oye
tä lewatlä och'otyaj, oyohlak, Oikana.
Chik letiyej kanhi m'ak tä ni'isa
tä alhen wichi lewuka,
wet tek leläkwethä iyhäj,
wet tek lewoyeje ämtes tä lajit lahaya,
10wet lew'enho lhäk aelh tä nichuyu,
wet letach'ote elh tä lelhakli ihi tä iwatlä m'ayek,
chik mälhyejtso,
wet tejlak lhehi lechowej m'ak tä ni'isa,
wichi hiw'enla tä wuj tä is
m'ak tä lewoye wet isej t'at.
11Wet nilhokej ifwalas opäynhila ame
m'ak tä is chik lewoye,
wet tej chik atha han'äyij,
mat ow'enla amho m'ak chik aisej.
Okhajyenla asan, wet ahätehlat iwoye n'okäsw'et
tä wuj inät tä õ'tsäype,
wet ahätehlat iwoye ts'ifwik
tä nhanayej chik y'im inät tä ihi.
12Aka wichi inech'aynhihichela
tä yenwethä m'ayhay tä wasichehte.
Lhenlawethä hupuy lefwetes,
häp hupuy tä õ'wasthichehte
häp lewhäy tä pajchehen.
Wet õyenla lheya aka wichi
N'olafwek tä wasiche lewos,
häp hin'ol tä inech'aynhi hupuy tä wasiche.
Häpet ifwala tä n'ot'elakw'et
13“Yej lhen w'et m'ayeka ifwala tä n'ot'elakw'et.
Yej lhenlhi achumet chik häpe
tä lechäte ifwala tä ot'amajchet.
Is chik lhen häpeya ifwala tä a'akäjejlhi,
häp ifwala tä ot'amajchet
wet t'uhawetej tä õ'wujyen.
Wunit, yej lhenlhi m'ak tä alewuk,
wok let'ukwe chinaj t'äj
chik lekalhi wet lewom m'ayhay.
14Chik lewoye olhämettso, lewohla akäjyaja n'oyej
wet otch'otla ame yämthilek nikalha amhi
m'ayhay tä takhajayhen tä lew'et honhat,
wet oyenla akäjyaja ates Jacob lakäywet.”
Lhawuk lham t'at tä iwoyetso.
