Dios t'äne Isaías
1Häp nekchäm p'ante rey Uzías y'il, ow'en Lhawuk tä tatayphä tä i'pe leniyatyaj tä atojphä tä lewujyaj ihi. Wet lew'uy tapoyejej häp N'ohusew'et tä Lewukwe. 2Wet iche m'ayhay tä hätet iwoye itäj tä i'pe häp lham. Wet elh tefwajpejni iche seis lhafwis. Täkwfwas lhafwis hip'oyejpe tatey, wet täkwfwas lhafwis iyhäj hip'oyejpe t'isan, wet täkwfwas lhafwis iyhäj yämthilek wey'ä. 3Wet lhamel nichulhwek wet yok:
“¡Is, matche tä is,
is Lhawuk tä lajit letumfwaya!
Lewujyaj tapoyejej honhat.”
4Wet häpet tä pitsaje n'opakastso, N'ohusew'et lepe ch'utey w'ahuye, wet tutsaj tapoyej N'ohusew'et. 5Wet oyok:
–¡Owit'äyhyaj ihi t'at, oy'inhila! Tsi ow'en Niyat tä häpe Lhawuk tä lajit letumfwaya, tä ohäpe hin'o tä olhämtes kok'achehen wet äp oiyej t'at wichi tä lhämtes kok'achehen.
6Wet m'ayhay tä hätet iwoye itäj, elh wey'ä n'oye, ichäjilhi takwey tenazas tä itsokej fwiyho tä tälhe altar. 7Wet itijtej opästey wet yok:
–Lhek yahinya tä fwiyho taj apästey. Noj ates, tatäy amej hach'isukyajay.
8Wet nech'e oläte Lhawuk lechos tä yok:
–¿Atsi tä ochenla? ¿Atsi tä häpkhila olhamel oka silätwo?
Tä oläte, onchulho wet oyok:
–Olham tä oikana, chenn'o.
9Wet lham yok:
“Mäh hoye wichini
wet fwenhola olhämetna, oyok,
Tej chik amel leläte,
mat tek lehanhiyeja,
wet tej chik leyahin,
mat tek letäfwenhiyeja.”
10Wet äp ifwel n'oho tä yok:
“En opalisa lehusey häp wichini,
wet p'ohiche lech'otey
wet p'okwe'pe tatelhoy,
häpkhilek niw'ena wet nilätaye,
wet ihanhiyejt'a,
häpkhilek niwohit lehusey iyhäja,
wet tek ochesthen.”
11Wet oty'ätshane tä oyok:
–Iwuk, ¿chihlahätefwas ifwalas chik mälhhiyejatso?
Lham nichulh n'oho wet yok:
“Pajla'tha nojphä hupuy chik õ'wasthiche,
wet niwohit hin'ok imälhehi,
wet niwohit wichik imälhechechufwi lewukwey,
wet ts'ani t'at honhat.
12Tsi ochenla kanhi wichi
pajla'tha laka honhat nemhit wichi ihi.
13Wet chik imälhehi iyhäjfwas wichi,
häte õ'täyhthila,
hätehlat iwoye hal'ätaj chik õyiset,
wok pänhichetek,
tajlhamhiyelat letes chik imälhehi.
Mat letälhe tälhihola letes
wet häpkhila ot'amajchet.”
