Isa 60

₁Nephä, Jerusalén, asilatyen,

tsi Lhawuk lewujyaj tä isi ihutun atape.

₂Tej tä ichalajpe honhat

wet honatsi i'pe honhates,

mat Lhawuk isi t'at tä i'atape,

wet n'änhila lewujyaj tä i'atape.

₃Wichi tä ihiche honhates nämhiyela aka isi,

wet niyatey ihohla ame tä asilatyaj ihi.

₄Yahinphä wet yahin nilhokej lhipey.

Lew'en tä nilhokej wichi tä lhaihutwek

wet nekhen tä iho ame.

Ales tälhiyela honhates tä atosehen,

wet ales tsinhay õtch'awhiyeja.

₅Wet chik lew'enlä, ate'pelis isihichela

wet wuj tä akäjyaj ihihila.

Wet wichi tä iw'echehi lewomekitas

ichäjla ame lakäywet,

lhamel hiw'enlat amho m'ak tä lewuk.

₆Nämla ame wujpey camellos tä n'olhuhyenhay

tä tälhe Madián lhäy'e Efa,

lhäy'e tä tälhe Sabá

tä tilhäj ame oro lhäy'e incienso,

wet wichi yenla silätyaja Lhawuk lewujyajay.

₇Wet nilhok tson'atas tä tälhe Kedar alewukla,

lhäy'e tson'atas ch'unak lhayis tä tälhe Nebayot.

Wet lelänhihena lhamel tä leti'pe

Lhawuk laka altar wet lhen t'awayhata,

wet lham nemla koyhyaj tä isilatyen Lew'et tä isilataj.

₈¿Atsi tä häpe m'ayhay tä wey'ähen,

hätet iwoye pule lhayis tä wey'ähen,

wet hätet iwoye hokwinhas

tä wey'ähen tä yäple lhupis?

₉Häpe barcos tä nekhen,

wet iyhäj tä tälhe Tarsis ichunlä.

Wet nilhokej ichäj alhoho ales,

lhäy'e oro lhäy'e plata,

yämthilek iwujyenej häp Awuk Dios,

Israel T'amajchet, häp lham tä aiwujyen.

₁₀Wichi tä kahäpeya Israel lhayis,

lhamenlak yenlhi tä inech'aynhiche

n'olafwey tä hupuy lep'otes tä wasiche,

wet laka reyes tach'otla ame.

Tej tä Lhawuk itasinte amej lewäk,

mat athana iti amej lep'altsenyaj.

₁₁Alafwek tä hupuy lep'ot lepelis,

lepes ihichet'ala tä tafwochehen t'at,

wet lep'ohihit'ala tä ifwala lhäy'e tä honatsi.

Häpkhilek len'äyij ihi t'at wichi

tä ichäj ame lakäywetes tä tälhehen honhates,

wet häte laka reyes len'äyij ihi,

lhäy'e leniyatfwas tä iho ame.

₁₂Wet wichi lhäy'e laka niyatey

chik akniwujyena, nofwila wet tatäy.

₁₃Lhawuk tahuyej Jerusalén wet yok:

“Õ'chäjla ame hal'äy tä wuj tä laha ihi

tä tälhe tayhi tä ihi Líbano,

yämthilek lesilatyenej Owukwe,

häpkhilek lewujyaj ihi lhip tä oyen ow'eta.

₁₄Wet wichi tä iti amej alhakli

häp ifwalas tä tajyämetso,

lhamel leles nämla ame yämthilek

lhay'ayhatchä tä ihi tä letatache.

Wet nilhokej wichi tä ayen w'et m'ayeka ifwalas tä pajche,

takhoslawhäye apach'ol wet yohlak,

Häp täja Dios laka Hupuy,

Sión tä Lewuk Dios tä Israel T'amajchet.

₁₅“Nemla wichi aiwom wok n'äyi amho, wok atefwaj'atni,

mat otihla amej awujyaj tä nittäya,

wet wichi akäslawethä amej yämlek tiyäj'attsiy.

₁₆Wichi tä i'pe honhat

hiw'enla amho n'olhäk tä wuj tä isen,

wet reyes ichäjla ame lakäywetes.

Wet lehanhiyeja tä olham tä Awukn'o ohäpe Afwayhthi,

wet ohäpe Israel laka Dios tä takhajay,

wet ofwayhat amej tä ahäpe n'okwenek,

wet nemhit ahäpe.

₁₇“Ow'enla amho oro, häpkhit'a bronce.

Ow'enla amho plata, häpkhit'a chinaj.

Ow'enla amho bronce, häpkhit'a hal'ä.

Ow'enla amho chinaj, häpkhit'a tuntey.

Wet aka niyatey nemla häpe iyhäj tä ailhaklit,

mat lhamel iwohiyepeja m'ak tä is alhoho

häpkhilek wichi letamsekis ihi.

₁₈Nemla iche wichi chik inu ame

tä lhehi aka honhat,

wet nemla wichi iwasthi aka honhat.

Mat a'käjiyejlhila alafwek

tä hupuy lep'ot, lhäy'e lepelis.

₁₉“Nemla lewatläk ifwala ihutun atape,

wet tek lewatlahläk iwel'a

ihutun atape tä honatsi.

Tsi olham tä ohäpe Awuk Dios

ohäpkhila aka isi tä nittäya,

wet ohäpkhila asilatyaj.

₂₀Aka ifwala nemla y'uy,

wet nofwit'ala tä isi t'at aka iwel'a,

tsi olham tä ohäpe Awuk Dios

ohäpkhila aka isi tä nittäya,

wet nofwila afwitajayaj.

₂₁“Wet nilhokej aka wichi

häpkhihena wichi tä isen,

wet lepes ihichet'ala

tä laka honhat t'at tä ihi.

Tsi m'ak tä pajche owoye häp tä letälhes,

yämthilek n'äl tä owujyaj ihi.

₂₂Wichi tä lhimphajna lhayämla wujpey.

Ohäpe Awuk Dios

wet owohiyela'thahya täjtso

chik nichäte lewhäy.”