Jerusalén, hupuy tä Dios iwo yiya
1Am, Jerusalén, tä oti amej ohumnhayaj,
lelätlat n'oye, wet owohit'ala ot'elakw'eta
pajla'tha n'äl t'at ha'isyaj,
hätet iwoye ifwala tä ihutunpe honhat,
wet afwayhyaj hätehlat iwoye n'ochäk tä y'uho.
2Wichi tä ihiche honhates hiw'enla ha'isyaj,
wet nilhokej laka niyatey hiw'enla awujyaj.
Wet ihichela ey tä nech'ayek
tä Lhawuk lham t'at tä yenla eya.
3Ahäpkhila Dios tä N'owujtaj lewujyaj
tä lhehi t'at lham takwey tä Awuk.
4Wet nemla wichi yäm ame wet yok, “N'owomek”,
wok aka honhat chik wichi yäme wet yok, “Ts'anis”.
Mat eyla “Lhawuk lehumnek”,
wet aka honhat Lewuk t'at Dios.
5Ahätehlat iwoye lhutsha tä tawhayey.
Mälhhiyejatso, Dios tachumla ame
yämthilek Awuk t'at häp lham,
wet ainech'aynhihila yämthilek
akäjyaj iyeji häp lham,
hätet iwoye hin'o tä lakäjyaj iyeji
atsinha tä lech'efwa.
6Jerusalén, otihi n'okasthaynhay
häp n'olafwek tä hupuy lep'ot,
wet nilhokej ifwalas wet nilhokej honatsis
lhamel ilehiyejt'a tä yok:
“Häp amel tä let'änch'oye Lhawuk, yej leyej.
7Yej wo t'elakw'eta pajla'tha wak'alh
Jerusalén tä inech'aynhi,
yämthilek nilhokej wichi tä i'pe honhat
iwo lakäjyajayej.”
8Lhawuk hit'unhatche lhämet
wet ineyhtejphä takwey tä lefwomkat
tä takhajay wet yok:
“Nemla otch'anlhayek atayhfwas tufw akäs,
wet wichi tä kahäpeya Israel lhayis
tek iyähiyeja aka hat'es tä lhenlhi.
9Mat amenlak lehutaywek akäs lhay
wet letufwayhla, yämthilek lewunitayn'o.
Lehutlawek aka uvas wet lhenla hat'esa
yämthilek amel leyäyej chik lhehiche lew'etes
tä ihi Ow'et tä Ot'amajchet.”
10¡Jerusalén lheley,
nukwehen lepelis wet mäyaych'oye!
¡Enlhi n'äyij häpkhilek
wichi tä nekhen inukwe!
¡Äm w'awulhchä, tiyejche kanhi tuntey,
tiphä n'otetnek yämthilek
wichi tä ihiche honhates hiw'ene!
11Häp täja m'ak tä Lhawuk yen silätyaja
pajtha taje honhat lepes. Yok:
“Fwenho Jerusalén lheley tä nek Lefwayhthi.
Ichäj alhoho laka wichi tä lham ifwayhthen.”
12Wet õyenla lheya
“Wichi tä Dios t'amajchet”,
wet “Lhawuk lefwayhtshay”.
Wet häp Jerusalén õyenla lheya
“Hupuy tä Dios iwo yiya”,
wet “Hupuy tä kan'owomeka”.
