Isa 65

₁Lhawuk yok:

“Häp wichi tä nity'ätshanalhi n'oyej,

häp tä olhain'ältej.

Wet äp häpe lhamel tä nit'uya n'okwe,

häp tä hiw'enn'o.

Wet äp häpe lhamel tä nit'äna och'oye,

häp tä ot'äne lhamel wet oyok, Oikana.

₂Ifwala imälhewek tä opiyne otkweyey

tä ot'äne wichi tä tatay n'ohlä

wet iwoye m'ak tä ni'isa,

häp lhamel tä iwoye m'ak tä yen letichunhayaja.

₃Lajit lepesa tä iwäkwyhayenn'o.

Lhamel ihichepej n'olafwey wet ilänhen itshätäy

tä yen n'okhayajayej dios lhayis tä kamatachehen,

wet itiche'pe ladrillos tä yen häpeya laka altar

häp incienso tä iwunhomche.

₄Wet tä honatsi lhamel weskatej

tä ihoyepej n'op'itseyhay lew'etes

lhäy'e lew'etes tä wichi niw'ena,

yämthilek tay'ätshane n'op'itseyhay.

Wet lhamel tufw kutsi t'isan,

wet ipen m'ayhay tä lakokhayaj ihi

wet t'i itsäyhomche lakathathis.

₅Wet lhamel yok, Ehi tä lhehi,

yej aletott'ayen n'oye,

tsi ohäpe n'ot'amajchet

wet matche tä newa n'oyej m'ak tä ni'isa.

“Wichina hätet iwoye itäj

tä y'uho imälhewek ifwala.

Tutsaj tä tälhe wuj tä ilänn'o

tä tiyäjche onhus.

_6-7M'ak tä lhamel iwoye olesayen t'at,

wet kalelhäj tä otihiyejena otasnhayaj.

Ilätla n'oye tä owohla lahayayej

lakeyis tä ni'isahen,

ow'awlhathiyeja otasnhayaj

häp m'ak tä lhamel iwoye

lhäy'e m'ak tä lajchalis iwoyehte.

Lhamel wuj tä iwäkwyhayenn'o

tä iwunhomche incienso tä iche'pe chenhas.

Kalelhäj, owohla lahayayej lhamel”,

yokwe häp Lhawuk.

₈Lhawuk lhämet yok:

“Tä wuj t'i uvas,

wuj tä wichi t'amajej tä tachuma,

tsi wuj hat'es tä tälho.

Wet m'ak tä owohiyejela okawos

hätet iwoye täjtso,

oyämhit'ala nofwej lhamel.

₉Owohla lelesa Israel lhayis,

wet ihichela wichi tä ihi Judá

chik yen w'eta chenhas.

Wet wichi tä okawos tä ottshupiye

ihihila honhat wet yenla lew'eta.

₁₀Lhamel n'okwihila n'oyej,

wet yenla leläy lhäkw'etesa

häp honhat tä Acor tä tumej tä ifwala tälhche,

pajla'tha nichäte honhat tä Sarón

tä tumej tä ifwala y'uy.

₁₁“Mat awit'äy ihla amejen

häp amel tä lhekay och'oye,

wet lep'ethatlä chenaj tä ot'amajchet,

wet lew'enho n'olhäk lhäy'e hat'es

häp Gad lhäy'e Mení,

tä häpehen dios lhayis tä kamatachehen

tä lhen awuhuya tä lefwetaj ihanej

tä hin'älit amejen m'ayhay tä ihla amejen.

₁₂Olham pajche owaklhat m'ak tä ihla amejen,

õ'länla amejen n'ofwajnhates.

Häp tä ot'än amehen wet tek lechulhay n'oho,

wet otahuy amejen mat tek letach'ahuyay n'oye.

Mat lewoye t'at m'ak tä ni'isa wet oy'ulhan,

tä aletshupyeneje m'ak tä n'am akäjejlhi.

₁₃Häp tä tamenej tä olham

tä ohäpe Dios tä matche oyok,

Okawos hiw'enla lhäk,

mat häp amel nehläslak ailänhen.

Okawos hiw'enla m'ak chik iyäyej,

mat häp amel neheläp ailänhihena.

Okawos lakäjyaj ihiyeja,

mat häp amel wichi ailäklawethä.

₁₄Okawos ichoyhlawethä tä lakäjyaj ihi,

mat häp amel let'änhihena tä letafwchehchä,

wet afwitajayaj lhäy'e alhakli ihla amejen.

₁₅Wet oka wichi chik t'uhläk

lewit'äyhyaj iyej iyhäj chik häpe, wet yohlak,

Is chik ahätet iwoye lhamel

tä lewit'äyhyaj iyej p'ante.

Wok t'uhläk õ'länhen iyhäj,

wet häte iwoynhiyejelattso lhämet.

Mat häp okawos owohla elha lhey.

₁₆Elh chik häpe tä ihi honhat,

chik iwatlä n'okäpfwayaj tä is,

t'alhiyejela Dios tä matche.

Wet elh chik ihi honhat,

chik hit'unhatche lhämet,

hit'unthiyejchela Dios tä matche.

Tsi m'ayhay tä pajche tatäy t'at, nemhit ow'en.

₁₇“Tetshan, olham oyenhilhila pule tä nech'ayek

lhäy'e honhat tä nech'ayek.

Wet m'ak tä tajyäme nofwila,

ihit'ala katsik yen tichunhayaja.

₁₈Yej leyej tä lhen akäjyaja

häp m'ak tä oyenhilhila,

tsi oyenhilhila Jerusalén tä wuj tä is

wet wichi tä ihi lakäjyaj ihihila.

₁₉Olham okäjiyejlhila Jerusalén,

wet okäjiyejlhila oka wichi.

Wet nemla iche n'olhafwyhayaj wok n'ofwitajayaj.

₂₀Wet tek ihichela nä'tshas

chik y'inhen tä kamaj lelemsas,

wet ihichet'ala elh chik y'il

chik kamaj nich'uta.

Chik y'il elh tä hiw'en cien nekchämis,

kamaj mamse t'at,

wet chik elh y'il tä kamaj

nichätaye cien nekchämis,

n'owit'äynek t'at.

₂₁Wichi yenlawethä lewukwey wet ihlachufwi,

wet itihlahchä yachuyaj lhay wet tufwila.

₂₂Ihichet'ala hin'o chik yenlhi lewukwe

wet elh yen lewukweya,

wok elh tutchey wet elh tufw.

Pitajla lew'atshancheyaj häp oka wichi,

hätehlat iwoye hal'ä,

wet lhamel iwohla kotsayej

m'ak tä tälho lechumtes.

₂₃Tek w'et tachumlawethä,

wet lewit'äyhyaj ihihit'ala leles.

Tsi lhamel häpehen wichi

tä Lhawuk lakäpfwayaj tä is iyejen,

wet lhamel leles äp hätehlat iwoye lhamel.

₂₄Onchulhihola lhamel chik kamaj nit'äna n'och'oye.

Wet tä kamaj nileyayej tä yämlhi, otch'ahuhiyela.

₂₅Wet m'awotaj tachufwihiyeja

tson'ataj lhäs chik t'ek,

wet t'owalhaj tufwila hup tälhes,

hätehlat iwoye weyis,

mat amlhätaj tufwilat honhat.

Wet ihichet'ala elh chik häpe

tä ihi chenaj tä ot'amajchet

chik iwit'äyen m'ak at chik häpe.”

Häp täjtso Lhawuk lhämet.