Isa 66

₁Lhawuk lhämet yok:

“Pule häpe oniyatyaj,

wet honhat häpe opach'olw'et.

¿Atsi hup tä lefwetaj lhenlhi n'oho?

¿Atsi lew'et chik olhay'up'athi?

₂¡Olham t'at tä olhenhay

nilhokej m'ayhaytso wet ichehen t'at!

Olham tä Awuk Dios olhämet t'at täjtso.

“Häp hin'o tä olham otetshan

häpe hin'o tä p'elitsaj wet tek lhaichäjlhi,

wet yenhit'a w'et m'ayeka olhämet.

₃Ichehen wichi tä ilän w'asetaj

tä yen n'okhayaja n'oyej,

mat äp ilän hin'o.

Ichehen lhamel tä ilän tson'ataj lhäs

tä yen n'okhayaja n'oyej,

mat äp inäk'äs asinäj w'o.

Ichehen iyhäj tä yen otw'ayhata yachuyaj lhay,

mat äp ichäj n'oye kutsi w'oyis.

Ichehen lhamel tä iwunho incienso tä iwujyen n'oyej,

mat äp n'okwiyej dios tä takwey lhenek.

Wet tä lhamel lhaitshupyeneje

m'ayhay tä hich'atej tä ni'isahentso,

wet lhäy'e lhip tä ihumin tä iwoye,

₄tä mälhyejtso,

olham otshupyenhiyejela

leteläythayaj häp lhamel,

ochätyenhiyela m'ak tä

lhamel fwetaj wuj tä nowayhlä.

Tsi tä ot'äne lhamel,

niwohit elh chik nichulh n'oho,

wet tä otahuyejen lhamel,

niwohit elh chik tach'ahu n'oye.

Lhamel iwoye t'at m'ak tä oy'ulhan,

wet tatshupiye m'ak tä n'am akäjejlhi.”

₅Ch'ahuyaye Lhawuk lhämet,

häp amel tä lewoyaye.

Yok, “Häp iyhäj haw'etfwas

n'äyi amhomche wet ailäkwethä,

häp tä amel lhenn'o Awuka.

Wet yok, ¡Is chik Dios hin'älit lewujyaj!

¡Ot'uhläk ow'en amel tä a'käswethä!

“Mat lhamenlak len'äfwlhi ihi.

₆¡Lhek ch'ahuyaye n'opak tä tume hupuy!

¡Tume t'at Ow'et tä Ot'amajchet!

¡Häpe t'at olham tä owoyeje

m'ak tä t'uhawetej otayhfwas!

₇“Jerusalén hätehlat iwoye

atsinha tä lhakniläta,

mat iseltej tä iwo lhäsa.

₈¿Atsi tä ihanch'oye m'ak chik mälhyejtso,

wok hiw'en m'ak chik tetso?

¿Hä wichi tä ihi honhat

nichätchä ifwala tefwajni?

¿Hä yofwajkwet iche wujpey wichi?

Matkat tä Jerusalén iwo tesa tä lhailät,

yofwajkwet iwo lelesa, pajit'a.

₉¿Chiwoyek on'äyejo elh tä nech'e iche,

tä olham t'at tä one'tek iwo lhäsa?

Olham tä Awuk Dios olhämet t'at täjtso.

₁₀“¡Woyay akäjyajayej Jerusalén,

nilhokej amel tä lehumin!

¡Akäsyenejwethä,

nilhokej amel tä pajche let'äyenay!

₁₁Lham hätet iwoyek ako t'at,

ikhajyenla amel yämthilek wuj tä aisej.

₁₂Tsi olham tä Awuk Dios oyok,

Op'ohiyeja'pe letamsek tä wuj Jerusalén,

wet n'okäywet tä tälhe honhates

hätehlat iwoye tewok tä t'ulhpe honhat chik näme.

Jerusalén mälhhiyejat iwoye ako tä aichihelthen,

wet tach'awlawethä amejen tä aichäj,

wet lhehla'pe lakamchetey wet atchaslhi t'at.

₁₃Olham oaikhajyenhihena tä lheyayhi Jerusalén,

hätehlat iwoye atsinha tä ikhajyen lhäs.”

₁₄Wet chik amel lew'en täjtso,

ahusey lakäjyaj ihihila

wet asan hätehlat iwoyek nech'ayek,

mälhhiyejat iwoye hal'ä tälhes.

Lhawuk itäfwnhathiyeja lakawos

häp lham lakhajyhayaj,

mat itihiyeja lewäk häp letayhfwas.

₁₅Tsi Lhawuk ihihila itäj chik näm,

wet laka kaletas tä laka'tshayajchal

hätehlat iwoye yafwthitas,

wet iwohiyela lewäk tä y'uho

wet itasnhiyeja wichi.

₁₆Matche, Lhawuk iwohiyela

lakalelhthayaj tä häpe itäj,

wet iwohla laka'tshayajayej honhat,

wet ilänhiyejena lefwajnhat häp wichi,

wet wujla'pe lhamel tä y'inhen.

₁₇Lhawuk lhämet yok:

“Lewit'äyhyaj ihihila wichi

tä lhailejen wet lhayen t'amajchetesayej

len'okhayaj tä ni'isa tä ihiche n'olafwey,

wet iwoye t'at m'ak tä iyhäj iwoye,

wet tufw kutsi t'isan lhäy'e ama,

wok elh chik häpe itshäwet tä kok'aye.

Otäyhthila lhamel wet nofwiyeja,

₁₈tsi olham ontäfwelej m'ak tä iwoye

lhäy'e m'ak tä yen tichunhayaja.

“Wet onämla, ohutlawek

nilhokej wichi tä ihiche honhates,

nämhihena wet hiw'enla owujyaj.

₁₉Ow'enhihola otetnek

wet otch'anlhahiyelak yikhen iyhäj,

ochenhiyela honhates tä Tarsis, Libia,

lhäy'e Lidia, häp honhat tä wichi

ihanej tä tiyäjej n'och'ähal iyhäj,

lhäy'e Tubal, lhäy'e Grecia,

lhäy'e honhates tä atosehen,

häp wichi tä nhanayej chik iläte

hin'o chik yen lhämetan'o

wet ihanhiyejt'a chik hiw'en owujyaj.

Wet wichi tä okachenhaytso

häpkhilek yen silätyajayej honhates häp owujyaj.

₂₀Ichäjla alhoho nilhokej apuhfwas

tä ihiche honhates wet yenla otw'ayhata.

Ihänhiyela oka chenaj

tä ot'amajchet tä ihi Jerusalén,

ihichela'pe yel'atas, lhäy'e mola lhayis,

lhäy'e camellos,

wet iyhäj ihihila kaletas,

wet iyhäj tilhäjla iyhäj.

Matche, õ'chäjla n'oye lhamel,

hätehlat iwoye otw'ayhtes

tä Israel lhayis ichäje Ow'et

tä ihi lehis tä nikok'ayaye.

₂₁Wet iyhäj lhamel oyenla häpeya

sacerdotes lhäy'e Leví lhayis.

Owoyetso olham tä ohäpe Awuk Dios.”

₂₂Wet Lhawuk äp yok:

“Mälhyej pule lhäy'e honhat

tä onech'aynhihichela nemla tatäyhen,

häp tä mälhhiyejattso,

ales lhäy'e ey nofwit'ala.

₂₃Wet iwel'apej häp ifwala tä iwel'a nech'ayek,

lhäy'e semanapej, häp ifwala tä n'ot'elakw'et,

nilhokej wichi ihohla n'oye

wet takhosche katsi tä ihi tä ottache.

Olham tä Awuk Dios olhämet t'at täjtso.

₂₄“Wet chik lhamel yikch'oye hupuy,

hiw'enla lep'itseyhay häp lhamel tä tatay n'ohlä.

Wet iwos tä tufw lhamel y'inhihent'ala,

wet itäj tä hip'ohen y'omhit'ala.

Lhamel häpkhila m'ak tä hich'atej tä ni'isa,

wet nilhokej wichi ikokyene.”