Isa 8

₁Lhawuk tahuy n'oyej wet yok:

–Chuma hal'ä lhip tä wuj wet lesayen häp n'olhämtesna tä yok, Läfwel - Wit'äy - Kelit - Tatäy. ₂Wet tshupyene häp sacerdote Urías lhäy'e Zacarías tä häpe Jeberequías lhäs tä häpe iyhäj tä ot'ekhaye. Is chik lhamel itetshan m'ak tä lewoye wet ifwenho wichi yämthilek ikalelhtho.

₃Wet tä paj omäyej och'efwa tä lham häpe profeta'tsinha, wet hich'otshan, wet iwo lhäsa. Wet Lhawuk tahuy n'oyej wet yok:

–En lheya Läfwel-Wit'äy-Kelit-Tatäy. ₄Tsi chik kamaj han'äfwajna nhanayej chik tahuy, n'okäywet tä ihi Damasco lhäy'e Samaria, letayhfwas ihänhiyela nilhokej niyat tä ihi Asiria.

₅Wet Lhawuk äp yachajo tä tahuy n'oyej wet yok:

₆–Wichina nemhit ihumin n'otamsek tä hätet iwoye inät tä ts'ifwik tä ihi Siloé. Wet nech'e itiyej t'ekhahyaj häp rey Resín lhäy'e elh tä Remalías lhäs. ₇Tä mälhyejtso, lhek yahinya, olham tä Lewukn'o ohänla alhoho Asiria kaniyat lhäy'e nilhokej laka nifwotaj tä lakhajyhayaj ihi, hätehlat iwoye tewokitaj Éufrates tä tsajo. Wet inuhikwehena nilhokej len'äyhäy, wet t'ulhlatpe honhat ₈pajla'tha nichäte Judá tä t'ulhla'pe, wet tatäy lhimphaj chik hip'o'pe mälhewek häp honhat. Eh Emanuel, ap'elitsajila t'at, tsi Asiria kaniyat hätehlat iwoye afwenche chik hich'enhi lhafwis wet hip'ohla'pe mälhewek aka honhat.

₁₁Lhawuk takwey hit'unhat n'oyej wet ifwel n'oho tä yok:

–Yej woye m'ak tä wichi iwoye.

Wet äp ifwel n'oho, olham lhäy'e ochufwenkay, wet yok:

₁₂–Yej alet'uytho wichi t'akanyaj tä iwoye. Yej nowaye m'ak tä lhamel nowaye, wet yej nuhat amhohen m'ak tä lhamel inuhat lhamhohen. ₁₃Tajlhama olham Dios tä lajit otumfwaya, häp tä is chik lhenay amajchetan'o. Olham tä is chik lenowayay n'oye. Ti n'oyej afwawalhyaj. ₁₄Olham otehlat iwoye niyäk tä ayäythen, wet otehlat iwoye tunte tä wichi tanhäphänej, wet othatla katsi täkwfwas n'oniyatyajay tä iyej Israel lhayis. Wet otehlat iwoye chowej tä Jerusalén lheley nichäte. ₁₅Wet wujla'pe wichi tä tanhäphänej wet nichäthichela katsi wet y'inhen. Wujla'pe wichi tä yähäyhen tä otsokwethä.

₁₆Amel tä ahäpehen ochufwenkay, is chik wuj tä let'amajej Dios lhämtes tä ifwel n'oho wet yej n'älit. ₁₇Tej tä Lhawuk lhaknin'ältayej laka wichi Israel, mat otiyej t'at ochayaj, wet lham t'at tä ottayeje m'ak at chik häpe.

₁₈Lhek yahinya, olham lhäy'e oles tä Lhawuk hiw'en n'oho, ohäpehen t'at letetnhay tä Lhawuk tä lajit letumfwaya iwoyeje Israel lhayis, häp lham tä ihi chenaj tä Sión.

₁₉Wichi tahuyhila amejen wet yohlak:

–Y'ätshane hin'ol tä yämhopwethä wichi tä pajche y'inhen lehusey, lhäy'e hin'ol tä hin'älte m'ayhay wet iwoye lhämtes tä lesamsayaj.

Mat is chik lechulhayho lhamel wet lhoyaykwe:

–¿Chipte tä wichi nity'ätshanaye laka Dios? ¿Chipte tä wichi tä n'ilahen t'alhe p'itseyhay lech'otyaj yämthilek isej?

₂₀¡Yej woyaye täjtso! ¡Mat hoyaye Dios lhämtes lhäy'e lechufwenyajay! Elh chik lhämtes niwitayej Dios lhämtes, isi ihiyejt'a, tet iwoyek ifwala nin'äla'pe.

₂₁Wichi ilunla'pe honhat chik letayhfwas ikalhi, wet nehläs ilänhihena. Wet tä newache m'ak chik tufw, wuj tä fwitses. Tahuyhiyela laka niyatey lhäy'e laka Dios wet yohlak, “Matche tä ni'isa.” Wet iyahnhila puleye ₂₂wet iyahnhila honhate, mat tajlhamhiyelat n'olhakli lhäy'e honatsi tä hiw'en tä i'pe honhat, lhäy'e honataj tä tanhowatnhan.