Jue 1

₁Tä Josué ileyej p'ante honhat, Israel lhayis tay'ätshane Lhawuk wet yok:

–¿Atsi oiyhäj tä ichun yämthilek iwo laka'tshayaja wet inuye lhatayhfwas Canaán lhayis?

₂Wet Lhawuk nichulho lhamel wet yok:

–Is chik wichi tä tälhe letes Judá tä ichun tä iwo laka'tshayaja. Olham ow'enho t'at honhat lhamel.

₃Tä mälhyejtso, Judá kawichi t'äne iyhäj tä tälhe letes Simeón, wet yok:

–Yaiyhäj, is chik lhekche olhamel tä onuye otayhfwas tä ihi honhat tä õhw'enla n'ohohen. Wet chik amel lenuye atayhfwas, häte olhamel oyikhila amchehen.

Tä mälhyejtso, Simeón kawichi iwoye wet yikche Judá kawichi, _4-5wet lhamel inuye Canaán lhayis lhäy'e Ferez lhayis. Wet Lhawuk tach'ote lhamel yämthilek ikalhi, wet ilänhen p'ante diez mil wichi tä ihi Bezek. Wet niyat tä lhey Adoni-bezek iyej häp wichi, mat tä hiw'en tä lhamel nitumahlä Israel lhayis, ₆lham yik tä fwetaj ilethan. Mat Israel lhayis ihänlhi wet itsoklhi, wet yisthen lefwus, lhäy'e lefwus tä ihi lepach'ol. ₇Wet lham yok:

–Olham oyisthenpej lefwus niyatey tä olham okalhi, pajtha iche setenta niyatey tä oyisthen lefwus tä ihi takweyey lhäy'e tä ihi lepach'ol. Wet otichufwi oka mesa lhamel tä ot'ek, wet tufw olhäk lhipey tä natchä. Mat athana Dios iwoyej n'oye m'ak tä owoyejenaj niyateytso.

Wet Israel lhayis ichäje Jerusalén häp Adoni-bezek, wet ihi tä y'il.

₈Judá kawichi inuye Jerusalén wet ikalhi. Lhamel ilänhen wichi wet iwunho hupuy. ₉Tä ileyej, lhamel inuye Canaán lhayis tä yen lew'eta chenhas, lhäy'e honhat tä ts'anis tä lhey Négueb, lhäy'e honhat tä w'awulhchä. ₁₀Wet äp tatayhlä lhamel tä lew'et hupuy tä lhey Hebrón, lhey tä pajche Kiriat-arba. Wet lhamel ikalhi wet ilän niyatey tä lheyis Sesay, Ahimán, lhäy'e Talmay.

₁₁Wet äp lhamel inuye hupuy tä lhey Debir, lhey tä pajche Kiriat-sefer. ₁₂Wet Caleb yok:

–Hin'o chik inuye hupuyni wet ikalhi, ow'enhihola olhäse Acsa häpkhilek iyej.

₁₃Wet hin'o tä ikalhi p'ante hupuy häpe Otoniel, häp Caleb lech'inij tä lhey Kenaz häp tä lhäs. Tä mälhyejtso, Caleb hiw'enho lhäse wet iyej. ₁₄Tä lhamel yikhen tä ihoye lew'et, Otoniel tahuyej atsinha wet yok:

–Alhe ajcha, is chik hiw'en n'amho lhip honhat tä is yämthilek otutcheyhi.

Tä mälhyejtso, atsinha inuhchä tä i'pe asno, wet Caleb tay'ätshane wet yok:

–¿Chip ate?

Lhäse nichulho wet yok:

₁₅–Ijcha, tä lew'en n'oho honhates tä ts'anis, woye tä owoye, p'ajtej honhates tä inätes iche.

Caleb yok:

–Is t'at, honhates tä inätes ihi tä tumej kaphä lhäy'e tä tumej hichä, alewuk t'at.

₁₆Häp Moisés kachäti tä lhey Hobab, leles yikch'oye hupuy tä lhey Fwitsukwat, lhäy'e Judá kawichi. Wet lhamel ihoye honhat tä ts'anis tä lewuk Judá, häp Arad lhip tä tumej tä tapinhiye, wet lhamel yen lew'eta, iyej t'at wichi tä ihi honhattso.

₁₇Wet Judá kawichi lhäy'e lepuhfwas tä häpe Simeón kawichi, lhamel inuye wet ikalhi Canaán lhayis tä yen lew'eta Sefat. Wet imälhewek tä lhamel iwasthi häp hupuytso, wet lhamel yen lheya N'otäyhyaj. ₁₈Matkat lhamel ikalhihit'a häp hupuy tä lhey Gaza, lhäy'e Askalón, lhäy'e Ekrón, lhäy'e honhates tä tott'ahomche. ₁₉Tej tä Lhawuk iyej häp Judá kawichi wet lhamel ikalhi honhat tä ihi chenhas, mat lhamel ikalhihit'ak yokwes wichi tä lew'et lakawayhil. Tsi lhamel hiw'en laka'tshayajchal tä kaletas tä chinhas. ₂₀Wet häp hupuy tä lhey Hebrón häp tä õhw'enho Caleb, mälhyej tä Moisés pajche ifwenho p'ante. Wet Caleb yokwes gigante tä lhey Anak leles tä ihi tres. ₂₁Mat häp Benjamín kawichi ikalhihit'ak yokwes Jebús lhayis tä ihi Jerusalén. Wet häp tä ifwalasna Jebús lhayis iyej t'at Benjamín kawichi tä ihi Jerusalén.

_22-23José kawichi t'uhläk inuye Betel, häp hupuy tä lhey tä pajche Luz, wet Lhawuk tach'ote lhamel. Lhamel ichunkat tä ichen iyhäj hin'ol yämthilek itetshan häp hupuy. ₂₄Wet lhamel hiw'enlä hin'o tä tälho, wet tahuyej wet yok:

–Lhek päyen n'oyehen m'ak tä is chik olhamel owoye yämthilek osakanho hupuy. Wet tek owohla awit'äyhyaja.

₂₅Wet hin'otso ipäyne n'äyij, wet lhamel tiyäjo hupuy wet ilänhen wichi tä ihi. Mat ilänhit'a häp hin'otso lhäy'e lew'et lheley. ₂₆Wet lham yik, ihoye Het lhayis kahonhat wet yenlhi hupuy tä nech'ayek, wet iwo lheya Luz. Wet ifwalasna kamaj lhey t'at.

₂₇Manasés kawichi ikalhihit'ak yokwes Canaán lhayis tä ihi Bet-seán, Taanak, Dor, Ibleam, lhäy'e Meguido, lhäy'e wichi tä ihiche lew'etes tä tott'ahomche häp hupuytso. Tä mälhyejtso, lhamel iyej t'at Israel lhayis. ₂₈Tä paj tä Israel lhayis takhajayhen, wet nech'e yen lakawosa Canaán lhayistso, ichumyene lechumet tä äytajche, mat lhamel ikalhihit'ak yokwes.

₂₉Wet Efraín kawichi häte ikalhihit'ak yokwes Canaán lhayis tä ihi Gezer, mat iyej t'at lhamel. ₃₀Wet Zabulón kawichi häte ikalhihit'ak yokwes Canaán lhayis tä lew'et Kitrón lhäy'e Nahalal. Tej tä äytajche lechumet tä Israel lhayis hiw'enho, mat iyej t'at lhamel. _31-32Wet Aser kawichi häte ikalhihit'ak yokwes Canaán lhayis tä lew'et hupuy tä lheyis Ako, Sidón, Ahlab, Akzib, Helba, N'olafwek, lhäy'e Alhotaj. Mat lhamel iyej t'at wichitso. ₃₃Wet Neftalí kawichi häte ikalhihit'ak yokwes Canaán lhayis tä lew'et Fwala Wukwe lhäy'e Bet-anat. Mat iyej t'at lhamel wet hiw'enho lechumet tä äytajche.

₃₄Amorreo lhayis yokwes Dan kawichi pajtha nichäte chenhas, wet lhamel iwahnhiyejt'a chik fwetaj inuhchä tä i'pe chenhas. ₃₅Tä mälhyejtso, Amorreo lhayis ihi t'at Heres, Ajalón, lhäy'e M'awow'et. Mat tä paj José leles nech'e lhäy'e lhip tä takhajayhen, wet lhamel yen lakawosa Amorreo lhayis, hiw'enho lechumet tä äytajche.

₃₆Wet línea tä lepes p'ante häp Edom lhayis kahonhat tälhe Chitsomw'et lhip tä nistakchä pajtha nichäte Sela wet tiyäjpe chenhas.