Niyat tä lhey Tola
1Tä Abimelec y'il p'ante, iche hin'o tä lhey Tola tä ifwayhtej Israel häp letayhfwas. Lham tälhe Isacar kawichi, lajcha lhey Puva tä Dodo lhäs, wet lew'et Samir tä ihi chenhas tä ihi honhat tä lewuk Efraín kawichi. 2Wet veintitrés nekchämis p'ante tä niyatej Israel lhayis, pajtha y'il wet õtjänch'oye tä ihi Samir.
Niyat tä lhey Jaír
3Tä tajyäme p'ante täjtso, hin'o tä lhey Jaír tä lew'et Galaad äp lhayen niyatayej Israel lhayis veintidós nekchämis. 4Wet iche treinta leles tä hin'ol, elh weihalhapej i'pe lew'ute asno wet niyatej hupuy tä ihi. Wet häp treinta hupuy tä lewuhuy lhamel ifwalasna kamaj õyen lheya Jaír Kahupuy.
5Tä Jaír ileyej p'ante honhat, õtjänch'oye tä ihi hupuy tä lhey Kamón.
Amón lhayis iwoyeje m'ak tä äytajche häp Israel lhayis
6Israel lhayis yachajo tä iwoye p'ante m'ak tä ni'isa. Lhamel ileyej Lhawuk wet yen lewuhuya Ba'al lhayis tä häpe dios lhayis tä kamatachehen, lhäy'e häp dios tsinhay tä kamatachehen tä lhey Astarté lhayis. Häte n'okwiyej dios lhayis tä lew'etes Aram, Sidón, Moab, Amón, lhäy'e Filisteo lhayis laka dios lhayis. 7Häp tä tamenej tä Lhawuk itiyej lewäk wet nemhit tach'ote, wet Filisteo lhayis lhäy'e Amón lhayis ikalhi lhamel. 8Tälhe ifwalastso pajtha dieciocho nekchämis tä Filisteo lhayis lhäy'e Amón lhayis yäm äytajche m'ak tä iwoyeje Israel lhayis tä ihi Galaad tä tumej tewok Jordán lhip elh tä ihi Amorreo lhayis kahonhat. 9Wet Amón lhayis yistho p'ante tewok yämthilek iwo ka'tshayajayej Judá kawichi, Benjamín kawichi, lhäy'e Efraín kawichi. Tä mälhyejtso, Israel lhayis wuj tä nilhak'alwethä. 10Wet nech'e lhamel t'änch'oye Lhawuk wet yok:
–Olhamel ottay ahilä tä owoye m'ak tä ni'isa. Ole amej tä ahäpe olhamel oka Dios wet oyen owuhuya dios lhayis tä kamatachehen.
11Lhawuk nichulho lhamel wet yok:
–Amel lehanej ihi wichi tä iwoyeje p'ante achätilis m'ak tä ni'isa, häp wichi tä ihi Egipto, lhäy'e Amorreo lhayis, Amón lhayis, Filisteo lhayis, 12lhäy'e wichi tä ihi Sidón, lhäy'e Amalek lhayis, lhäy'e Madián lhayis. Wet tä lhamel t'änpej n'och'oye, ofwayhtejenpej nilhokej letayhfwastso. 13Mat tej tä amel lehanayej täjtso thayej, amel leleyay at n'oyej wet lhenay awuhuya dios lhayis iyhäj. Häp tä tamenej tä tek ofwayhthila amejen atayhfwas. 14Mat dios lhayis tä amel letatshupiye, häp tä is chik lehoyaye. ¡Wet änch'oye, is chik lhamel tach'ot amehen wet ifwayhat amejen alhaklina!
15Tä Israel lhayis iläte Lhawuk lhämetna, wet nichulho tä yok:
–Olhamel owoye t'at osukyajay. Woyej n'oyehen m'ak tä am lehuminche. Mat olhaip'altsen ame, ¡fwayhat n'ohen fwalana!
16Wet lhamel itiyej kanhi dios lhayis tä w'enha lhamejen wet yachajo tä yen häpeya laka Dios Lhawuk. Wet tä lham hiw'en lhamel lelhakli, nemhit tumej lehilä lep'altsenyaj tä itiyej lhamel.
17Wet Amón lhayis kanifwotaj lhaihutwek tä ihi Galaad, wet Israel lhayis lhamel lhaihutwek tä ihi Mispa. 18Wet häp Israel lhayis tä lew'et Galaad, lhäy'e laka niyatey, lhamel yok:
–Hin'o chik häpe chik lhayen lhetekayej n'oka'tshayaj wet tatayhlä Amón lhayis, häpkhila n'amel lhaka niyat tä lhamya.
