Hin'o tä lhey Jefté
1Iche p'ante hin'o tä lhey Jefté tä wuj tä takhajay wet ihanej tä iwo laka'tshayaja. Lham ihi t'at honhat tä Galaad, häpe atsinha tä kain'oyaj länek tä lhäs, wet hin'o tä lajcha lhey t'at Galaad. 2Wet häp Galaad lech'efwa tä lhamya häte iwo lelesa. Wet tä thänhäy, lhamel yokwes Jefté wet yok:
–Ihichet'a m'ak chik ojcha lakäywet chik alewuk, tsi ako w'enha lhamej.
3Tä mälhyejtso, Jefté yikch'oye lhamel wet ilethanlä, wet yen w'eta honhat tä lhey Tob. Wet iche hin'ol tä amukwelis tä ihoye wet yikche tä ilunhen.
4Tä paj p'ante, Amón lhayis inuye Israel lhayis, 5wet niyatey tä ihi Galaad iwo chenekaye Jefté tä ihi Tob. 6Tä lhamel nichäte, wet yok:
–Lhuu, a'en olhamel oka niyata, yämthilek y'attayhlä Amón lhayis.
7Jefté nichulho lhamel wet yok:
–Amel len'äyihte n'oho wet lhokwesten'o tä oihi ojcha lew'et. Wet athana, ¿chipte tä let'uyay n'okwe tä alhakli ihi?
8Lhamel yok:
–Tä olhamel olhakli ihi, häp tä ot'u amche. Ot'uhläk lenekche olhamel wet letatayhlä Amón lhayis wet ahäpe t'at olhamel oka niyat tä ihi Galaad.
9Jefté nichulho lhamel wet yok:
–Tä amel let'uyayhläk oyäpil amehen yämthilek ottayhlä Amón lhayis, wet chik Lhawuk tach'ot n'oye wet okalhi lhamel, ohäpkhila amel aka niyat.
10Niyatey yok:
–Matche, wet op'elitses t'at chik n'am wohiyela ämet. Lhawuk iläte olhamel olhämetna.
11Tä mälhyejtso, Jefté yikche t'at lhamel wet wichi yen laka niyata. Tä lhamel ihi Mispa, Jefté yachajo lhämtes tä ihi tä Lhawuk tatache.
Amón lhayis ne'tek Israel lhayis yachaje honhat tä lewuk p'ante lhamel
12Wet Jefté iwo chenekaye Amón lhayis kaniyat wet yok:
–¿Atsi m'ak tä tamenej tä let'uhläk lenuye oka honhat?
13Amón lhayis kaniyat nichulho wet yok:
–Tä achätilis tälhe p'ante Egipto, lhamel isoyej p'ante olhamel ochätilis laka honhat, tälhe tewok Arnón pajtha nichäte tewok Jabok wet äp nichäte tewok Jordán. Athana yej n'äyej, nachaj n'oyehen.
14Wet Jefté yachajo tä iwo chenekaye Amón lhayis kaniyat, 15wet yok:
–Häp täja lhämet Jefté: Olhamel ochätilis isohiyejt'a p'ante achätilis laka honhat, wet isohiyejt'a Moab lhayis kahonhat. 16Tä lhamel tälhe p'ante Egipto, inukwe t'at honhat tä ts'anis yäk nichäte p'ante Lewomekchät, wet äp ihoye Kadés. 17Wet lhamel ichene p'ante lhämet häp niyat tä ihi Edom yämthilek iwahnej chik lhamel inukwe lham laka honhat, mat iwohiyet'a. Häte lhamel t'alhe p'ante niyat tä ihi Moab yämthilek tach'anlhaye lhamel chik inukwe lham laka honhat, mat lhamtej iwohiyet'a. Tä mälhyejtso, lhamel ihi t'at Kadés.
18“Tä paj p'ante, lhamel yikfwasen t'at tä inukwe ts'anis. Ilunej honhates tä Edom lhäy'e Moab pajtha nichäte p'ante Moab lhip tä tumej hichä, wet häp p'ante tä lhamel yenlhi lakasthawet, lhamel p'ante ihi tewok Arnón lhip tä tumej ufwey. Mat lhamel tek yistho p'ante tewok, tsi häpe t'at lhip tä lewuk Moab lhayis.
19“Wet äp lhamel p'ante ichene lhämet Sehón, Amorreo lhayis kaniyat tä ihi Hesbón, yämthilek iwahnej chik lhamel inukwe lham laka honhat wet ihoye honhat tä lewuk lhamel. 20Mat Sehón nowaye lhamel, wet tach'anlhahiyet'a chik inukwe lham laka honhat. Mat ihutwek laka nifwotaj wet lhaihuthiwek honhat lhip tä lhey Jahas, wet inuye p'ante lhamel.
21“Mat lhamel Lewuk Dios tach'ote p'ante laka wichi, wet lhamel ikalhi Sehón lhäy'e laka nifwotaj. Wet häp p'ante tä Israel lhayis lhayen lewuhuya nilhokej honhattso tä Amorreo lhayis ihi, 22tälhe tewok Arnón pajtha nichäte tewok Jabok, wet tälhe ts'anis pajtha nichäte tewok Jordán.
23“¿Chiwoye tä mälhyejtso, hä let'uhläk leso n'oyejen m'ak tä olhamel Owuk Dios isoyej p'ante lewuhuy wet hiw'en n'ohohen? 24¿Chiwoyek am aka dios Quemós hiw'en amhohen p'iya m'ak chik häpe, lhen häpeya m'ak tä alewuk t'at? Olhamel häte oyen häpeya m'ak tä olewuhuy t'at m'ak tä olhamel Owuk Dios hiw'en n'ohohen. 25¿Wok hä lefwetaj lenu'pe Balac, häp Sipor lhäs, tä häpe niyat p'ante ihi Moab? Mat lhek tetshan, lham nekhit'a n'oyehen yämthilek tatayhlä olhamel. 26Athana trescientos nekchämis tä olhamel oihi t'at Hesbón lhäy'e Aroer, lhäy'e wichi lew'etes tä tott'ahomche, lhäy'e nilhokej wichi lew'etes tä ichehen lhipey tewok Arnón. ¿Chipte tä amel kat'alhaye yämthilek olhamel oyachaj amehen nilhokej honhatestso häp ifwalas tä tajyämetso?
27“Ihichet'a m'ak chik ni'isak owoyej ame. Am t'at tä ni'isa m'ak tä lewoye tä lenek yämthilek lenu n'oyehen. Mat olhamel Owuk Dios häpe N'okalelhthayajwo. Lhamlak itetshan iyhäj chik is alhoho m'ak tä iwoye, amel wok olhamel.”
28Matkat Amón lhayis kaniyat iwohiyet'a Jefté lhämet.
Jefté hit'untejche lhämet tä iwoyeje Lhawuk
29Wet Lhawuk laka Espíritu iho'pe Jefté, wet yik tä inukwe Galaad, lhäy'e Manasés kahonhat, wet ihoye Mispa tä ihi Galaad. Tälhe honhattso, tujlhache lew'ekyaj pajtha nichäte Amón lhayis kahonhat. 30Wet hit'untejche Lhawuk häp lhämet tä yok:
–Chik letach'ot n'oye yämthilek okalhi Amón lhayis, 31wet chik oyäpil, elh chik ichun chik inuphä tä tälhchufwi owukwe wet iho n'ohlä tä otälhe oka'tshayaj, owunhihola wet oyenla awayhata.
32Wet Jefté inuye Amón lhayis wet Lhawuk tach'ote yämthilek ikalhi lhamel. 33Wujpey Amón lhayis tä Jefté ilänhen, wet ikalhi veinte hupuy lhayis, tälhe Aroer lhäy'e Minit yäk nichäte Abel-keramim. Mälhyejtso tä Israel lhayis ikalhi p'ante Amón lhayis.
34Tä Jefté yäple lew'et tä ihi Mispa, elh tä ihohlä häpe t'at lhäse, takatinlhi t'at wet y'aji pandereta. Häpe lhäse tä weihalha, ihichet'a leles iyhäj. 35Wet Jefté hich'esaj lham lew'uy tä letetnek tä wuj lelhakli tä itiyej lhäse tä hiw'enlä. Wet t'än tä yok:
–¡Yäse, matche tä lelän n'oyej olhakli! ¡Hap'at iwoye am t'at tä lewo owit'äyhyaja, tsi pajchenaj ot'untejche olhämet häp Lhawuk, wet athana ohanhiyejt'a owoyneje chik n'am nämla matche!
36Lhutsha nichulho lajcha wet yok:
–Ijcha, chik let'unhatchen'aj ämet tä lefwenho Lhawuk, woyej at n'oye ämetn'aj lewoye. Tsi lham tach'ot ame wet lekalhi t'at atayhfwas Amón lhayis. 37Tajlhama tä ot'alhej ame chik lewahin n'oyej yämthilek ohoye chenhas wel'as täkwfwas, lhäy'e okaya'fwas, wet oyen lhafwyhayaja tä oy'il tä kamaj tek olhay'ajej hin'o chik häpe.
38Wet Jefté tach'anlhaye t'at, wet lhutsha ihoye chenhas, lhäy'e lakaya'fwas, wet tafwlhi t'at tä y'il tä kamaj tek lhay'ajej hin'o chik häpe. 39Tä tajyäme täjtso, yäple lajcha wet lham nech'e yäm matche lhämet tä iwoyeje häp Lhawuk. Tä mälhyejtso, Jefté lhäse y'il tä kamaj niwohit hin'o chik lhay'ajej. 40Häp tä tamenej tä Israel lhayis yen keya, tä nichätepej nekchäm atsinha lhutshay yikhen tä tafwchehchä cuatro ifwalas tä lhamel yen tichunhayaja Jefté lhäse.
