Jue 13

₁Israel lhayis yachajo tä iwoye m'ak tä ni'isa, wet Lhawuk nemhit tach'ote lhamel. Tä mälhyejtso, Filisteo lhayis ikalhi wet lhayen lewuka pajtha cuarenta nekchämis.

₂Wet iche p'ante hin'o tä lhey Manoa tä iyej Dan kawichi tä ihi hupuy tä lhey Sora. Wet atsinha tä lech'efwa iwohit'a lelesa, sufwnaj t'at. ₃Wet Lhawuk laka ángel lhain'ältej atsinhatso wet yok:

–Lhek yahin, am ahäpe atsinha tä sufwnaj t'at wet lewohit'a alesa. Mat athana lech'otshanhila wet lewohla äsa. ₄Tälhe fwalana yej yäyej vino wok hat'es chik häpe, wet yej tufw m'ak tä lakokhayaj ihi. ₅Wet tälhe fwala tä äs nichätchä, yej lhisetche lew'ole. Tsi häp han'äfwajtso õyenla Dios t'amajcheta, häpkhila Nazareo tälhe fwala tä nech'e lham iche, wet häpkhilek iwo tesa tä ifwayhtej Israel häp Filisteo lhayis.

₆Wet atsinha yik tä ifwenho lech'efwa wet yok:

–Dios lakawo ihone n'oye wet wuj tä iselkatn'o. Lham hätet iwoyek häpe t'at Dios laka ángel. Wet olham tek oty'ätshane atsi tä häpe lham, wet lham ifwenhit'a n'oho. ₇Mat yok, “Lech'otshanhila wet lewohla äsa. Wet tälhe fwalana yej yäyej vino wok hat'es chik häpe, wet yej tufw m'ak tä lakokhayaj ihi. Tsi han'äfwaj õyenla Dios t'amajcheta, häpkhila Nazareo tälhe fwala tä nech'e iche pajla'tha nichäte fwalak y'inhila.”

₈Tä Manoa iläte, iwo t'alhyajaye Lhawuk wet yok:

–Iwuk, olhaip'altsen ame, is chik lhachajo tä lechen n'oyehen akawo, häpkhilek ichufwen n'oyejen m'ak tä is chik olhamel owohiyejela han'äfwaj chik ihichela.

₉Wet Dios iwoye Manoa t'alhyaj, wet yachajo tä ángel lhain'ältej häp atsinha tä lham ihi lelafwek. Wet tä lech'efwa Manoa newawhäye, ₁₀atsinha inu alhoho tä iwo silätaye wet yok:

–¡Manoa, lhu, hin'onaj iho n'oye äp yachajo tä näm!

₁₁Manoa yikche tä ihoye, tä nichäte wet tahuyej tä yok:

–¿Hä ahäpe hin'on'aj tahuyej och'efwa fwala elh naji?

Hin'o nichulho wet yok:

–Ohäpe t'at.

₁₂Tä mälhyejtso, Manoa yok:

–Chik nichäthiyela fwala tä lhayäm matche m'ak tä lefwel n'ohohen, ¿atsihila m'ak chik olhamel owoye yämthilek ochihelit han'äfwaj? ¿Wet atsihila m'ak chik owoyeje?

₁₃Lhawuk laka ángel nichulho wet yok:

–Is chik hach'efwa iwoye nilhokej m'ak tä pajche ofwenho. ₁₄Isit'ak iyäyej vino wok hat'es chik häpe, wet isit'ak tufw m'ak tä häpe uvas tä õyenlhi wok m'ak tä lakokhayaj ihi. Is chik iwoye nilhokej olhämtes.

_15-16Manoa nitäfwenhiyejt'a tä häpe t'at Lhawuk laka ángel. Wet tahuyej tä yok:

–Woye tä owoye, is chik ka'eka ayej, wet oyenhilhila amho kaylafwaj yämthilek y'atufw.

Mat ángel nichulho wet yok:

–Tej chik n'am nek, mat ohanhiyejt'a chik otufw lhip äk. Mat is chik lhenlhi wet lewunho, yämthilek lhen han'okhayajayej häp Lhawuk.

₁₇Wet Manoa tahuyej ángel wet yok:

–¿Chip iwoye ey? Is chik lefwel n'ohohen häpkhilek ontichun hach'oye chik nichäte ifwalak lhayäm matche m'ak tä lefwel n'ohohen.

₁₈Mat ángel nichulho wet yok:

–¿Chipte tä let'uhläk lehanej olhey? Häpe m'ak tä nin'äla tä wuj tä isilataj.

₁₉Wet Manoa tachuma kayla lhäsaj lhäy'e yachuyaj lhay tä yen Dios t'awayhata. Wet iti'pe tunte wet iwunho tä yen n'okhayajayej Lhawuk. Wet nech'e Lhawuk iwoye m'ak tä Manoa lhäy'e lech'efwa lhäy'e lhip tä iseltejen tä hiw'en. ₂₀Tä itäj lhal tiyäj kaphä, Manoa lhäy'e lech'efwa lhamel hiw'en tä Lhawuk laka ángel yikche t'at itäj lhal wet tiyäj puleye. Tä mälhyejtso, lhamel takhosche katsi. ₂₁Manoa nitäfwelej tä häpe Lhawuk laka ángel, tsi lhamel nemhit hiw'en. ₂₂Wet Manoa tahuyej lech'efwa wet yok:

–¡Matche tä y'at'inhenla, tsi y'aw'en t'at Dios!

₂₃Mat lech'efwa nichulho wet yok:

–Chik Lhawuk t'uhihläk n'ailänhen, lham tek tachumhin'ehlä m'ak tä y'awunho lhäy'e m'ak tä y'en t'awayhata. Wet äp tek ipäynhin'e n'amehen m'ak tä y'aw'enne, wet tek ihichen'e m'ak chik lham ifwel n'amhohen.

₂₄Wet tä nichäte p'ante lewhäy, Manoa lech'efwa iwo lhäsa wet yen lheya Sansón. Lhaichihelit t'at han'äfwaj, wet Lhawuk takäpfwayeje m'ak tä is.

₂₅Fwala elh p'ante Sansón ihi Dan lhayis kasthawet tä Sora tumej lhip elh wet Estaol tumej lhip elh. Wet iwo tesa tä takhajayej Lhawuk laka Espíritu.