Sansón t'ukwe lech'efwa tä Filisteo laka'tsinha
1Fwala elh p'ante Sansón ihoye hupuy tä lhey Timnat, wet hiw'en Filisteo lhayis ka'tsinha wet ihumin. 2Wet tä yäpil, ifwenho lajcha lhäy'e lako wet yok:
–Ow'en Filisteo lhayis ka'tsinha tä ihi Timnat wet matche tä ohumin. Is chik lheke wet chäj n'oye, oyenla och'efwaya.
3Lhamel nichulho lhäs wet yok:
–¿Chipte tä let'ukwe hach'efwa wet lehoye Filisteo lhayis tä häpehen wichi tä nitäfwelayej Dios tä matche? ¿Hä newache atsinhay tä iyej wichi tä häpe n'amel, wok iyhäj Israel lhayis?
Mat Sansón ifwenho lajcha wet yok:
–Is chik lheke atsinhatso wet oyenla och'efwaya, tsi häp tä ohumin.
4Lajcha lhäy'e lako ihanhiyejt'a tä Lhawuk t'at tä t'uhläk Sansón iwoye täjtso, häp tä lham t'ukwe len'äyij yämthilek tatayhlä Filisteo lhayis tä lhamel lhayen lewuka Israel lhayis häp ifwalastso.
5Tä mälhyejtso, Sansón lhäy'e lajcha lhäy'e lako, lhamel ihoye Timnat. Tä Sansón nichäte n'olafwey tä uvas ihiche tä ihi Timnat, iche t'owalhaj tä fwitsaj tä inuye. 6Wet Lhawuk laka Espíritu nichätpe Sansón, wet tej tä newache takwelhele chik ichäjlhi, mat iwo lhipeya t'owalhaj, hätet iwoyek kayla lhäsaj t'at. Wet ifwenhihot'a lajcha lhäy'e lako, 7mat yik t'at tä ihoye häp atsinha lhutsha wet yämhoplhi, wet wuj tä ihumin.
8Tajyäme ifwalas iyhäj, wet Sansón yachajo tä ihoye atsinha yämthilek yen lech'efwaya. Tä nichäte lhip tä lham ilän t'owalhaj, yik'ajch'oye n'äyij yämthilek iyahne t'owalhaj p'itsek, wet hiw'en tä akäyek tä ihi lhiley. 9Wet tachuma, ilanhi wet w'elekej tä tufw. Tä nichäte lajcha lhäy'e lako, hiw'enho lhip wet lhamel tufw t'at. Mat ifwenhihot'a tä tälho t'owalhaj p'itsek tä ilanhi.
Sansón yenlhi lakäjyaj
10Wet Sansón lajcha ihoye atsinha lew'et, wet Sansón iwo lakäjyaja, mälhyej lakey p'ante wichi tä nech'e thänhäy. 11Wet tä Filisteo lhayis hiw'en, t'äne treinta hin'ol yämthilek iyej t'at. 12Wet Sansón tahuyej lhamel wet yok:
–Iche m'ak tä ofwel amhohen. N'älte atsi m'ak tä häpe. Iche siete ifwalas tä y'awo lhakäjyaja, yämthilek lefwel n'oho m'ak tä häpe. Wet chik lefwenla n'oho, aelh weihalhapej ow'enhihola lew'uy tä isilataj lhäy'e lew'uy tä n'okäjyajcha. 13Mat chik amel kafwelaya n'oho ifwalastso, amenlak lew'en n'oho m'ayhay tä oyämetso.
Lhamel nichulho wet yok:
–Fwel n'ohohen, olhamel oläthiyela.
14Tä mälhyejtso, Sansón yok:
“M'ak tä otufw tälho m'ak tä t'ek.
M'ak tä hak'onek tälho m'ak tä takhajay.”
Tä tajyäme p'ante tres ifwalas, lhamel kamaj ihanhiyejt'a m'ak tä häpe. 15Wet ifwala elh lhamel tahuyej laka'tsinha tä Sansón lehumnek wet yok:
–Y'ätshane am Sansón, häpkhilek olhamel ohanej m'ak tä häpe. ¡Chik kawoyaye, olhamel oaip'ohla, lhäy'e ajcha lhäy'e nilhokej lew'et lheley! ¡Oyenek amel let'änay n'oyehen yämthilek leso n'oyejen m'ak tä olewuhuy!
16Wet atsinha ihoye Sansón, wet tafwlhi wet yok:
–¡Lehuminhit'an'o, mat len'äyi n'oho! Tsi lefwenhit'a n'oho m'ak tä letay'ätshaneje ow'etfwas.
Sansón nichulho atsinha wet yok:
–Tetshan, olham ofwenhihot'a ojcha lhäy'e oko häp m'ak tä häpe. Tä mälhyejtso, tej tä ahäpe ohumnek, tek ofwenla amho.
17Matkat atsinha tujlhache t'at tä inityen yämthilek Sansón ifwenho m'ak tä häpe. Wet lhaip'altsene wet tafwlhi t'at pajtha siete ifwalas tä lham iwhäye Sansón tä lhamel iwo lakäjyaja. Tä lepese Sansón ifwenho, wet atsinha nech'e ifwenho hin'ol tä iyej. 18Tä mälhyejtso, ifwalatso tä kamaj kahonatsiya Filisteo lhayis ihoye Sansón wet ifwenho tä yok:
“Akäyek, häp tä hak'onek,
wet t'owalhaj, häp tä takhajay.”
Sansón nichulho lhamel wet yok:
–¡Aisayej atsinha tä ohumnek, häp tä ifwel amhohen m'ak tä oyelhtej amehen!
19Wet Lhawuk laka Espíritu nichätpe Sansón, wet yik tä ihoye hupuy tä Askalón wet ilänhen treinta hin'ol tä ihi. Wet tachuma lhamel lew'uyis wet hiw'enho häp Filisteo lhayis tä nichulho ley'ätnhayaj. Wet tä yäple lajcha lew'et, wuj tä lewäk ihi. 20Wet õhw'enho Sansón lakalay'i häp atsinha tä Sansón lehumnek.
