Jue 15

₁Tajyäme p'ante ifwalastso, wet wichi ilanhi trigo tä wak'alh. Wet Sansón isikaye atsinha tä lehumnek wet ichäj kayla lhäsaj. Tä nichäte lew'et, wet yok:

–Ohoye ohumnek tä ihi lhip tä ihi.

Matkat lakachäti tek iwahinchufwi lewukwe häp Sansón, ₂mat yok:

–Ofwetaj am leleyej t'at olhäse, wet häp tä ow'enho elh akalay'is. Mat iche lech'inhä tä wuj tä isilataj, inu'pe lechita. Häp tä en hach'efwaya, en lahaya lechita.

₃Mat tä Sansón iläte, lhäy'e lhip tä lewäk ihi wet yok:

–¡Athana olhamhit'alak otes chik owit'äyen Filisteo lhayis!

₄Wet yik wet itsokwethä trescientos m'awo lhayis, wet täkwfwaspej yäyitwek lechäsel, wet yäytejen hal'ä pesey. ₅Wet iwunhomche wet yokweschetshi, wet m'awo lhayis inukwe alhoho tä tiyäjo yachuyaj tä lewuk Filisteo lhayis. Wet y'uho trigo tä õ'iskonhen lhäy'e tä kamaj õknista, pajtha nichäte uvas tä ihiche n'olafwey lhäy'e olivos tä ihiche lew'etes. ₆Wet Filisteo lhayis tay'ätshanejlhi tä yok:

–¿Atsi tä lewoynejek täjtso?

Wet iyhäj yok:

–Häpe t'at Sansón, iwo hayahlä m'ak tä lakachäti iwoyeje tä isoyej lhäse wet hiw'enho lakalay'i.

Tä lhamel iläte, yike atsinha wet hip'o, lhäy'e lajcha.

₇Wet Sansón yok:

–¡Tä amel lewoynejetso m'ak tä lewoyej n'oye, olehiyejt'a mat otujlhahichela m'ak tä owoye, pajla'tha oha ihi ahilähen!

₈Wet inuye Filisteo lhayis wet ilänhen wet wuj tä iwo m'akayejen. Tä ileyej, yik tä ihoye chowej tä ihi chenaj tä ihi Etam, wet yen lew'eta.

₉Nämhen p'ante Filisteo lhayis wet iwo w'etahi Judá. Wet lhaihutche honhattso pajtha nichäte hupuy tä lhey Lehi. ₁₀Wet Judá lhayis tay'ätshane lhamel wet yok:

–¿Chipte tä lenu n'oyehen?

Filisteo lhayis nichulho wet yok:

–Olhamel oneke Sansón yämthilek otsoklhi wet owoyeje m'ak tä iwoyej n'oyehen.

₁₁Tä Judá lhayis iläte, wet tres mil lhamel yikhen tä ihoye chenaj tä ihi Etam. Tä lhamel nichäte chowej tä Sansón ihi, wet tahuyej tä yok:

–¿Hä kahanayej tä olhamel oichufwi Filisteo lhayis lakhajyhayaj? ¿Chipte tä lewoyej n'oyehen owit'äyhyaja?

Sansón nichulho wet yok:

–Owo lahayayej m'ak tä lhamel iwoyej n'oye.

₁₂Wet lhamel yok:

–Olhamel onek ame yämthilek oyachaj ame lhamel.

Sansón nichulho wet yok:

–¿Hä matche tä amel tek lelänlan'o? Lhek unhatche ämet tä lewoyej n'oye.

₁₃Wet lhamel yok:

–Matche, olhamel tek oailänla. Tajlhama tä ot'uhläk oaitsoklhi wet ohän ame lhamel.

Tä mälhyejtso, lhamel yäytejlhi niyhäy tä nech'ayhis wet inuhatphä tä ihi chowej. ₁₄Tä lhamel nichäte lhip tä lhey Lehi, Filisteo lhayis ihohlä wet t'änhen. Mat Lhawuk laka Espíritu nichätpe Sansón, wet yisthen niyhäy tä õyäytej takweyey, tet iwoyek nit'una. ₁₅Wet hiw'en asno ch'alo lhile tä ikatsi tä nech'e t'at tä nojchehen. Wet tachuma wet yen kahl'äya, wet ilänejen mil Filisteo lhayis. ₁₆Tä ileyej, wet yok:

₁₇Tä ileyej, wet tafwomej asno ch'alo lhile. Wet õyen lheya häp honhattso Ch'alo Lhilew'et.

₁₈Wet Sansón wuj tä ichim, wet t'änch'oye Lhawuk wet yok:

–¿Chipte tä mälhyejtso tä letach'ot n'oye wet okalhi t'at otayhfwas tä wuj, wet athana letach'anlhaye chik oy'ilej tä ochim, häpkhilek wichi tä nitäfwela amej itsoklhin'o?

₁₉Tä mälhyejtso, Lhawuk ifwoyenche chowej tä ihi honhattso wet inät tälhche, wet Sansón iyäyej wet yachajo tä takhajay. Häp tä tamenej tä inätw'ettso õyen lheya Õt'änch'oye. Wet kamaj ihi t'at yäk fwalana.

₂₀Sansón niyatej p'ante veinte nekchämis häp Israel lhayis, häp ifwalas tä Filisteo lhayis lhayen lewuka honhat.