Jue 16

₁Fwala elh p'ante Sansón yik tä ihoye hupuy tä lhey Gaza. Tä nichäte, hiw'en atsinha tä kain'oyaj länek wet ihoye lew'et yämthilek imäyej. ₂Wet tä wichi ihanch'oye tä Sansón ihi hupuy, lhamel ilunej lew'et tä ihi, wet iyahinlhi t'at häp n'olafwek tä hupuy lep'ot lepe imälhewek ifwala. Tä honatsi letamsekis ihi, inihilhi t'at wet yokwe:

–Chik nech'e fwala häpkhilek y'alän.

₃Mat Sansón imä pajtha honaj chowej. Wet nech'e n'om, nephä wet ilanhi lepe, hip'ajtej letsutes lhäy'e lecha tä õhp'alkateji wet tilhäj, ihänpe chenaj tä atojphä tä tatayhlä Hebrón.

₄Tä tajyäme täjtso, Sansón ihumin atsinha tä lhey Dalila tä lew'et ihi honhat tä w'awulhchä tä lhey Sorek. ₅Wet Filisteo lhayis kaniyatey lhamel ihoye Dalila, wet tahuyej tä yok:

–Wo akanyajayej Sansón, wet y'ätshaneje chi tälhi lakhajyhayaj tä wuj tä iyej, yämthilek olhamel otsoklhi wet oyäyitlhi wet oyen okawoya. Wet olhamel owohla lahaya amej häp achumet tä lewoye, elh weihalhapej olhamel ow'enla amho mil cien (1.100) chinaj t'äj.

Wet lhamel yikch'oye Dalila. ₆Tä paj atsinhatso tahuyej Sansón wet yok:

–Lhek fwel n'oho, ¿chi tä tälhi akhajyhayaj tä wuj? ¿Hä ohanej owoyneja chik oainayhitlhi wet nemhit lekalhik lefwetaj alelanhi?

₇Sansón nichulho atsinha wet yok:

–Chik lenayhit n'oyej siete lutsej hal'ä t'akay tä nech'ayhis tä kamaj niwujak tamchäy, nemla otkhajay, omälhhiyejat iwoye hin'o chik häpe.

₈Tä mälhyejtso, Filisteo lhayis kaniyatey ihäne Dalila siete lutsej hal'ä t'akay tä nech'ayhis tä kamaj niwujak tamchäy, wet lham yäytejlhi häp Sansón. ₉Wet tä hin'ol ihi t'at Dalila lew'et tä lhaiskathen, Dalila t'än wet yok:

–¡Sansón, nämhen Filisteo lhayis!

Wet Sansón yisthen t'akay tä õyäytejlhi, mälhyej chik nit'una. Wet Filisteo lhayis ihanhiyejt'a tälhi Sansón lakhajyhayaj tä iyej.

₁₀Wet Dalila tahuyej Sansón wet yok:

–¡Let'akan n'oyej! ¡Matche tä lefwech'enlhin'o! Mat athana nech'e äm matche ämet, fwel n'oho atsi m'ak chik owoye chik oainayhit yämthilek nemhit lekalhik lefwetaj alelanhi.

₁₁Sansón nichulho atsinha wet yok:

–Chik lenayhit n'oyej niyhäy tä nech'ayhis tä kamaj õknichumyenalhi, nemla otkhajay, omälhhiyejat iwoye hin'o chik häpe.

₁₂Tä mälhyejtso, Dalila tachuma niyhäy tä nech'ayhis wet yäytejlhi häp Sansón. Wet t'än tä yok:

–¡Sansón, nämhen Filisteo lhayis!

Mälhyej lhampej iche t'at hin'ol tä ihi t'at Dalila lew'et tä lhaiskathen. Mat Sansón yisthen niyhäytso, mälhyej chik lelemsas.

₁₃Wet Dalila tahuyej Sansón wet yok:

–¡Kamaj letujlhache t'at tä let'akan n'oyej! ¡Kamaj lefwech'enlhitn'o! Fwel n'oho m'ak chik owoye yämthilek nemhit lekalhik lefwetaj alelanhi.

Sansón nichulho atsinha wet yok:

–M'ak tä is chik lewoye, chuma tson'ataj w'ole tä õ'pätsin, wet pätsinejchehen ow'oley tä letihi siete tä lepätsinchehen. Wet käjchä hal'ä tä ihi honhat wet häp tä äytej ow'ole. Lew'enla tä nemla otkhajay, omälhhiyejat iwoye hin'o chik häpe.

Tä mälhyejtso, Dalila imäyen Sansón wet nech'e yenlhi mälhyej tä Sansón ne'tek iwoye. ₁₄Wet tä wak'alh, nech'e t'än mälhyej lakeypej, yok:

–¡Sansón, nämhen Filisteo lhayis!

Matkat Sansón nephä wet nämhi hal'ä tä õ'käjchä, wet äp nämhi n'oyik tä õ'pätsinejche lew'ole.

₁₅Tä mälhyejtso, Dalila yok:

–¡W'et letahuylhi! ¿Chipte tä lefwech'enlhin'o tä lefwetaj lehuminn'o? Tsi nech'e tres veces tä leläkwlhin'o, wet kamaj lefwenhit'a n'oho chi tälhi akhajyhayaj tä wuj tä i'amej.

₁₆Wet tä wuj lhämtes tä iwoye fwalapej fwalapej wet ilehiyejt'a tä inityen, tä lepese Sansón y'elej tsi wuj tä äytaj letichunhayaj. ₁₇Wet matche, nech'e ifwenho t'at atsinha häp m'ak tä häpe lakhajyhayaj. Wet yok:

–Nehit katsik yisetche ow'ole, tsi tälhe tä nech'e oiche ohäpe t'at Dios t'amajchet, ohäpe Nazareo. Chik õyisetche ow'ole, tatäy t'at okhajyhayaj, noj t'at, omälhyej iwoye hin'o chik häpe.

₁₈Tä Dalila nitäfwelej tä nech'e matche tä ihanej m'ak tä häpe tä Sansón lakhajyhayaj, iwo chenekaye Filisteo lhayis kaniyatey wet yok:

–¡Lhuyay, athana Sansón nech'e matche tä ifwel n'oho m'ak tä lakhajyhayaj tälhe!

Tä mälhyejtso, lhamel yikhen tä ihoye Dalila, wet ichäje chinaj t'äj tä pajche ifwenho. ₁₉Wet Dalila imäyenpe lhechey häp Sansón, wet t'äne hin'o yämthilek yisetche lew'ole tä ihi siete tä ipätsinchehen. Tä ileyej, wet Sansón nemhit lakhajyhayaj ihi. ₂₀Wet mälhyej lhampej Dalila istun Sansón wet yok:

–¡Sansón, nämhen Filisteo lhayis!

Wet Sansón n'om tä imä, fwetaj lhaiwoyneje tä iwoyepej. Mat nemhit ikalh lhamhi, tsi athana Lhawuk nemhit iyej. ₂₁Tä mälhyejtso, Filisteo lhayis itsoklhi wet ilanche tatelhoy. Wet ihäne hupuy tä Gaza wet inayhtej chinhas tä bronce, wet ithatho n'op'onthi wet ne'tek ilunkat fwelhek tä tunte.

₂₂Matkat tä paj yachajo tä lhaichihelit lew'ole.

₂₃Tajyäme p'ante ifwalas iyhäj, wet Filisteo lhayis kaniyatey lhaihutwek yämthilek iwo käjyajayej tä ikalhi letayhfwa Sansón. Wet lhamel ilänhen itshätäy tä yen n'okhayajayej laka dios Dagón. Wet ichoywethä wet yok:

₂₄Wet tä wichi hiw'en Sansón, häte ichoywethä wet iwunit laka dios wet yok:

₂₅Wet tä lhamel wuj lakäjyaj tä iwoye, ne'tek õ'häne lhamel häp Sansón yämthilek ikoyej. Tä mälhyejtso, õyike tä ihi n'op'onthi wet õ'tonphä. Wet õ'häne lhamel tä ihi hup tä wuj, wet wuj tä ikoyej Sansón tä iläkwlhi. Wet õ'tihi lechowej ch'utey tä wusche, ₂₆wet Sansón tahuyej häp han'äfwaj tä itsok takwey wet yok:

–Yej tonte n'oho ch'utey, häpkhilek otsok wet olhaithatej.

₂₇Wet nilhokej Filisteo lhayis kaniyatey lhamel lhaihuthiwek häp huptso, häte iche wujpey hin'ol lhäy'e atsinhay. Wet iche tres mil wichi tä ihi lhip tä tumphä tä lhamel itetshan iyhäj tä ikoyejlhi häp Sansón wet iläkwlhi. ₂₈Wet Sansón nech'e t'änch'oye Lhawuk wet yok:

–Iwuk Dios, yej p'ethat n'ohlä. Olhaip'altsen ame, w'en n'oho okhajyhayaj athana wet tajlhama, häpkhilek owo lahayayej Filisteo lhayis häp ottelhoy tä lhamel ilanche.

₂₉Wet nech'e tachasch'oye häp ch'utey tä wusche tä ihi lechowej häp hup, wet itsok. ₃₀Wet nech'e t'än wet yok:

–¡Filisteo lhayis, is chik lep'ak n'oyej tä oy'il!

Tä iwoyetso, wet ihuttshi ch'uteytso, wet hup waschä wet nichätpe niyatey lhäy'e nilhokej wichi tä ihi. Wujpey lhamel tä y'inhen, inu'pe tä lham Sansón ilänhen tä kamaj iläy.

₃₁Wet nämhen Sansón lepuhfwas lhäy'e nilhokej lew'etfwas, wet ichäj lep'itsek wet tajänch'oye tä ihi lajcha Manoa lep'itsekw'et tä ihi honhat tä hupuy tä Sora tumej lhip elh wet Estaol tumej lhip elh. Häp veinte nekchämis p'ante tä Sansón niyatej Israel lhayis, wet y'il.