Jue 17

₁Iche p'ante hin'o tä lhey Micaías, lham ihi t'at chenhas tä ihi honhat tä lewuk Efraín kawichi. _2-3Wet lham lhaifwenho p'ante lako wet yok:

–Häp aka chinaj t'äj tä mil cien (1.100) tä õt'etane, wet letakäpfwayeje lewit'äyhyaj häp elh tä t'etane, olham tä in'oyej, tsi olham t'at tä ot'etane. Mat athana onachaj ame, tsi olätenaj tä lhäme häp chinaj t'äjna tä pajche lhen amajchetayej häp Lhawuk, let'uhläk lew'enho hin'o yämthilek yenlhi n'ocheyä wet hip'oyejpe plata.

Wet yachaje t'at lako häp chinaj t'äj. Wet lako yok:

–Yäs, is chik Lhawuk takäpfway ame.

₄Wet atsinha hiw'enho elh hin'o doscientos chinaj t'äj yämthilek yenlhi n'ocheyä tä hip'oyejpe plata. Tä wak'alh, itihi häp Micaías lewukwe. ₅Iche lech'o elh tä lham yen len'okhayajw'eta, wet yenlhi efod tä ihi. Häte yenhoplhi lecheyä häp lew'et lheley, wet yen häpeya sacerdote elh leles tä hin'ol. ₆Tsi tä kamaj newache p'ante rey tä iyej Israel lhayis häp ifwalastso, elhpej iwoye t'at m'ak tä lham ihuminche.

₇Iche p'ante hin'o mamse tä iyej Judá kawichi tä ihi Belén. Lham häpe Leví leles elh tä kalew'eta tä ihi honhattso. ₈Wet häp mamsetso yikch'oye Belén wet yik tä t'ukwe lhip chik yenla lew'eta. Wet tä ilunche chenhas tä ihi honhat tä lewuk Efraín kawichi, nichäte p'ante Micaías lew'et. ₉Wet Micaías tay'ätshane wet yok:

–¿Atsi honhat tä letälhe?

Mamse nichulho wet yok:

–Otälhe Belén tä ihi Judá. Ohäpe Leví leles elh, ot'ukwe honhat chik oyenla ow'eta.

₁₀Tä Micaías iläte, wet yok:

–Is chik lhe n'oyej kana. Wet oayenla häpeya oka sacerdote, wet amälhhiyejat iwoyek ojcha t'at. Wet owohla akahaya diez chinaj t'äj nekchämpej, wet op'ajthiyeja äk lhäy'e haw'uyis.

₁₁Tä mälhyejtso, Leví lhästso iwoye wet iyej t'at häp Micaías lew'et. Wet matche, hätet iwoyek lhäs t'at häp Micaías. ₁₂Wet Micaías yen häpeya laka sacerdote, wet iyej t'at tä ihi lew'et. ₁₃Wet Micaías letichunhayaj yok, “Athana ohanej tä Lhawuk takäpfwayhiyeja n'oye lakäpfwayajay tä isen. Tsi oisej Leví leles elh tä oyen häpeya oka sacerdote.”