Leví leles elh lhäy'e atsinha tä iyej
1Häp ifwalas p'ante kamaj Israel lhayis newache laka rey, iche hin'o tä Leví leles elh tä lew'et honhat lhip tä wuj tä atofwe tä ihi chenhas tä lewuk Efraín kawichi. Wet tachuma atsinha tä lew'et Belén tä ihi Judá, wet iyej t'at. 2Mat ifwala elh p'ante wet atsinhatso fwitsaje hin'o, wet yik tä yäple Belén wet iyej t'at häp lajcha. Wet tä tajyäme cuatro iwel'as, 3Leví lhästso yik tä t'ukwe atsinha tä lech'efwa yämthilek iwo chalayejlhi wet yachaje lew'et. Ichäj lakawo lhäy'e asnolis täkwfwas, wet tä nichäte lakachätiw'et, atsinha tachumlä. 4Tä lakachäti hiw'en, wuj tä akäjlhi wet tachumlä, wet yok:
–Is chik lhekana ifwalas iyhäj.
Tä mälhyejtso, Leví lhäs lhäy'e lakawo lhamel iyej tres ifwalas. Lemäwet iche t'at wet lhamel t'ekhen wet iyä. 5Wet tä cuatro ifwalas p'ante, lhamel nechephä tä nech'e fwamlafwaj wet lhaiwaklhathen yämthilek yikhen tä yäpil. Mat Leví lhäs lakachäti ihoye wet tahuyej tä yok:
–Is chik let'ek ayej lhimphaj tä kamaj ka'eka, häpkhilek atkhajay t'at.
6Tä mälhyejtso, lham lhäy'e lakachäti lhamel tatachephä wet t'ekhen wet iyä. Wet nech'e lakachäti tahuyej wet yok:
–Is chik lhekana honatsina wet wo akäjyaja. Mälat chik fwala.
7Mat Leví lhäs nephä tsi t'uhläk yik t'at. Matkat lakachäti inityen, tä lepese iwoye, ileche tä fwetaj yik. 8Nech'e cinco ifwalas, tä mälhyejtso tä nech'e fwamlafwaj Leví lhäs nephä, wet lhaiwaklhathen yämthilek yikhen. Matkat lakachäti yachajo tä inityen wet yok:
–Is chik let'ek ayej tä kamaj ka'eka, häpkhilek atkhajay t'at.
Tä mälhyejtso, lham lhäy'e lakachäti lhamel t'ekhen t'at pajtha honaj. 9Wet Leví lhäs nephä tä t'uhläk yik t'at, lhäy'e lech'efwa, lhäy'e lakawo. Matkat lakachäti yok:
–Lhek yahinya, honaj t'at, pajiyejt'ak honatsihila. Is chik lemä kana, wo akäjyaja wet mälak nech'e fwala.
10Matkat Leví lhäs nemhit t'uhläk iwoye. Mat lhamel yikhen t'at, lham lhäy'e lakawo, lhäy'e atsinha tä iyej, wet iche'pe asnolis.
Leví lhäs lhäy'e iyhäj tä yikche nichäte Gabaa
11Tä lhamel tott'aye p'ante Jebús, wok ifwalasna yok Jerusalén, lakawo tahuyej Leví lhäs wet yok:
–¿Chiwoyek y'amähi honatsina häp Jebús lhayis kahupuyni?
12-13Leví lhäs nichulho lakawo wet yok:
–Kha, isit'ak y'amähi hupuy tä kahäpeya Israel lhayis lew'et. N'atujlhache t'at lhan'äyij pajla'tha y'anchäte Gabaa wok Ramá p'iya, häpkhilek y'ehi chik honatsi.
14Tä mälhyejtso, lhamel tujlhache t'at len'äyij pajtha y'uy ifwala. Wet lhamel nichäte Gabaa tä häpe hupuy tä lewuk Benjamín kawichi. 15Wet lhamel tatsäche n'äyij tä tiyäjo häp hupuytso yämthilek imähi. Tä nichäte, wet lhamel tatachephä tä i'alhoye, tsi newache hin'o chik hip'altsen yämthilek ihäne lew'et.
16Tä paj tä honatsi t'at, näm hin'o tä thaläkw tä tälhe lelafwek tä tachumlhi. Lham tälhe p'ante honhat tä chenhas ihi tä lewuk Efraín kawichi, mat ifwalastso ihi t'at Gabaa tä lewuk Benjamín kawichi. 17Wet tä hiw'en Leví leles elh, tay'ätshane wet yok:
–¿Chi letälhi, wet chi lehohi?
18Leví lhäs nichulho wet yok:
–Olhamel otälhe Belén tä Judá lhip, wet ohoye lhip tä wuj tä atofwe tä ihi chenhas tä lewuk Efraín kawichi, häp tä olham ow'et. Oihinaj Belén wet athana oyäpil t'at. Mat tä oikana newache elh chik hip'altsenn'o yämthilek iwo ow'eta ayej. 19Ow'en t'at hup tä ow'utey asnolis lhäk, wet olhamel olhäk iche t'at, olham lhäy'e och'efwa lhäy'e okawo. Tek wo m'ak chik owatlä.
20Tä hin'otso iläte, wet yok:
–Atamsek i'amej. M'ak at chik häpe chik lewatlä, olham t'at tä otetshanhila. Ohuminhit'a chik lhe alhoye tä honatsi.
21Tä mälhyejtso, hin'otso ihäne lew'et wet hiw'enhomche lhäk häp asnolis. Wet Leví lhäs lhäy'e lhamel tä iyej ilejen lepach'ol. Tä ileyej, wet t'ekhen wet iyä.
Gabaa lheley iwoye p'ante m'ak tä hich'atej tä ni'isa
22Wet tä lhamel wuj tä akäswethä, nämhen hin'ol tä wuj tä ni'isahen tä lew'et hupuytso, wet ilunejlhi hup tä Leví lhäs ichufwi. Wet ipäjlhi lepe, wet tahuye hin'o tä hup lewuk wet yok:
–¡Tonphä hin'o tä asiyak tä näme haw'et! ¡Olhamel ot'uhläk omäyej!
23Matkat hin'o tä lewuk hup ihoye lhamel wet yok:
–¡Yaiyhäj, olhaip'altsen amehen! ¡Yej woye m'ak tä ni'isa, tsi hin'ona olham tä ohäne ow'et! 24Ch'ahuye olhämet. Ikana olhäse tä kamaj tek lhay'ajej hin'o chik häpe. Häte ikana hin'ona lech'efwa. Otonhiphäla lhamel yämthilek amel lewoyeje m'ak tä lewatlä. Mat häp hin'ona yej woyeje m'ak tä ni'isa.
25Mat hin'oltso iwohiyet'a. Tä mälhyejtso, Leví lhäs ihut alhoye häp atsinha tä lech'efwa, wet lhamel hip'ajtitchä wet wuj tä iwoyeje m'ak tä ni'isa pajtha ifwalayej. Wet nech'e lhamel ileyej. 26Wet atsinha yik tä yäple hup tä lech'efwa ichufwi. Tä nichäte lepe, nichät katsi tä y'il. 27Wet tä nephä Leví lhäs, ifwoyenche lepe yämthilek lhamel yikhen. Wet hiw'en lech'efwa tä ihi lepe tä nichät katsi, takweyey itpe lepe lhip. 28Wet tahuyej atsinha wet yok:
–¡Nephä, n'ekhen!
Mat atsinha nichulhihot'a, y'il t'at. Tä mälhyejtso, Leví lhäs tachuma lep'itsek wet iti'pe asno, wet tilhäje lew'et. 29Tä nichäte, tachuma laka tsonhat wet iwo lhipeya lep'itsek. Itihi doce lhipey wet ichene lhip weihalhapej häp wichi tä wusche'pe tä tälhehen letetsel tä ihi doce tä häpehen Israel lhayis. 30Wet nilhokej wichi tä hiw'en yok:
–Tälhe ifwala p'ante Israel lhayis tälho Egipto, ihichet'a m'ak chik ow'en chik mälhyej iwoye täja. N'atetshan m'ak tä y'awohiyela.
