Lhawuk laka ángel ihi Bokim
1-2Lhawuk laka ángel tälhe p'ante Gilgal wet ihoye Bokim. Wet tahuyej Israel lhayis wet yok:
–Olham otonphähte amel achätilis tä ihi Egipto. Wet ohän amehen honhatna tä pajche ofwenho lhamel tä oyok, “Chik amel akap'ajtayej wichi tä lew'et häp honhat tä ow'enla amhohen, wet lewasthiche lhamel laka altares, olham tek otäyhthila olhämet tä ot'unhatche amejen.” Matkat amel lewohiyet'a olhämet. ¡Lhek yahin m'ak tä amel lewoyaye! 3Tä mälhyejtso, ofwel amhohen, oyok, Oyokwesit'ala wichi tä amel lheyayej. Mat lhamel häpkhihena atayhfwas wet laka dios lhayis aitsoklawethä.
4Tä Lhawuk laka ángel ileyej tä yämlhi, nilhokej Israel lhayis wuj tä tafwchehchä. 5Wet häp tä tamenej tä õyen lheya Bokim häp lhiptso. Bokim häpe n'olhämet tä õyok, N'olhafwyhayaj. Wet lhamel ilänhen itshätäy tä yen n'okhayajayej häp Lhawuk.
Josué ileyej honhat
6Josué iwo p'ante tsilhekayej Israel lhayis, wet nilhokej lhamel iyhäjpej yäpnho laka honhat tä õhw'enho wet lhayen lewuka. 7Wet lhamel ilehiyejt'a tä yen häpeya laka Dios Lhawuk häp fwalas tä Josué iläy, wet häte fwalas tä lham ileyej honhat, lhäy'e tä kamaj iläyhen hin'ol tä thänhäy tä hiw'enej m'ayhay tä Israel lhayis iseltejen tä Lhawuk iwoye tä tach'ote lhamel.
8Wet Josué ileyej p'ante honhat tä hiw'en ciento diez nekchämis. 9Wet õtjänch'oye tä ihi laka honhat tä lhey Timnat-sera tä ihi chenhas tä lewuk Efraín kawichi tä tumej chenaj tä lhey Gaas lhip tä tafwojhiye. 10Häte y'inhen p'ante nilhokej Israel lhayis tä Josué lew'awlhafwas. Wet wichi tä nech'e ichehen p'ante lhamel ihanhiyejt'a ihi Lhawuk lhäy'e lech'otyaj tä itiyej p'ante lajchalis.
Israel lhayis ileyej p'ante Lhawuk
11Fwalas p'antetso Lhawuk wuj tä y'ulhanej Israel lhayis m'ak tä ni'isa tä iwoye. Lhamel yen lewuhuya Ba'al lhayis, häp dios lhayis tä kamatachehen, 12wet ileyej Lhawuk, lhamel lechätilis laka Dios tä itonphä p'ante tä ihi Egipto. Lhamel yen lewuka wet n'okwiyej häp wichi tä iwhäye laka dios lhayis, wet häp tä iwäkyhayen Lhawuk. 13Lhamel ileyej Lhawuk wet iwujyen häp Ba'al lhayis lhäy'e dios tsinhay tä kamatachehen tä lhey Astarté lhayis. 14Häp tä tamenej tä Lhawuk itiyej lewäk Israel lhayis, wet tach'anlhaye letayhfwas tä inuye wet isoyej m'ak tä iyej. Lhawuk yachaje lhamel häp letayhfwas tä i'pe honhat, wet letayhfwas ikalhi. 15Tä Israel lhayis yikhenpej tä iwo laka'tshayaja, Lhawuk tach'othiyet'a, wet wuj tä lewit'äyhyaj ihipej lhamel, mälhyej tä pajche Lhawuk ifwenho.
Mat tej tä mälhyejtso m'ak tä Lhawuk iwoyeje p'ante Israel lhayis, 16häte iwopej laka niyata yämthilek tach'ote wet ifwayhtej wichi tä isoyejwethä m'ak tä iyej. 17Mat häte Israel lhayis tach'ahuhiyet'a laka niyatpej tä Lhawuk hiw'enho lhamel. Mat ileyej t'at Lhawuk, hätet iwoye kain'oyaj länhay, wet n'okwiyej dios lhayis tä kamatachehen. Lhamel lechätilis p'ante iwoye t'at Lhawuk lhämtes, mat häp lhamel itetshanhit'a wet itenhit'a m'ak tä lechätilis iwoye p'ante. 18Wet tä Lhawuk iwopej laka niyata lhamel, Lhawuk tach'ote t'at wet ifwayhtejpej letayhfwas häp laka wichi, tsi hip'altsen t'at tä iläte lhamel lelhakli. 19Matkat tä y'ilpej laka niyat tä iyej lhamel, yachajopej tä iwoye m'ak tä hich'atej tä ni'isa, inu'pe m'ak tä ni'isa tä lajchalis iwoye. Wet lhamel yen lewuhuya dios lhayis tä kamatachehen wet itiyej len'okhayaj. Wet hit'unthen lehusey wet ilehiyejt'a tä iwoye m'ayhay tä ni'isa. 20Häp tä tamenej tä Lhawuk wuj tä itiyej lewäk häp Israel. Wet yok:
–Wichina inäk'äs olhämette ot'untejche lechätilis wet lhamel iwohiyet'a olhämet. 21Tä mälhyejtso, tek oyokwesila wichi chik häpek Josué nokwesa tä lham kamaj iläy.
22Wet häp täjtso m'ak tä Lhawuk iwoyejepej Israel lhayis. T'uhläk hiw'en chik lhamel kamaj tujlhache tä yen Lewuka häp lham, mälhyej lechätilis p'ante iwoye, wok ileyej. 23Häp tä tamenej tä Lhawuk tek ikelit yämthilek yokwes wichi p'ante nachajaye Josué. Mat tach'anlhaye t'at tä iyej Israel lhayis.
