Jue 20

₁Nilhokej Israel lhayis yikch'oye lew'etes, tälhe Dan tä ihi lhip tä tafwojhiye yäk nichäte lhamel tä lew'et Beerseba tä ihi lhip tä tapinhiye, lhäy'e iyhäj tä tälhe honhat tä Galaad. Lhamel lhaip'ajtitwek tä ihi tä Lhawuk tatache tä lhamel ihi hupuy tä lhey Mispa. ₂Wet nilhokej laka niyatey tä nämhen, wet iche cuatrocientos mil (400.000) hin'ol tä takwelheley tä lefwajnhates iyej tä takasthen. ₃Wet häp Benjamín kawichi itoyne tä Israel lhayis lhaihutwek tä ihi Mispa.

Wet Israel lhayis tay'ätshane häp Leví lhäs wet yok:

–¿Atsin'aj m'ak tä õ'woyneje atsinha tä õ'län?

₄Leví lhäs nichulho wet yok:

–Olham lhäy'e och'efwa olhamel onekhen tä otälhe Belén. Wet onäme hupuy tä Gabaa, häp Benjamín kawichi, yämthilek omähi. ₅Mat tä honatsi nämhen hin'ol tä lew'et, wet lhamel ilunejlhi hup tä olhamel oichufwitso tä lhamel t'uhläk ilänn'o. Wet tachuma och'efwa wet hip'ajtitchä wet iwoyeje m'ak tä ni'isa, pajtha y'il t'at. ₆Wet häp tä otchuma lep'itsek wet owo lhipeya, wet ochene nilhokej Israel lhayis tä ihi honhat yämthilek lhamel ihanej n'olänekna tä lhäy'e lhip tä õyen läkwika. ₇Wet athana amel tä ahäpehen Israel lhayis, amel t'at tä letetshan m'ak tä lewohiyela.

₈Wet nilhokej wichi takasthen wet yok:

–Nilhokej n'amel tä y'ekana ihichet'a elh chik yäpnhiyela lew'et. ₉Mat is chik y'awo sorteaya häpkhilek kalelhäj n'aiyhäj chik inuhiyela Gabaa. ₁₀Wet is chik iche elh weihalha diezpej wichi tä w'enhayej tä t'ukweho lhäk sip'äl iyhäj. Wet nilhokej iyhäj inuhiyela Gabaa yämthilek iwo lahayayej lhamel häp leläkwyhanyaj tä itiyej Israel lhayis.

₁₁Tä mälhyejtso, nilhokej Israel lhayis lhaip'ajtitwek yämthilek inuye häp hupuy tä Gabaa. ₁₂Mat chunkat lhamel ichene lhämet nilhokej honhates tä Benjamín kawichi lew'etes. Wet yok:

–¿Chipte tä õ'tiyej n'oläkwyhanyaj häp elh tä õ'län tä ihi amel haw'et? ¿Atsi m'ak tä tamenej? ₁₃¡Lhek achaj n'oyehen häp Gabaa lheleyn'aj iwoye täjtso! Olhamel olänhihena häpkhilek noj häp m'ak tä kok'aye tä iyej Israel lhayis.

Matkat Benjamín kawichi iwohiyet'a iyhäj Israel lhayis lhämet. ₁₄Mat lhamel tälhomche lew'etes wet ihoye Gabaa, wet lhaihuthiwek yämthilek tatayhlä iyhäj Israel lhayis. ₁₅Wet iche veintiséis mil (26.000) sip'äl tä takwelheley tä lefwajnhates iyej, lhäy'e setecientos hin'ol tä takhajayhen tä ihi Gabaa. ₁₆Lhameltso häpehen iyhäj tä ts'amak lhayis, wet äp lhäy'e lhip tä takwey iseji häp lakalanlhi. Tej chik lhämsaj m'ak chik tiyäjej tunte, taj t'at. Ihanhiyejt'a chik nitaja m'ak chik tiyäj. ₁₇Wet Israel lhayis iyhäj iche cuatrocientos mil (400.000) hin'ol tä wuj tä ihanej yämthilek iwo laka'tshayaja.

₁₈Ifwalatso Israel lhayis ihoye Dios lew'et tä ihi Betel. Wet tay'ätshane Dios wet yok:

–¿Atsihila oiyhäj chik ichunej tä inuye Benjamín kawichi?

Lhawuk nichulho lhamel wet yok:

–Is chik Judá kawichi chik ichunej tä inuye.

₁₉Tä mälhyejtso, Israel lhayis nechephä tä nech'e fwamlafwaj, wet lhamel ihi lhip tä tatayhlä Gabaa. ₂₀Tä wak'alhen, lhamel yikhen wet iwo tesa laka'tshayaj. ₂₁Matkat Benjamín kawichi lhamel inuphä tä tälho hupuy wet tatayhlä iyhäj. Wet ifwalatso ilänhen veintidós mil (22.000) Israel lhayis.

_22-24Tä mälhyejtso, Israel lhayis yäple Betel wet lhamel wuj tä tafwchehchä tä ihi tä Lhawuk tatache pajtha honatsi. Wet lhamel yachajo tä tay'ätshane häp Lhawuk wet yok:

–¿Hä is chik olhamel otujlhache p'iya yämthilek onuye häp opuhfwas tä Benjamín kawichi?

Wet Lhawuk ne'tek lhamel tujlhache t'at. Tä mälhyejtso, Israel lhayis lhaikhajyenhen, wet ifwala elh yachajo tä lhamel ihoye lhip tä pajche ihi tä iwo laka'tshayaja. Wet yachajo tä inuye häp Benjamín kawichi. ₂₅Matkat Benjamín kawichi inuphä tä tälho Gabaa wet tatayhlä lhamel. Wet äp ilänhen dieciocho mil (18.000) Israel lhayis kasip'äl.

₂₆Tä mälhyejtso, yachajo tä nilhokej Israel lhayis ihoye Betel, wet lhamel wuj tä tafwchehchä tä ihi tä Lhawuk tatache. Wet ifwala imälhewek lhamel t'ekhihent'a, wet ilänhen itshätäy wet iwunhomche yämthilek yen n'okhayajayej Lhawuk. Häte ilänhen iyhäj itshätäy wet hiw'enho Lhawuk yämthilek lha'isyene.

_27-28Häp ifwalastso Arca tä N'ot'amajchet tä Lhawuk lhämtes lehi ihi t'at häp Betel. Wet laka sacerdote häpe p'ante Finees, Eleazar lhäs wet lechäti häpe t'at Aarón. Wet Israel lhayis tay'ätshane p'ante häp Lhawuk wet yok:

–¿Hä is chik olhamel oyachajo tä onuye häp opuhfwas tä Benjamín kawichi, wok oleyej p'iya?

Wet Lhawuk yok:

–Achajo tä lenuye chik fwala. Olham otch'otla amehen yämthilek lekalhayhi.

₂₉Tä Israel lhayis iläte Lhawuk lhämettso, iyhäj lhamel lhaiskathen tä ilunejlhi häp hupuy tä Gabaa. ₃₀Wet chik ifwala elh iyhäj yachajo tä ihoye tä hupuy tatache wet lhaiwaklhathen yämthilek iwo laka'tshayaja, mälhyej tä pajchepej lhamel iwoye. ₃₁Wet yachajo tä inuphä häp Benjamín kawichi tä tälho hupuy yämthilek iwo laka'tshayajayej häp Israel lhayis. Wet lhamel ilänhen treinta Israel lhayis tä lhamel tiyäjche n'äyij tä tälhe Betel lhäy'e Gabaa wet iche tayhi. ₃₂Wet lhamel yenek Israel lhayis inukwe alhoho tä ilethanlä lhamel wet ikalhi mälhyej lhampej. Matkat Israel lhayis inukwe alhoho tä t'uhläk letayhfwas ihän wet atofwehlä lhamel lew'et. ₃₃Wet nech'e Israel lhayis ihoye lhip tä lhey Fwitsuk Wuk, wet lhaiwaklhatej yämthilek tatayhlä Benjamín kawichi. Wet häp iyhäj tä lhaiskathen tä iwhäye hupuy tä Gabaa, lhamel yikch'oye lhip tä ihi ₃₄wet inuye hupuy. Iche diez mil hin'ol tä wuj tä takhajayhen tä inuye Gabaa. Wet matche tä äytaj n'oka'tshayaj, wet Benjamín kawichi ihanhiyejt'a tä tatäy t'at lhamel. ₃₅Tsi Lhawuk tach'ote Israel lhayis yämthilek ikalhi Benjamín kasip'äl, wet häp ifwalatso Israel lhayis ilänhen veinticinco mil cien (25.100) lhamel. ₃₆Tä mälhyejtso, Benjamín kawichi nech'e nitäfwelej tä tatäy t'at lhamel.

Israel lhayis pajche tach'anlhaye Benjamín kawichi, tsi lhamel t'ekhaye häp iyhäj tä lhaiskathen tä iwhäye häp Gabaa yämthilek inuye. ₃₇Wet häp hin'oltso lhamel iselkat tä inuye hupuy, wet ilänhen nilhokej wichi tä ihi. ₃₈Wet lhamel pajche ifwenho iyhäj tä yok:

–Chik olhamel osakanej hupuy wet okalhi, owunhihola. Wet chik amel lew'enaye tutsaj chik tälho, ₃₉kasitahlä wichi tä aihänwethä wet tayhlä.

Häp Benjamín kawichi pajche ilänhen treinta Israel lhayis, wet lhamel yok:

–Y'akalhi t'at, hätet iwoye täjnaj äp y'alänhen fwala elh naji.

₄₀Matkat nech'e n'äle tutsaj tä tälho hupuy, wet tä lhamel iyahne, ihanej tä y'uho t'at. ₄₁Wet nech'e Israel lhayis tatayhlä Benjamín kawichi, wet nech'e lhamel inuhat lhamhohen tsi hiw'en t'at lewit'äyhyaj. ₄₂Wet lhamel yikhen tä inukwe alhoho tä ilethanhen, wet tiyäjche n'äyij tä tiyäje ts'anis. Mat ihanhiyejt'a iwoyneje yämthilek lhaifwayhtej häp Israel lhayis. Tsi tä Israel lhayis iyhäj ileyej tä iwasthi hupuy, lhamel yistejlä wichi tä fwetaj ilethanhen, wet ilänhen. ₄₃Tä mälhyejtso, Benjamín kawichi ihi t'at lechowej häp Israel lhayis. Wet takähännhej wet ilänhen, tälhe Menúha pajtha nichäte Gabaa lhip tä tumej hichä.

₄₄Wet y'inhen dieciocho mil (18.000) Benjamín kawichi tä wuj tä takhajayhen. ₄₅Wet häp iyhäj lhamel tiyäje chenaj tä lhey Rimón tä ihi ts'anis, mat cinco mil lhamel õ'länhen tä inukwehen n'äyhäy. Wet häp Israel lhayis tujlhache t'at tä takähännhej, wet ilänhen dos mil. ₄₆Wet häp tä ifwalatso Israel lhayis ilänhen veinticinco mil (25.000) Benjamín kasip'äl tä wuj tä takhajayhen. ₄₇Wet seiscientos iyhäj lhamel inukwe alhoho wet yikhen tä ihoye honhat tä ts'anis. Wet lhamel ihi häp chenaj tä Rimón pajtha cuatro iwel'as. ₄₈Wet häp Israel lhayis inuye Benjamín kawichi iyhäj tä ihiche lew'etes, wet ilänhen lhamel, lhäy'e leläy, wet iwunhomche hupuy.