Madián lhayis iwasthi p'ante Israel lhayis laka honhates
1Israel lhayis yachajo tä iwoye m'ak tä ni'isa, wet Lhawuk nemhit tach'ote. Wet letayhfwas Madián lhayis niyatej lhamel siete nekchämis. 2Wet tä Madián lhayis lhäy'epej lhip tä yäm äytajche m'ak tä itiyej Israel lhayis, wet häp tä lhamel lhaiskathen tä ihi chenhas, wet yen lew'etesa chowhay, wet wuj tä atha chik iche elh chik hiw'en wok nichäte lhip tä ihi. 3Wet tä Israel lhayis tutcheyhen, Madián lhayis lhäy'e Amalek lhayis, lhäy'e wichi tä lew'et tumej hichä, inuyepej wet iwo laka'tshayajayej. 4-5Lhamel nämhenpej tä iche'pe camellos wet iwo w'etahi Israel. Matche tä wujtaj'atpey lhamel, hätet iwoye chol tä i'pe honhat, wet nehit katsik ihanej chik iwo t'ufwahtesa. Ichäj lhamchehen lewukwey tä tsänt'ähes lhäy'e leläy wet iwasthi honhat. Ikänchi yachuyaj tä ihiche Israel lhayis lafwey pajtha nichäte honhat tä Gaza. Wet isoyej Israel lhayis leläy tson'atas, w'asetas, lhäy'e asnolis, yämthilek matche tä p'elitses lhamel, newache m'ak chik tufw. 6Wet tä Madián lhayis iwoyeje m'ak tä lhäy'e lhip tä äytajche häp Israel lhayis, wuj tä lewit'äyhyaj ihi. Matkat tä lepese lhamel t'alhe Lhawuk yämthilek tach'ote.
7Wet tä lhamel lhaip'altsene p'ante Lhawuk yämthilek ifwayhtej Madián lhayis, 8wet lham ichene laka profeta. Wet tahuyej Israel lhayis wet yok:
–Häp Lhawuk, Israel laka Dios, yok, “Olham otonphähte amel achätilis tä ihi Egipto wet ofwayhtejen lhamel tä yen lakwenkaya. 9Häte ofwayhatte amejen wichi iyhäj tä ailhaklitwethä, wet oyokwes tä ihi honhat tä amel lenukwe, wet ow'en amhohen lhamel laka honhates yämthilek alewuhuy t'at. 10Wet ofwelte amhohen tä oyohtekwe, Ohäpe amel Awuk Dios. Tä amel lheyayhi Amorreo lhayis kahonhat, yej n'okwiyayej lhamel laka dios lhayis. Matkat amel lewohiyet'a olhämet.”
Dios t'äne Gedeón
11Tä tajyäme täjtso, näm Lhawuk laka ángel wet tatayphä tä ichufwi hal'ätaj tä ihi wichi lew'et tä lhey Ofra tä lewuk Joás, häp Abiezer leles tä lepes lheley elh. Wet häp lew'ettso, iche lehi tä lhamel ithathopej uvas tä yenlhi vino. Wet lehitso häp tä Gedeón, Joás lhäs, ihi tä isaphi trigo tä iskatho Madián lhayis yämthilek niw'ena. 12Wet Lhawuk laka ángel lhain'ältej Gedeón, wet tahuyej wet yok:
–¡Lhawuk i'amej, hin'o tä n'oka'tshayajcha wet khajnaj!
13Gedeón nichulho wet yok:
–Iwuk, chik matche tä Lhawuk in'oyejen, ¿chipte tä in'oyejen owit'äyhyajna? ¿Chipte tä olhamel n'am w'en m'ayhay tä ischehen tä ojchalis ifwelpej n'ohohen tä yok, “Lhawuk itonphähte olhamel tä oihi Egipto”? Oyenek Lhawuk iwom olhamel, wet yachaj n'oyehen Madián lhayis lakhajyhayaj.
14Wet Lhawuk iyahin Gedeón wet yok:
–Mäh, chumyenlhi akhajyhayaj tä i'amej wet fwayhtejen Israel häp Madián lhayis. Olham tä olhämet amej.
15Mat Gedeón yachajo tä nichulho wet yok:
–Mat iwuk, ¿chip iwoyek olham ofwayhthila Israel? Tsi olham w'et om'ayek t'at tä oiyej ow'et tä hich'atej tä häpe wichi tä p'elitses tä iyej Manasés kawichi.
16Lhawuk yok:
–Olham oihla amej. Lekalhihila Madián lhayis, hätehlat iwoyek weihalha hin'o chik lekalhi.
17Tä mälhyejtso, Gedeón yok:
–Chik matche tä a'akäjlhi n'oyej, wo atetnekayej tä len'älit tä kalelhäj tä am t'at tä letahuy n'oyej. 18Woye tä owoye, yej lhekach'oye täja pajla'tha otpil kana wet ochäj awayhat.
Lhawuk nichulho wet yok:
–Owoye t'at, oyikhit'ala pajla'tha lenäm.
19Gedeón yik tä yäple lew'et, wet ilän kayla lhäsaj, wet tachuma diez kilos harina wet yenlhi pan tä levadura newayej. Tä wak'alh, tachuma itshäwet t'isan wet ithatho lehi tuskal tä õyenlhi, wet t'i itsäyho towej, wet yik tä ihäne Dios laka ángel tä ichufwi hal'ä. 20Wet ángel yok:
–Ti'pe tunte häp itshäwet t'isan lhäy'e pan tä levadura newayej, wet tsäype t'i tä ihi towej.
Gedeón iwoye. Tä wak'alh, 21nech'e ángel itijtej letsut tä ihi takwey, wet itäj tälho tunte wet iwunho nilhokej itshäwet t'isan lhäy'e pan. Häpet tä mälhyejtso, ángel yik wet Gedeón nemhit hiw'en. 22Wet nech'e Gedeón nitäfwelej tä häpe t'at Lhawuk laka ángel. Wet yok:
–¡Iwuk Dios, matche tä op'elitsaj t'at! ¡Tsi ottey hiw'en t'at aka ángel!
23Mat Lhawuk nichulho wet yok:
–Yej noway, atamsek ihi, let'inhit'ala.
24Wet Gedeón yenlhi altar tä itihi lhiptso yämthilek iwunit häp Lhawuk. Wet iwo lheya altartso wet yok, “Lhawuk häpe N'otamsek.” Wet fwalasna kamaj iche t'at, ihi t'at Ofra, häp Abiezer kawichi lew'et.
Gedeón iwasthi Ba'al laka altar
25Tä honatsi p'ante Lhawuk tahuyej Gedeón wet yok:
–Chuma w'asetaj tä asnak tä ajcha lelä, häp w'asetaj tä segundo tä siete nekchämis. Wet äp that katsi Ba'al laka altar tä lewuk ajcha. Häte iset hal'ä tä õyen t'amajcheta tä iwhäye. 26Wet äm is tä lhenlhi n'oho altar tä ohäpe Awuk Dios, tila'pe chenaj. Wet chumela w'asetaj, län wet tila'pe altar tä lhenlhi n'oho. Wet chumela häp hal'ä tä pajche lhiset, wet häp tä lhenla lehukwa tä lewunej häp itshäwet tä lhen han'okhayaja n'oyej.
27Tä mälhyejtso, Gedeón t'äne diez hin'ol tä lakawos wet iwoye m'ak tä Lhawuk ifwenho. Mat iwoye tä honatsi, iwohiyet'a tä ifwala tsi nowaye lajcha lepuhfwas lhäy'e wichi iyhäj.
28Tä ifwala elh tä nechephä wichi, hiw'en Ba'al laka altar tä wasi t'at. Häte hal'ä tä õyen t'amajcheta tä iwhäye altartso tä äp pajche õyiset t'at. Wet äp w'asetaj i'pe altar tä nech'e wak'alh wet õ'wunej. 29Wet wichi tay'ätshan lhamehen wet yok:
–¿Atsi tä lhenek täja?
Wet lhamel t'ukwe hin'o tä lhenek. Tä lepese lhamel ihanej ihi tä häpe t'at Gedeón, Joás lhäs. 30Wet lhamel ifwenho Joás wet yok:
–¡Hän alhoye äs! ¡Olhamel olänla, tsi iwasthi Ba'al laka altar wet äp yiset hal'ä tä n'ot'amajchet tä iwhäye!
31Mat Joás nichulho wichi wet yok:
–¿Hä len'äyej Ba'al wet lewoyay aka'tshayaja'pe? Chik Ba'al häpe dios, is chik lham t'at tä tatayhlä hin'o tä iwasthi altar tä lewuk. ¡Elh chik iwo ka'tshayaja'pe Ba'al, is chik y'il ifwalana!
32Wet häp tä tälhe ifwalatso õyen lheya Jeruba'al häp Gedeón. Tsi lhamel yok, “Is chik Ba'al tatayhlä, häp tä Gedeón iwasthi altar tä lewuk.”
Gedeón t'alhe Lhawuk häp letetnek tä wuj
33Nilhokej wichi tä Madián lhayis lhäy'e Amalek lhayis, lhäy'e wichi tä lew'et tumej hichä, lhamel lhaihutwek wet yistho tewok Jordán, wet iwo lew'etahi lakawayhi tä lhey Jezreel. 34Wet Lhawuk laka Espíritu nichätpe Gedeón, wet yafwutche lefwol tson'ataj ch'u yämthilek Abiezer kawichi lhaihute. 35Wet iwo chenekaye wichi tä tälhe letes Manasés yämthilek nämhen wet lhaip'ajtej lhamel. Häte iwo chenekaye wichi tä tälhe letetsel Aser, Zabulón lhäy'e Neftalí, wet nilhokej lhamel nämhen wet lhaip'ajtej. 36Wet Gedeón tahuyej Dios wet yok:
–Chik matche ämet tä lhenn'o akawoyayej yämthilek ofwayhat Israel lhayis, 37otihihila tson'ataj t'äj häp lew'et tä osaphi trigo. Wet chik nech'e fwala takhalhi lew'ole mat tamchäy honhat tä ihi, ohanhiyeja tä matche t'at tä lhen akawoya n'oyej yämthilek ofwayhat Israel lhayis, mälhyej tä lefwel n'oho.
38Wet mälhyej p'antetso. Tä Gedeón nephä tä nech'e fwamlafwaj, tachuma tson'ataj t'äj wet hits'ifwnhi. Wet itihlä n'olhäthi häp inät tä tälho, wet tapoyej, mälhyet m'ak tä t'un'ajläk mälhyejtso.
39Mat tä Gedeón hiw'en, wet äp yok:
–Yej lhen tesa n'oyej tä äp oyachajo, wet nech'e tajlhamhiyela. Athana is chik tamchäy t'at tson'ataj w'ole, ts'ilak honhat tä ihi tä is chik takhalhi.
40Wet honajchetso Dios iwoyneje m'ak tä Gedeón iwatlä. Tä nech'e fwala tamchäy t'at tson'ataj w'ole, tajlhama honhat tä ihi tä takhalhi.
