Jeremías tay'ätshaneje Dios m'ak tä tamenej häp wichi tä ni'isahen tet häp chik is t'at m'ak tä iyej
1Iwuk, tej chik olham otumej ame m'ak tä lewoye,
mat n'äl tä ahäpe t'at Elh
tä lakalelhthayaj is alhoho.
Tha häp tä ot'uhläk oty'ätshanej ame
m'ak tä iche tä ow'en.
¿Chipte tä isya lhamel tä ni'isahen?
¿Chipte tä letamsekis ihiche wichi tä akantses?
2Am t'at tä letihiche lew'etes lhamel,
tet iwoye hal'äy tä letihchä,
wet lhaichihelthen t'at wet iwo lhaya.
Lhamel iwopej eya mat lehusey atofwe ahilä.
3Mat olham, Iwuk, wuj tä letäfwel n'oyej
wet äp lew'en'atn'o,
wet lehanej tä wuj tä oaihumin.
Chäj kanhi wichitso, tech'aynej tson'atas
tä õ'chäje itshätäy tä õ'länhen lew'et.
Amajejlä lhamel ifwala tä lewhäy n'olänyaj.
4¿Chihlatek nem tamchäy honhat
wet yachajo tä hup w'atshan?
Häp itshätäy lhäy'e afwenchey
nehläs ilänhen wet y'inhen.
Wichi t'at tä tamenej,
tsi lhamel iwoye m'ak tä ni'isa wet äp yok:
“Dios hiw'enhit'a m'ak tä y'awoye.”
Dios nichulho Jeremías wet yok:
5“Tä letatayhlä wichi tä t'äsche honhat, wet let'el,
¿wet chihla lewoye chik letatayhlä
wichi tä lew'utey ihi?
Tä lhehi honhat tä isphä, atamsek ihi.
¿Wet chihla lewoye chik lhehi
hon'al tä wusche'pe tä iche tewok lhipey?
6Y'aje lhamel tä apuhfwas tä ikan amej,
lhamel t'änhen tä aihänlhi.
Yeja t'ekhaye lhamel,
tej chik isis lhämtes thayej.
Äytajche Lhawuk lewäk tä itiyej laka wichi
7“Oleyej oka wichi wet nemhit owo lahaya,
oyachaje letayhfwas ohumnhay.
8Häp wichina tä olham tä Olewuk,
nech'e mälhyej at iwoye häp t'owalhaj
tä ihi tayhi tä tatay n'ohlä.
Häp tä tamenej tä oy'ulhan.
9Wet oka wichi mälhyej iwoye
afwenche tä lew'ole isilataj
tä iyhäj afwenchey tatayhlä.
¡Itshätäy tä fwitses, lhuyay,
ap'ajtej afwenchey tä n'okotsestso
wet tufwen oka wichi!
10Wujpe niyatey tä letayhfwas
iwasthi oka honhat wet t'äsche okäsw'et,
wet yen ts'anisa lhip tä matche tä ohumin.
11Tet iwoyek oka honhat lhaihowatshan
wet häp tä wuj tä lelhakli ihi.
Nilhokej lhipey tä wasiche,
wet ihichet'a hin'o chik yen lelhakliya.
12Hin'ol tä fwitses tä isolhi honhat,
lhamel nekche tachenhas tä ts'anis.
Tsi häp tä olham Dios ow'en ofwajnhat
chik olänejen wichi yäk ifwit honhat lepesey,
wet nemhit iche elh chik letamsek ihi.
13Tä tutcheyhen, wet nemhit is,
tajlhama ch'uthanil tä tälho.
Wuj tä tachumwethä,
mat nemhit wo m'ak chik itälhtho.
Niwohit m'ak chik isej lechumtes,
tsi häp tä äytajche owäk tä otiyej lhamel.”
Lhawuk lhämet tä iwoyeje wichi tä ihiche honhatil tä iwhäye Israel
14Häp täja Lhawuk lhämet tä yämeje wichi tä ni'isahen tä ihiche honhatil tä iwhäye lham laka wichi Israel. Lhawuk yok:
–Tä lhamel inuye honhat tä ow'enhohte oka wichi häpkhilek lewuk t'at, wet häp tä oyokwesichephäla lhamel tä ihiche laka honhates, wet otan'isthiyeja Judá lheley tä oyokwesichephäla. 15Mat chik paj op'altsenhiyela wichitso wet onachajihola lhamel häp laka honhates. 16Ifwalasna lhamel ichufwenej oka wichi tä n'okwiyej Ba'al wet iwo lheya häp diostso tä kamatache. Mat chik lhamel lhaichufwenej oka wichi lechumyaj tä is, wet iwo olheya wet n'okwi n'oyej tä ohäpe Dios tä n'ilataj, wet häpkhilek oyen oka wichiya. 17Mat chik iche wichi tä ikachu n'oye, oyokwesichephäla lhamel tä ihiche laka honhates wet oyämla nofwej, tatäy. Olham tä ohäpe Dios tä Israel Lewuk olhämet täjtso.
