Neheläp tä wuj
1Tä iche neheläp tä wuj, wet Lhawuk tahuyej Jeremías wet yok:
2“Honhat tä Judá lhafwyhayaj ihi,
lhäy'e laka hupuy lefwitajayaj ihi.
Wichi äp lhatpe honhat,
wet Jerusalén ifwitsenej lechos tä yäm äytaji.
3Wet lhamel tä lakäywet ihi
ichene lakawos tä t'ukwe inät.
Mat tä lhamel nichäte n'opekis,
nilhokhiyet'a inät.
Wet lhamel tapilej len'äyij,
tek inät ihiche lhäkwey,
nilhak'alwethä wet len'äfwlhi ihi,
wet hip'okwe'pe lhethey.
4Te lhamel tä lechumet häp yachuyaj,
tä lhamel hiw'en tä nem is lechumtes,
wet hip'okwe'pe lhethey
tä wuj tä len'äfwlhi ihi,
tsi ihichet'a pelhay wet honhat tamchäy.
5Wet tson'a lhayis,
tej tä takapuhtshanhen tä i'pe alho,
tha äp iwom'atpe honhat
häp leles tä nech'e ichehen,
tsi häp tä newache hup tä w'atshan chik tuj.
6Wet asno lhayis tä anowayhtses,
lhamel takasthen t'at tä i'pe tachenhas tä ts'anis
wet lhaitihlä leyalh tä yafwuthi,
tä mälhyej iwoye m'awolis.
Wet tatelhoy nemhit isiche,
tsi häp tä nem iche huphas tä w'atshan chik tuj.
Jeremías y'alhyene Lhawuk häp wichi
7Iwuk, olhamel owoyepej m'ak tä ni'isa
wet n'äl t'at tä otes ihi.
Olhamel oleyejpej ot'ekhahyaj,
owopej och'isukyaja wet ottay ahilä.
Mat olhaip'altsen ame,
ch'ot n'oyehen wet fwayhat n'ohen,
häpkhilek n'äl t'at tä ahäpe Dios tä wuj.
8Am t'at tä Israel lhayis iti amej leniwhayaj,
wet oalefwayhthi häp lewhäy p'ante ichepej lewit'äyhyaj.
¿Chipte tä aletech'aynej
elh tä w'enha lhamej tä ihi honhatna?
¿Chipte tä ate iwoye hin'o
tä honatsi tefwaji tä in'oyejen,
wet chik ifwala wet yik?
9¿Chipte tä amälhyej iwoye hin'o tä õ'istun,
wok häp hin'o tä n'oka'tshayajcha
tä nitch'otaye elh?
Tha häp am, Iwuk, lhe n'oyejen
wet aka wichi n'ohen.
Yej lele n'oyejen.
Lhawuk nemhit akäjejlhi laka wichi
10Lhawuk yämeje laka wichi wet yok:
–Lhamel ihumin tä ilunwethä wet lhaifwonpej n'ohlä. Wet häp tä olham nemhit okäjejlhi lhamel, wet tä oyen tichunhayaja lech'isukyajay, häp tä otasnhila lhamel.
11Wet Lhawuk yäm n'oye wet yok:
–Yej t'alhej n'oye wichina letamsek. 12Tej chik lhamel lhaichuyhathen thayej, tek otch'ahuhiyela t'alhyajay. Tej chik iwopej otw'ayhtesa thayej, tek otchumlahlä. Tha otäyhthila lhamel, olänhiyeja n'oka'tshayaj, lhäy'e nehläs, lhäy'e äytes.
13Wet äp onchulho Owuk tä oyok:
–Iwuk Dios, häp profetas ifwenhopej wichi wet yok, “Ihichet'ala n'oka'tshayaj wet ihichet'ala nehläs. Mat Lhawuk hiw'enla amhohen atamsek tä laj lepesa tä ihi honhatna.”
14Wet Lhawuk nichulh n'oho wet yok:
–Profetas fwetaj yen lhämeta olhämtes, mat tek matchehen. Olhamhit'a tä ochen lhamel, tek oyämhoplhi lhamel wet oyenhit'a lewosayej olhämtes. M'ak tä ifwel amhohen häpe n'ow'enhay tä kamatachehen lhäy'e n'on'ältshayaj tä t'akanyaj tä lhamel t'at tä letichunhayaj. 15Olhamhit'a tä ochen profetastso tä fwetaj yen lhämeta olhämet tä yok, “Ihichet'ala n'oka'tshayaj wet ihichet'ala nehläs tä ihi honhatna.” Wet häp tä olham tä Awukn'o oyok, Häp profetastso, iyhäj lhamel y'inhihena tä ihi n'oka'tshayaj wet iyhäj y'inhiyejena nehläs. 16Wet wichi tä tach'ahuye lhamel, te chik nichäte häp n'oka'tshayaj, y'inhihena t'at, wet iyhäj y'inhiyejena nehläs, wet tan'isiyeja lhamel lech'efwas lhäy'e leles. Wet lep'itseyhay lhahichela t'at Jerusalén kahupuy kawayhil, wet ihichet'ala elh chik tajänlä. Wet häpkhila täjtso laha lhamel lakachuhanyaj. 17Wet häp tä fwenho lhamel, ok,
“Is chik nilhokej ifwalas
tä ottet'ilis nitsäyhchä,
ifwalachepej honajchepej,
tsi oka wichi matche tä lewit'äyhyaj ihi,
tet iwoyek tsonhat tä y'uy
tä itshänhomche lhamel.
18Chik olunpe alho,
wet ow'en n'oka'tshayaj länhay,
lep'itseyhay itpe honhat.
Wet chik ohoye hupuy,
wet äp ow'en wichi tä y'ilejen nehläs.
Wet profetas lhäy'e sacerdotes
nech'e õ'häne lhamel häp honhat tä atofwey
tä lhamel nitäfwela'pe.”
Jeremías lhaip'altsene lhamel
19Iwuk, ¿hä nemhit lewo haya Judá?
¿Hä len'äyiho Jerusalén?
¿Chipte tä leti n'oyej olätsek tä lajit lechaya?
Wet y'aniwhihläk lhatamsekis ihi,
mat newache m'ak chik is.
Wet y'aniwhihlä lhachesyaj,
mat tanhoch'aype honhat.
20Matche t'at, Iwuk, tä olhamel
owo och'isukyaja wet ottay ahilä.
Olhaifwelej amho häp m'ak tä ni'isa tä owoye,
lhäy'e häp ochätilis lech'isukyajay.
21¡Yej wom n'ohen!
¡N'älit tä ahäpe Dios tä lewujyaj ihi!
¡Yej lhen w'et m'ayeka Jerusalén
tä häpe aniyatyajw'et tä isilataj!
¡Tichunche ämtes p'ante let'unhatche n'oyejen
wet yej leche!
22Ihichet'a n'ocheyä tä pelhay tälhe.
Pules ihanhiyejt'a lhaiwoyneja chik itsäyhchä inät.
Iwuk Dios, am tä lechenpej pelhay
lhäy'e tä lhenlhi nilhokej m'ayhay tä i'pe honhat.
Häp tä oti amej oniwhayaj.
