Judá lheley lech'isukyaj häpe m'ak tä nittäya
1“Judá lhayis, amel hach'isukyaj
häpe m'ak tä nittäya.
Ihiche t'at achowhal, tet iwoye n'olhämtes
tä õ'lesaynej chinaj tä y'uy tä tijejo tunte.
Wet tej tä altares letselhäs,
tha häp tä hach'isukyaj satej.
2Amel alesay nitichunpejlä altares,
lhäy'e hal'äy tä Asera lepeykas
tä lhamel yen laka dios tsinhaya
tä iwhäye hal'äy tä wuj lehupel,
lhäy'e tä iche'pe tachenhas tä atoschephä,
3lhäy'e tä iche'pe tachenhas
tä ihi honhat lhipey tä ischephä.
Asukyaj tä tamenej tä ochenla amehen atayhfwas,
yämthilek t'etane akäywet
lhäy'e tä isowethä tachenhas tä amajchetes
tä ihi nilhok aka honhat.
4Iwohiyet'ak ka'ekach'oye honhatte
ow'en amhohen tä tälhe achätilis,
wet oyenla atayhfwas kwenkaya
tä lhehihla honhat tä katäfwela'pe.
Tsi äytaji owäk,
tehlat iwoye itäj tä n'oma,
wet lenofwiyeja.”
Lhawuk lechufwenyajay tä w'enhahiche
5Lhawuk yok:
“Lewit'äyhyaj ihihila elh tä ile n'oyej
wet itiyej lechayaj iyhäj hin'ol
wet fwetaj lhaikhajyenej lhamel.
6Tehlat iwoye chayotas tä ihi ts'anis,
tsi häp tä newache elh chik t'uye.
Yen lew'eta honhat tä tuntey ihi,
nosoy wet äp laj wichiyahi.
7“Okäpfwayaj iyej elh tä icha n'oye
wet iti n'oyej leniwhayaj.
8Tehlat iwoye häp hal'ä tä iwhäye tewok
tä ipiyenchetshi lefwettsil, tiyäje t'at inät.
Wet nahayofw ilänhit'a,
w'atshan t'at wet isilataj,
wet lewhäy tä nem iche pelhay,
kamaj ilehiyejt'a tä iwo lhaya.
9“Hin'o lehusek häpe m'ak tä matche tä ni'isa,
t'akanyaj ihi wet lecha ihichet'a,
wet newache elh chik ihanej m'ak tä ilech'oye.
10Olham tä ohäpe wichi Lewuk
oyahinlhi t'at hin'o lehusek,
wet ontäfwelej t'at letichunhayaj.
Ow'enho elhpej m'ak tä t'uhawetej lechumtes
tä owo lahayayej m'ak at chik häpe tä iwoye.”
11Elh tä iti lhamej chinaj t'äj
tä kahäpeya lechumet laha,
mälhyej iwoye asnaj tä isoyej elh lhich'ul,
wet tä y'ajomche wet tä nitäfwelej
tä kalelesa, iwom t'at.
Wet häp tä mälhhiyejattso,
elh tä hiw'en m'ak yokwet nemhit m'ak hiw'en.
Tä ilepese, hin'otso ch'isuklhi t'at.
12Olhamel oka N'ohusew'et
lewujyaj ihi lhäy'e lesilatyaj,
tälhe täjp'ante õyenlhi.
13Iwuk, ahäpe Israel leniwhayaj.
Nilhokej lhamel tä ile amej len'äfwlhi ihihila.
Lhamel tä lhaitonte ahilä nofwila,
tehlat iwoye n'olesaynhay tä õ'ti'pe holo,
tsi häp tä lhamel ile amej
tä ahäpe inät tä n'ow'atshancheyaj.
Jeremías t'änch'oye Lhawuk
14Chesatn'o, Iwuk, häpkhilek oches.
Fwayhatn'o häpkhilek otfwayej m'ak tä ilänn'o,
tsi am tä on'okwipej amej.
15Wichi yäm n'oye tä yok:
“¿Chipte tä kamaj tek matche
Lhawuk lhämteste lhäme?
¡Is chik lhayäm matche athana!”
16Iwuk, olehiyejt'a tä otch'ote
achumet tä ot'uye aka wichi,
wet tek owatläk letiyej lewit'äyhyaj lhamel.
Am leläte t'at olhämtes tä ofwenho lhamel.
17Ahäpe oletnhawet chik näm m'ak tä ni'isa.
Yej alhen häpeya m'ak tä tanhoch'ay,
yej lestunn'o.
18Lhamel tä tatay n'ohlä,
is chik lhamel t'at tä len'äfwlhi ihi,
isit'ak olham tä on'äfwlhi ihi.
Is chik lhamel t'at tä lenowayhyaj ihi,
isit'ak olham tä onowayhyaj ihi.
Chätyenpe lhamel häp lewit'äyhyaj,
wet täyhthen lhamel pajla'tha nofwej.
En amajcheta ifwala tä n'ot'elakw'et
19Lhawuk yäm n'oye tä yok:
–Is chik letakasthi Jerusalén lelafwek tä tuntey lepe tä reyes tiyäjche wet äp tälhche tä inukwephä. Wet chik letakasthi lepetso, is chik lewo siläta olhämet. Chik leleyej, is chik letakasthipej nilhokej iyhäj lepelis tä ihi Jerusalén häpkhilek lewo siläta olhämet. 20Fwenhola reyes, lhäy'e nilhokej wichi tä Judá lheley, lhäy'e nilhokej lhamel tä lew'et Jerusalén tä tiyäjche lepelisna, is chik lhamel tach'ahuye olhämet 21tä yok, “Is chik amel lenoway atapehen. Yej tilhäj alhuyes häp ifwala tä n'ot'elakw'et, wet yej tälhetche Jerusalén lepelis. 22Yej tonphä alhuyes tä tälhchufwi awukwe ifwala tä n'ot'elakw'et, wet yej tachumwethä. En amajcheta n'oyej ifwala tä n'ot'elakw'et, mälhyej tä one'tehtek achätilis iwoye. 23Mat tek lhamel tach'ahuhte n'oye, iwohiyet'a olhämet. Tajlhama tä t'unhen lhamel, akachuhantses wet tek iwatläk isej ofwonkanyaj.
24“Olham tä Awukn'o ofwel amhohen, oyok, Is chik amel letach'ahu n'oye. Häp ifwala tä n'ot'elakw'et yej tälhetche hupuyna lepelis häp alhuk chik häpe. En amajcheta n'oyej ifwalatso wet yej tachumwethä. 25Wet chik amel lewoye täja, ihichepeja reyes tä ihi n'oniyatyajw'ette David ihi, wet lhamel tiyäjichela hupuyna lepelis. Lhamel nekhichela kaletas tä n'oka'tshayajchal, wet ihla'pe yel'atas, wet leniyatfwas iwohla t'unfwaya, lhäy'e wichi tä lew'et Judá lhäy'e Jerusalén. Wet Jerusalén tet lhampej hiw'enla t'at laka wichi. 26Nämhenla wichi tä tälhe hupuy tä ihi Judá, lhäy'e tä tälhe lew'etes tä iwhäye Jerusalén, lhäy'e tä tälhe Benjamín lhayis kahonhat, lhäy'e honhat tä w'awulhchä, lhäy'e tachenhas, lhäy'e tä tälhe honhat lhip tä tumej tapinhiye. Lhamel ichäjiyela Owukwe itshätäy häpkhilek ilänhen tä yen otw'ayhtesa, lhäy'e iyhäj itshätäy tä ilänhen wet äp õ'wunhomche häpkhilek yen n'okhayaja n'oyej. Äpte ichäjla n'oye yachuyaj lhay, lhäy'e incienso, lhäy'e otw'ayhtes tä lhamel hiw'en n'oho häp tä akäjejlhi m'ak tä owoyeje. 27Mat chik amel katach'ahuya n'oye wet ka'ena amajcheta ifwala tä n'ot'elakw'et, wet chik letilhäj alhuyes tä letälhetche Jerusalén lepelis häp ifwalatso, wet olham otihihila itäj häp hupuy lepelis, wet ihämthila hupuy tä hin'ol tä takhajayhen tä õy'uhyene honhat ihiche, wet ihichet'ala elh chik y'omat.”
