Õ'toyenlä m'ak wit'äyhyaj tä ihiyeja Jerusalén
1-2Häp rey Sedequías ichen Pasur, Malquías lhäs, lhäy'e häp sacerdote Sofonías, Maasías lhäs, wet ne'tek lhamel tahuyej Jeremías wet yok:
–Lhek p'altsen n'ohen, ämhoplhi Lhawuk, alhyen n'oyehen, tsi Babilonia laka rey Nabucodonosor inu n'amehen, lhäy'e laka nifwotas. Ch'athiyejat Lhawuk ipäyen n'amehen letetnek, itech'aynej täjp'ante yenlhi ifwalas tä pajche, häpkhilek Nabucodonosor ileche tä nek n'amehen.
3-4Tä mälhyej'attso, Lhawuk tahuyej Jeremías wet yok:
–Chulho Sedequías lechenhay, olak, “Fwenho Sedequías tä Lhawuk tä Israel laka Dios yok, Am lechene aka'tshayajchal häpkhilek tatayhlä häp Babilonia laka niyat lhäy'e laka nifwotas tä inuye hupuyna lelafwek tä tuntey. Mat lhek tetshan, olham onachajila alhoho aka'tshayajchaltso wet ohutlawek tä ihi hupuy lechowej. 5Olham t'at tä ottayhiyeja ahilähen okhajyhayaj tä wuj tä in'oyej. Häp tä on'älthila amejen owäk tä äytajche. 6Olänhihena nilhokej lhamel tä ihi hupuyna. Wichi lhäy'e itshätäy y'inhiyejena t'inhayajay tä äytes. 7Wet chik tefwaytshi, oyachajiyela Sedequías häp Nabucodonosor lhäy'e iyhäj letayhfwas tä t'uhläk ilän. Tehla leniyatfwas oyachajiyela, lhäy'e wichi iyhäj tä kamaj iläyhiche tä ihi hupuy tä tefwayej äytes lhäy'e n'oka'tshayaj lhäy'e nehläs. Wet Nabucodonosor lhäy'e laka sip'älis tek hip'altsenla lhamel, ilänhihena. Olham tä Awukn'o olhämet täjtso.”
8Wet nech'e Lhawuk äp tahuyej Jeremías wet yok:
–Is chik lhämhoplhi wichi wet lhok, “Lhawuk ifwel amhohen m'ak tä häpe n'ow'atshancheyaj lhäy'e m'ak tä häpe n'ot'ilek. Is chik amel letshupyene m'ak tä lehumin. 9Wichi elh chik häpe chik nekach'oye hupuyna, õ'länhiyeja n'ofwajnhat, wok nehläs tä ilänla, wok äytes tä ilänla. Mat elh chik yikch'oye hupuy wet lhayämet, wet lhayachaje Babilonio lhayis tä inuye hupuy, õ'länhit'ala. 10Tsi olham ottay'atlä hupuyna, nemhit owoyeje m'ak tä is. Oyachajiyela häp Babilonia kaniyat, wet lham iwunhihola pajla'tha nofwej. Olham tä Awukn'o olhämet täjtso.”
Lhawuk lhämet tä ifwenho Judá laka rey lhäy'e laka wichi
11-12Wet Lhawuk äp tahuyej Jeremías wet yok:
–Is chik lefwenho olhämet häp reyes tä ihi Judá, häp lhamel tä tälhe letes David. Olak,
“Ch'ahuyaye Lhawuk lhämet tä yok,
Woyaye akalelhthayaj tä is alhoho nilhokej ifwalas.
Fwayhtej wichi häp iyhäj
tä t'uhläk ikanejen lhamel.
Tsi chik amel kaleyache akeyis tä ni'isahen,
olham otihla amejen owäk,
tehlat iwoye itäj tä y'oho,
wet ihichet'ala elh chik ihanej chik y'omat.
Õ'toyenlä Lhawuk letasnhayaj tä itihiyeja Jerusalén
13“Jerusalén, am tä a'atojphä,
atet iwoye tachenaj tä iyahinchä'pe
honhat tä w'awulhchä.
Olham ofwel amho tä oayen tayhfwaya.
Amel tä ahäpehen Jerusalén lheley lhoyaykwe,
Ihichet'a elh chik ikalhi chik inu n'oyehen
wet tiyäjo olhamel ow'et.
14Mat olham tä Awukn'o oyok,
Otihla amejen otasnhayaj
tä t'uhawetej m'ak tä lewoye.
Olhänhihila itäj tä iwunhihola
awukwe tä aniyatyajw'et
wet yämla nofwej nilhokej m'ak tä iyej.”
