Jeremías iti letape n'olhukw'et
1Tä nichäte cuatro nekchämis tä Sedequías, Josías lhäs, niyatej Judá, Lhawuk tahuyej Jeremías 2wet yok:
–Enlhi hal'ä tä n'olhukw'et lhäy'e tsänt'ähes tä t'akay, wet tila atape. 3Chik wak'alh, wet fwenhola olhämet reyes kachenhay, lhamel tä ihoye Jerusalén tä tälhe honhates tä Edom, Moab, Amón, Tiro, lhäy'e Sidón, tä t'isiyakaye rey Sedequías. 4Häp täja olhämet tä one'tek lhamel iwo silätaye lewuhuytso chik lhamel yok, “Dios tä laj letumfwaya häp tä Israel Lewuk. 5Wet lham lakhajyhayaj ihi tä yenlhi honhat wet lhäy'e wichi lhäy'e itshätäy tä i'petso. Wet yok, Ow'enho t'at elh chik ow'enho. 6Wet häp tä oyachaje t'at nilhokej aka honhatil okawo Nabucodonosor, häp rey tä ihi Babilonia, wet hap'akej itshätäy tä fwitses tä oyen lewoya. 7Nilhokej wichi yenla lewuka häp lham, wet äp lhäs, wet äp lecheyäs, pajla'tha nichäte lewhäy tä nofw leniyatyaj. Tsi häp tä wujpey wichi lhäy'e laka niyatey lakhajyhayaj ihihila häpkhilek ikalhi laka wichi wet isoyej laka honhat.
8“Mat chik kamaj nichätaye ifwalastso, wet olham otasnhila wichi wok niyat chik häpe chik nitiya letape n'olhukw'et, wok oyok, elh chik nena lewuka häp Nabucodonosor, Babilonia laka rey. Ochenhiyela lhamel n'oka'tshayaj, op'ajthiyeja nehläs lhäy'e äytes, pajla'tha lhamel ichufwi lham lakhajyhayaj. Olham tä ohäpe Dios tä matche tä owoyetso. 9Tä mälhyejtso, yej tach'ahuye aka profetas tä kamatachehen lhäy'e wichi tä fwetaj ihanej m'ak tä ihichela. Yej wo lahaya hiyawul, han'ältshantses, lhäy'e lhamel tä fwetaj nitäfwelej m'ak tä häpe n'ofwilhey. Nilhokej häp lhamel tä ifwel amhohen tä yok, Awukhit'ala Babilonia laka rey. 10¡Mathichehent'a lhamel lhämtestso, wet tamenej tä õ'tonhichephäla amel tä letälho aka honhat, õyokwesichephäla amel häpkhilek let'inhen! 11Matla wichi tä lhayachaje Babilonia laka rey wet yen lewuka, otch'anlhahiyela chik lhamel ihi t'at laka honhat wet yenlhi lakäsw'etes. Olham tä ohäpe Dios tä matche tä owoyetso.”
12Olham Jeremías äpte ofwenho nilhokej tähestso häp Sedequías, Judá laka rey. Wet oyok:
–A'achajaye Babilonia laka rey wet enay awuhuya häp lham lhäy'e laka wichi, häpkhilek kat'ilahen. 13Isit'ak n'oka'tshayaj lhäy'e nehläs lhäy'e äytes ailänhen, lhäy'e aka wichi. Tsi Lhawuk yok, “Häp täjtso lewit'äyhyaj wichi chik lhaknachajaye Babilonia laka rey.” 14Yej tach'ahuye profetas tä ifwel amhohen tä yok, “Awukhit'ala Babilonia laka rey.” Tsi lhämtestso mathichehent'a. 15Lhawuk lhämet yok, “Olhamhit'ak ochenhay. Lhamel fwetaj yen lhämeta olhämtes, mat mathichehent'a. Wet häp tä olham oyokwesichephäla amel häpkhilek let'inhen, letan'isiyeja profeta lhayistso tä ifwel amhohen m'ak tä kamatache.”
16Te ofwenho sacerdotes lhäy'e nilhokej wichi häp Lhawuk lhämet tä yok:
–Yej tach'ahuye profetas tä yäme tä õ'nachajiyela'thahya Lhawuk Lewukwe häp m'ayhay tä laha ihi tä õ'hänehte Babilonia. Tsi lhämtestso mathichehent'a. 17Yej tach'ahuye lhamel. A'achajaye Babilonia laka rey häpkhilek kat'ilahen. Tsi isit'ak lewit'äyhyaj ihi hupuyna häpkhilek niwasahi. 18Chik häpe profetas wet äp matchehen wet Lhawuk lhämet iyej, is chik t'alhe lham tä laj letumfwaya häpkhilek õknichäjaye Babilonia m'ayhay tä laha ihi tä kamaj ihi Lhawuk Lew'et, lhäy'e iyhäj tä ihi Judá laka rey lewukwe, lhäy'e iyhäj tä ihi Jerusalén lhipey iyhäj.
19-21“Täjte rey Nabucodonosor itonphä tä tälho Jerusalén häp Jeconías, Joaquim lhäs tä Judá laka rey, wet ihäne Babilonia, lhäy'e iyhäj hin'ol tä len'ohyajay ihiche tä ihi Judá lhäy'e Jerusalén, iche m'ayhay tä isis tä imälhetchä. Tsi häp tä nichäja häp ch'utey, inäthi tä wuj, lhäy'e inäthis tä niwusa lew'etes, lhäy'e iyhäj m'ayhay. Hin'äychufwi Lhawuk Lewukwe, wet äp hin'äychufwi Judá laka rey lewukwe iyhäj, wet äp hin'äyhi Jerusalén lhip elhpej iyhäj m'ayhay. Wet nech'e Lhawuk yen lhämeta m'ayhaytso, yok, 22Õ'chäjiyela häp Babilonia wet ihihila pajla'tha olham yachajo tä otetshan lhamel, wet nech'ehilak õ'nachaj alhoho. Olham tä Awukn'o olhämet täjtso.”
